Iosua 4:1-24
-
Nadi be laloatao gauna bamona (1-24)
4 Israela taudia ibounai be Ioridane Sinavai idia hanaia murinai, Iehova be Iosua dekenai ia gwau:
2 “Taunimanima huana amo tatau 12 oi abia hidi, tau ta be iduhu ta amo,+
3 bona idia dekenai inai oda hereva oi henia: ‘Ioridane ena huanai hahelaga taudia idia gini gabuna amo nadi 12 umui abia,+ bona umui huaia lao bona hanuaboi ai do umui laga-ani gabuna dekenai umui atoa.’”+
4 Vadaeni Iosua ese Israela taudia huana amo tatau 12 ia boiria, iduhu ta ta amo ia abia hidi taudia,
5 bona Iosua be idia dekenai ia gwau: “Iehova emui Dirava ena Taravatu Maua vairanai umui lao, Ioridane Sinavai ena huana kahana dekenai, bona umui ta ta ese nadi ta ta be emui pagana dekenai umui atoa, Israela taudia edia iduhu ta ta edia namba hegeregerena,
6 bona idia be toa ta bamona umui dekenai. Bema emui natudia* be gabeai umui idia nanadaia, ‘Dahaka dainai inai nadi be iniseni umui atoa?’+
7 Namona be idia umui hamaoroa: ‘Israela taudia ese inai nadi be nega daudau lalonai do idia laloatao,+ badina Iehova ena Taravatu Maua be sinavai huanai idia huaia lao neganai, Ioridane ena ranu ena aru ia doko.’”+
8 Vadaeni Israela taudia be Iosua ese ia oda henia hegeregerena idia karaia. Idia ese nadi 12 be Ioridane ena huana amo idia abia, Iehova ese Iosua ia hereva henia bamona, Israela ena iduhu ta ta edia namba hegeregerena. Bona hanuaboi ai do idia laga-ani gabuna dekenai unai nadi idia abia lao bona unuseniai idia atoa.
9 Iosua ese nadi ma 12 be Ioridane ena huanai ia atoa danu, Taravatu Maua idia huaia hahelaga taudia idia gini gabuna ai,+ bona unai nadi be unuseniai idia noho ema bona hari.
10 Maua idia huaia hahelaga taudia be Ioridane Sinavai ena huanai idia gini ela bona Iehova ese Iosua dekenai ia henia oda herevadia be taunimanima ese idia badinaia guguru. Unai be guna Mose ese Iosua ia hamaoroa hegeregerena. Unai nega lalonai, Israela taudia be idia hanaia lao haraga.
11 Vadaeni taunimanima ibounai idia hanaia murinai, hahelaga taudia be Iehova ena Taravatu Maua idia huaia hanai, bona taunimanima ese idia itaia.+
12 Bona Rubena iduhu taudia bona Gado iduhu taudia, bona Manase iduhu kahana be tuari orea bamona,+ Israela taudia ma haida edia vairanai idia lao guna, Mose ese idia ia oda henia hegeregerena.+
13 Tuari totona idia hegaegae tatau 40,000 bamona be Ieriko ena taunimanima lasi gabuna dekenai idia hanaia lao, Iehova vairanai.
14 Unai dina ai Iehova ese Israela taudia ibounai edia vairanai Iosua ia hanamoa,+ bona ena mauri ibounai lalonai ia idia matauraia bada, Mose idia matauraia bada hegeregerena.+
15 Bena Iehova be Iosua dekenai ia gwau:
16 “Taravatu Maua idia huaia hahelaga taudia oi oda henia+ Ioridane Sinavai amo idia daekau totona.”
17 Vadaeni Iosua ese hahelaga taudia ia oda henia: “Ioridane Sinavai amo umui daekau.”
18 Iehova ena Taravatu Maua idia huaia hahelaga taudia+ be Ioridane ena huana amo idia daekau mai bona tano kaukau dekenai idia gini neganai, Ioridane ena ranu ia aru matamaia lou bena ranu ia daekau bona sinavai ena isena ia koua,+ guna bamona.
19 Hua ginigunana ena dina namba 10 ai, taunimanima be Ioridane amo idia daekau lao bona Gilegala dekenai idia kamepa,+ unai be Ieriko ena ist kahana ena boda ai.
20 Ioridane amo idia abia nadi 12 be Iosua ese Gilegala dekenai ia haginia.+
21 Bena Israela taudia dekenai ia gwau: “Vaira nega ai bema emui natudia ese umui idia nanadaia, ‘Inai nadi edia anina be dahaka?’+
22 Namona be emui natudia dekenai umui gwau: ‘Israela taudia be tano kaukau dekenai Ioridane idia hanaia.+
23 Unai neganai Iehova emui Dirava ese idia vairanai Ioridane ena ranu ia hakaukaua, unai amo idia hanaia diba. Guna Davara Kakakaka dekenai Iehova emui Dirava be unai bamona ia karaia, ia ese ranu ia hakaukaua, unai amo ai hanaia diba.+
24 Unai bamona ia karaia, unai amo tanobada taudia ibounai do idia diba Iehova ena imana be goada momokani+ bona umui ese hanaihanai Iehova emui Dirava do umui gari henia.’”
Futnout
^ Heb., “natudia memero.”
