Aposetolo Edia Kara 5:1-42
5 Tau ta ladana Anania bona ena adavana Sapira ese edia tano idia hoihoilaia.
2 To Anania ese hehuni ai moni haida ia dogoatao, bona ena adavana be unai ia diba, bena Anania ese moni orena ia mailaia bona aposetolo taudia dekenai ia henia.+
3 Vadaeni Petero ia gwau: “Anania e, dahaka dainai dala oi kehoa Satani ese emu lalona ia veria totona, bena lauma helaga oi koia+ bona tano ena moni haida be hehuni dalanai oi dogoatao?
4 Tano oi do hoihoilaia lasi neganai, unai be oiemu, ani? Bona oi hoihoilaia murinai, oi abia monina be oiemu, ani? Vadaeni dahaka dainai emu lalona* ai inai kara oi lalohadailaia? Oi be taunimanima oi koia lasi, to Dirava oi koia.”
5 Anania be unai hereva ia kamonai neganai, ia moru bena ia mase. Bona unai sivarai idia kamonai taudia ibounai idia gari dikadika.
6 Bena tatau matamata idia toreisi, dabua amo ia idia kumia, bena murimuri dekenai idia huaia lao bona idia guria.
7 Vadaeni hora toi idia ore murinai ena adavana ia vareai, ia vara gauna ia diba lasi.
8 Petero be ia dekenai ia gwau: “Lau oi hamaoroa, umui ese tano umui hoihoilaia ena davana be inai, a?” Ia gwau: “Oibe, ena davana be unai.”
9 Vadaeni Petero be ia dekenai ia gwau: “Dahaka dainai umui ruaosi umui lalotamona Iehova* ena lauma umui tohoa totona? Itaia! Emu adavana idia guria taudia be iduara ai, bona idia ese oi do idia huaia raka-lasi.”
10 Maoromaoro ia be Petero ena aena badinai ia moru bena ia mase. Tatau matamata idia vareai neganai, idia davaria ia mase vadaeni, bona ia idia huaia raka-lasi bona ena adavana badinai idia guria.
11 Vadaeni kongrigeisen taudia bona unai sivarai idia kamonai taudia ibounai idia gari dikadika.
12 Danu, aposetolo taudia be taunimanima huanai toa bona hoa karadia momo idia karaia noho.+ Bona idia ibounai be Solomona Ena Du* ai idia haboua.+
13 Momokani, haida edia lalona idia goada lasi hahediba taudia idia bamoa totona. To taunimanima ese hahediba taudia idia hanamoa noho.
14 Bona Lohiabada idia abidadama henia taudia, tatau bona hahine, edia namba ia bada daekau.+
15 Bona gorere taudia be dala badadia dekenai idia mailaia bona unuseniai edia mahuta geda latanai idia hahekuredia, unai amo Petero ia raka hanai neganai, iena laulau be idia haida latanai ia hanaia.+
16 Danu, Ierusalema badinai idia noho taoni amo hutuma idia mai noho. Idia ese gorere taudia bona lauma dikadia ese idia biagua taudia idia mailaia bona idia ibounai ia hanamoa.
17 To hahelaga tauna badana bona ia idia bamoa Sadukea tomadiho orea taudia idia toreisi bona idia mama henidia bada.
18 Bona aposetolo taudia idia dogoatao bena dibura ruma ai idia atodia.+
19 To hanuaboi ai, Iehova* ena aneru ese dibura ruma ena iduara ia kehoa,+ idia ia hakaua raka-lasi, bona ia gwau:
20 “Umui lao bona dubu helaga lalonai umui gini bona taunimanima dekenai mauri ena sivarai umui harorolaia noho.”
21 Unai idia kamonai murinai, daba maragi ai dubu helaga lalonai idia vareai bona idia hadibaia matamaia.
Vadaeni hahelaga tauna badana bona ia idia bamoa taudia idia ginidae neganai, Sanhedrin* bona Israela ena tau badadia ibounai idia boiria, bona dibura ruma dekenai gima taudia idia siaia lao aposetolo taudia idia hakaua mai totona.
22 To gima taudia be unuseniai idia ginidae neganai, aposetolo taudia be dibura ruma ai idia noho lasi. Unai dainai idia giroa lou bona idia hamaorodia,
23 idia gwau: “Ai itaia dibura rumana idia lokaia namonamo bona gima taudia be iduara dekenai idia gini, to iduara ai kehoa neganai, ta ai itaia lasi.”
24 Vadaeni dubu helaga ena kapten bona dubu biagudia be unai idia kamonai neganai, gabeai do ia vara gauna dainai idia lalohekwarahi.
25 To tau ta ia mai bona idia dekenai ia gwau: “Itaia! Dibura ruma ai umui atoa tatau be dubu helaga lalonai idia gini bona taunimanima idia hadibaia noho.”
26 Bena kapten be ena gadi taudia ida ia lao bona aposetolo taudia idia hakaua mai, to idia dagedage henidia lasi, badina idia gari, dika taunimanima ese nadi amo idia hododia.+
27 Vadaeni idia hakaudia mai bona Sanhedrin vairanai idia gini. Bena hahelaga tauna badana be
28 idia dekenai ia gwau: “Umui ai oda henia inai ladanai do umui hadibaia lasi.+ To itaia, Ierusalema ibounai be emui hahediba herevana amo umui hahonua vadaeni, bona umui ura inai tauna ena rara be ai latanai umui atoa.”+
29 Petero bona aposetolo taudia ma haida idia haere: “Dirava be lohia dainai ia ai kamonai henia be maoro, to taunimanima lasi.+
30 Iseda sene taudia edia Dirava ese Iesu ia hatorea isi, ia be au dekenai umui koko kau bona umui hamasea.+
31 Dirava ese ia abia isi bona ena imana idibana kahanai ia atoa,+ bona Gunalaia Tauna Badana+ bona Hamauria Tauna+ ai ia halaoa, unai amo Israela taudia idia helalo-kerehai bona Dirava ese edia kara dika ia gwauatao diba.+
32 Ai ese unai gaudia ai gwauraia hedinarai,+ bona lauma helaga ese unai ia karaia danu,+ unai lauma helaga be Dirava ese ia idia kamonai henia* taudia dekenai ia henia.”
33 Unai idia kamonai neganai, idia badu dikadika bona idia ura aposetolo taudia idia hamasea.
34 To Sanhedrin amo Farisea tauna ta ladana Gamaliela+ ia toreisi. Ia be Taravatu* hadibaia tauna bona taunimanima ibounai ese idia matauraia. Ia ese oda ia henia, aposetolo taudia be do idia siaia murimuri ai nega sisina do idia naria.
35 Bona ia gwau: “Israela taudia e, inai tatau dekenai umui ura karaia gauna umui laloa namonamo guna.
36 Hegeregere, guna Teuda ia toreisi, ia gwau ia be tau badana, bona tatau 400 bamona be ena orea lalonai idia vareai. To haida ese ia idia alaia, bona ia idia badinaia taudia ibounai be gabu idauidau dekenai idia heau bona unai orea ia boio.
37 Ia murinai sensas negana ai, Galilea tauna Iuda ia toreisi bona taunimanima edia lalona ia veria ia idia badinaia totona. To unai tauna ia mase danu, bona ia idia badinaia taudia ibounai be gabu idauidau dekenai idia heau.
38 Unai dainai umui lau hamaoroa, inai tatau edia gaukara umui koua lasi, to idia umui rakatania. Badina bema inai hahediba hereva eiava gaukara be taunimanima amo, do ia ore,
39 to bema ia be Dirava amo, umui ese edia gaukara do umui koua diba lasi.+ Umui naria namonamo, badina dika umui be Dirava umui tuari henia noho.”+
40 Vadaeni Gamaliela ena hereva idia abia dae bona aposetolo taudia idia boiria, idia kwadidia,*+ bona idia oda henidia Iesu ena ladanai do idia hereva lasi, bena idia ruhadia.
41 Vadaeni Sanhedrin idia rakatania bona mai moale ida idia lao,+ badina Dirava ia laloa idia be hegeregere Iesu ena ladana dainai hemarai idia abia totona.
42 Bona dina ibounai dubu helaga ai bona ruma-ta-ruma-ta ai,+ Iesu Keriso ena sivarai namona idia hadibaia bona harorolaia noho, idia hadokoa lasi.+
Futnout
^ Gr., “kudouna.”
^ Unai be, edia lohia tauna idia kamonai henia bamona.
^ Unai be, Mose Ena Taravatu.
^ Eiava reana, “au amo idia kwadia.”
