Revareva ta Roma Taudia Dekenai 3:1-31
3 Vadaeni, dahaka ese ia hahedinaraia Iuda tauna ese ma haida ia hereaia? Eiava kopina utua karana ena namo be dahaka?
2 Iuda taudia be dala idauidau ai ma haida idia hereaia. Dala ta be, Dirava ese idia dekenai iena hereva helagana ia henia.+
3 Vadaeni dahaka do ita gwau? Bema haida idia abidadama lasi, unai ese ia hahedinaraia Dirava be ena hereva do ia badinaia lasi, a?
4 Lasi vaitani! Dirava be ia hereva momokani,+ taunimanima ibounai be idia hereva koikoi.+ Toretore Helagadia ena hereva bamona, ia gwau: “Oi hereva neganai, emu hereva be maoromaoro, bona oi idia hahemaoro henia neganai, do oi kwalimu.”+
5 To, bema iseda kara kerere ese Dirava ena kara maoromaoro ia hahedinaraia, dahaka do ita gwau? Dirava ese ena badu ia hahedinaraia neganai, ia kara gageva, a? (Lau be taunimanima edia hereva dalanai lau hereva noho.)
6 Lasi vaitani! Bema Dirava ia kara gageva, edena bamona ia ese tanobada do ia hahemaoro henia?+
7 To bema lau koikoi, bona unai ese Dirava ena hereva momokani ia hahedinaraia bona ena hairai ia habadaia, vadaeni dahaka dainai lau be kara dika tauna bamona hahemaoro lau abia?
8 Taunimanima haida ese ita idia samania koikoi, idia gwau ita be inai hereva ita gwauraia: “Namona be gau dikadia ita karaia, gau namodia idia vara totona.” Dirava ena hahemaoro goevana hegeregerena, ia ese unai taudia edia dika davana do ia henia.+
9 Vadaeni dahaka ita laloa? Ita Iuda taudia ese ma haida ita hereaia, a? Lasi momokani! Badina ita hahedinaraia vadaeni ita ibounai, Iuda taudia bona Grik taudia danu be kara dika henunai ita noho.+
10 Toretore Helagadia ena hereva bamona, ia gwau: “Kara maoromaoro tauna ta be lasi, lasi bona lasi momokani.+
11 Laloparara tauna ta be lasi, bona Dirava ia tahua tauna ta be lasi.
12 Taunimanima ibounai be Dirava idia rakatania vadaeni, idia ibounai be anina lasi. Hebogahisi ia hahedinaraia tauna ta be lasi, lasi momokani.”+
13 “Edia uduna be ia kehoa mase guri bamona, edia malana amo koikoi herevadia idia gwauraia.”+ “Gaigai ena poisini be edia uduna dekenai ia noho.”+
14 “Edia uduna be hadikaia herevadia bona habadua herevadia amo idia honu.”+
15 “Edia aena be idia haraga rara idia bubua totona.”+
16 “Edia raka daladia ai dika bona hisihisi idia noho,
17 bona idia be maino dalana idia diba lasi.”+
18 “Idia be Dirava idia gari henia lasi.”+
19 Ita diba Taravatu* ese ia gwauraia gaudia ibounai be Taravatu henunai idia noho taudia dekenai ia gwauraia, unai dainai ibounai ese edia uduna idia koua be namo, bona Dirava ese tanobada ibounai ia hahemaoro henia be maoro.+
20 Unai dainai, taravatu badinaia karana amo Dirava ese ena vairanai tau ta do ia gwauraia maoromaoro lasi,+ badina taravatu amo ita diba momokani kara dika be dahaka.+
21 Vadaeni Dirava ena kara maoromaoro be taravatu badinaia karana amo ia hedinarai lasi,+ to Taravatu bona Peroveta Taudia amo ia hedinarai.+
22 Oibe, Dirava ena kara maoromaoro be Iesu Keriso abidadama henia karana amo ia vara bona unai be abidadama taudia ibounai totona, badina idia ibounai be hegeregere.+
23 Taunimanima ibounai be idia kara dika vadaeni bona Dirava ena hairai idia reaia.+
24 To Dirava ese hebogahisi hereadaena+ be idia dekenai ia hahedinaraia, badina Keriso Iesu ia henia mauri davana amo idia ia ruhaia bona idia ia gwauraia maoromaoro,+ unai be davana lasi harihari gauna.+
25 Dirava ese ia be boubou gauna ta bamona ia henia, bona Keriso ena rara abidadama henia karana amo+ taunimanima be Dirava ida maino idia karaia diba.+ Dirava be ena kara maoromaoro hahedinaraia totona unai ia karaia, badina idaunegai idia vara kara dika ia gwauatao neganai, haheauka ia hahedinaraia.
26 Bona hari inai negai danu, ia ese ena kara maoromaoro ia hahedinaraia totona,+ Iesu ia abidadama henia tauna ia gwauraia maoromaoro.+
27 Ta ia heagi be mai ena badina, a? Lasi. Edena taravatu dainai ia heagi diba? Taravatu badinaia karana ena taravatu, a?+ Lasi momokani, to abidadama karana ena taravatu.
28 Badina ai laloa taravatu badinaia karana amo lasi, to abidadama karana amo Dirava ese ta ia gwauraia maoromaoro.+
29 Eiava ia be Iuda taudia sibona edia Dirava, a?+ Ia be idau bese taudia edia Dirava lasi, a?+ Lasi, ia be idau bese taudia edia Dirava danu.+
30 Dirava be tamona dainai,+ ia ese kopina utua taudia bona kopina utua lasi taudia be edia abidadama dainai do ia gwauraia maoromaoro.+
31 Vadaeni iseda abidadama dainai taravatu ita haorea, a? Lasi vaitani! To taravatu ita haginia goada.+
Futnout
^ Unai be, Mose Ena Taravatu.
