• IA VARA LAGANINA: 1941

• TANO: BENIN

• GUNA: HAHINE MOMO, IEHOVA ENA WITNES TAUDIA IA DAGEDAGE HENIA TAUNA TA

EGU MAURI GUNANA:

Lau be Cotonou tauna Benin ena siti amo. Egu tama sina be Katolik to dubu idia lao henia momo lasi. Lau noho gabuna dekenai Katolik taudia momo be hahine momo idia adavaia. Lau be hahine foa lau adavaia.

Lagani 1970 ai taunimanima idia ura gavamani ta do ia gini, bona lau laloa unai ese emai taoni dekenai namo do ia havaraia. Unai dainai tuari lalonai lau vareai bona politikol edia gaukara lau durua. Tuari taudia ese Iehova ena Witnes taudia idia ura henia lasi, badina politikol gaukara amo idia gini siri. Lau danu ese Iehova ena Witnes taudia lau dagedage henia. Lagani 1976 ai, Witnes misinari taudia be emai tano amo idia lulua neganai, lau laloa do idia giroa mai lasi.

BAIBEL ESE EGU MAURI IA HAIDAUA DALANA:

Tuari be lagani 1990 lalonai ia doko. Lau hoa, badina daudau lasi murinai Witnes misinari taudia be idia giroa mai. Bena lau laloa reana Dirava ese idia ia durua noho. Unai negai unai gabu lau rakatania bona gaukara ma ta lau abia hidi. Ai gaukara hebou tauna ta be Witnes tauna ta bona maoromaoro Baibel ena sivarai ia herevalaia. Lau dekenai Baibel siri haida amo ia hahedinaraia Iehova be lalokau bona kara maorormaoro Diravana. (Deuteronomi 32:4; 1 Ioane 4:8) Unai lau kamonai neganai lau moale. Lau ura Iehova dekenai diba ma haida lau abia dainai, Baibel stadi lau abia dae.

Daudau lasi murinai Iehova ena Witnes taudia edia hebou lau lao matamaia. Idia lalokau heheni karana lau itaia neganai lau hoa idia ia hapararaia gauna ta be lasi. Hebou momo lau lao murinai, lau diba Witnes taudia be Iesu murinai idia raka taudia korikoridia.​—Ioane 13:35.

Lau diba, bema lau ura Iehova ena ura lau karaia, Katolik dubu do lau rakatania guna. Unai be auka badina lau laloa taunimanima be lau dekenai dahaka do idia laloa. To nega daudau murinai, Iehova ena heduru amo goada lau abia bona Katolik dubu lau rakatania.

To egu mauri ai gau badana ma ta do lau haidaua danu. Baibel stadilaia karana ese lau ia hadibaia Dirava be hahine momo adavaia karana ia ura henia lasi. (Genese 2:18-24; Mataio 19:4-6) Dirava vairanai egu hahine ginigunana be egu hahine korikorina. Unai dainai emai headava ai regista bona egu hahine ma haida lau siaia lao edia famili dekenai, to dala lau karaia unai amo edia dabu gaudia idia abia diba. Gabeai egu hahine rua be Iehova ena Witnes taudia ai idia lao.

NAMO LAU DAVARIA DALANA:

Ena be egu adavana be Katolik dubu dekenai ia do lao noho tomadiho totona, to egu abia hidi Iehova hesiai henia karana dekenai ia matauraia. Ai ruaosi ai mamia hari lau be egu adavana lau kara namo henia.

Guna lau laloa politikol lalonai vareai karana amo egu taunimanima lau durua diba, to egu hekwarahi ese namo ia havaraia lasi. Hari lau diba Dirava ena Basileia sibona ese taunimanima ibounai edia mauri do ia hanamoa. (Mataio 6:9, 10) Iehova lau taniku henia badina egu mauri do lau moalelaia dalana ia hahedinaraia.

• IA VARA LAGANINA: 1977

• TANO: BRAZIL

• GUNA: PENTECOSTAL DUBU ENA PASTO

EGU MAURI GUNANA:

Lau be Itu ai lau tubu daekau, unai be São Paulo State ena siti. Unai gabu ai raskol be momo.

Lau be dagedage bona matabodaga karadia lau karaia tauna, danu drag lau hoia loaloa. Daudau lasi murinai, lau laloparara bema unai gaudia lau karaia noho, dibura ruma ai do lau noho eiava egu mauri lau haboioa diba, unai dainai unai gaudia lau rakatania. Gabeai, Pentecostal dubu lau bamoa, bona daudau lasi murinai pasto dagina lau abia.

Lau laloa dubu ai lau gwauraia herevadia amo taunimanima lau durua diba. Nega haida emai komuniti ena reidio amo lau haroro, bona unai dainai taunimanima momo be lau idia diba. To metairametaira lau itaia dubu taudia be edia memba ta ta idia laloa bada lasi. Dirava abidadama henia karana danu idia laloa bada lasi. Lau itaia dubu taudia edia ura badana be moni do idia gogoa sibona. Unai dainai dubu lau rakatania.

BAIBEL ESE EGU MAURI IA HAIDAUA DALANA:

Iehova ena Witnes taudia ida Baibel lau stadilaia neganai, lau itaia idia be idau​—dubu ma haida bamona lasi. Idia karaia gaudia rua dekenai lau hoa. Ginigunana, Iehova ena Witnes taudia ese Dirava bona dekena tauna idia lalokau henia karana idia herevalaia sibona lasi to kara idia karaia danu. Iharuana, idia be politikol bona tuari karadia idia karaia lasi. (Isaia 2:4) Unai gau rua dainai lau diba tomadiho momokani lau davaria unai be mauri hanaihanai ia lao henia dala maragina.—Mataio 7:​13, 14.

Lau diba bema lau ura Dirava lau hamoalea, egu mauri dalana lau haidaua be gau badana. Namona be egu famili lau durua bona lau manau. Egu mauri lau haidaua be mai ena hekwarahi, to Iehova ena heduru amo lau kwalimu. Egu adavana be egu kara namodia dainai ia moale. Egu adavana be Baibel ia stadilaia guna bona lau be gabeai, to daudau lasi murinai, ai ruaosi ai diba ai ura Iehova ena Witnes taudia ai do ai lao. Ai ruaosi be nega tamona bapatiso ai abia.

NAMO LAU DAVARIA DALANA:

Lau bona egu adavana ai moale bada badina emai natudia toi do ai durua Iehova idia tura henia totona. Hari ai moale bada. Iehova lau taniku henia badina, Baibel ena hereva momokani amo lau ia veria mai ena orea dekenai. Momokani, Baibel ese taunimanima edia mauri ia haidaua diba! Unai ia karaia lau dekenai.

• IA VARA LAGANINA: 1957

• TANO: AUSTRALIA

• GUNA: ENA MARAGI NEGANA BE DIKA SIBONA

EGU MAURI GUNANA:

Lau tubu gabuna be Newcastle, unai be New South Wales dekenai. Egu tamana bona sinana edia natudia seven amo lau be ginigunana, egu tamana be inuinu momo bona dagedage tauna. Egu sinana danu be dagedage hahinena. Egu sinana ese hanaihanai lau ia botaia bona ia gwauraia dika. Nega momo do ia gwau lau be kekeni dikana bona hel lahina lalonai hisihisi do lau abia. Unai lau kamonai neganai lau gari bada.

Nega momo egu sinana ese lau ia botaia dainai sikuli lau lao diba lasi. Egu mauri lagani be 11 neganai, natudia naria gabuna dekenai lau idia atoa bena gabeai katolik dubu ta dekenai lau noho. Egu mauri lagani be 14 neganai, dubu amo lau heau boio. Lau ura lasi ruma dekenai lau giroa lao dainai, King’s Cross, Sydney ena dala dekenai ai lau noho kava.

Dala dekenai lau noho neganai, drag bona alkahol lau abia danu ponografi lau karaia bona ariara hahinena bamona lau noho. Nega ta lau gari dikadika. Lau be club ta ena biaguna ena ruma ai lau noho. Hanuaboi ta ai, tau rua idia mai ia idia itaia totona. Lau ia siaia daiutu ta lalonai to edia hereva lau kamonai diba. Club biaguna ese dala ia karaia unai tatau dekenai lau do ia hoihoilaia totona. Idia ura Cargo ship ta dekenai lau do idia hunia bona lau do idia abia lao Japan dekenai unai amo bar ta ai do lau gaukara. Lau gari dainai, balcony amo lau paudobi bona lau heau heduru abia totona.

Tau ta lau davaria, ia be Sydney ia vadivadi henia, bona egu lalohekwarahi be ia dekenai lau gwauraia. Lau laloa unai dala amo moni haida ia henia diba. To lau ia invait iena ruma dekenai, lau digu bona aniani totona. Ia ida lau noho bona ia lau rakatania lasi. Lagani tamona murinai ai headava.

BAIBEL ESE EGU MAURI IA HAIDAUA DALANA:

Iehova ena Witnes taudia ida Baibel lau stadilaia neganai, egu hemami be idauidau. Lau badu badina guna lau kamonai Dirava ese taunimanima ia hahisia, to hari lau diba Satani ese dika ia havaraia. Hari lau moale badina lau diba Dirava ese taunimanima be hel lahina lalonai ia panisia lasi, egu mauri ibounai lalonai unai hadibaia herevana dainai lau gari.

Lau hoa badina Witnes taudia ese disisen idia karaia neganai, Baibel ena hereva idia badinaia. Idia abia dae gaudia be edia mauri ai idia badinaia. Ena be egu hereva bona egu kara be auka, to Witnes taudia be lau dekenai lalokau bona hemataurai idia hahedinaraia.

Lau lalohekwarahilaia gauna badana be sibona lau laloa maragi. Lau laloa lau be dika herea. Ena be bapatiso lau abia bona Iehova ena Witnes ta ai lau lao, to unai lalohadai dainai lau do lalohekwarahi noho. Ena be lau diba Iehova lau lalokau henia, to lau abia dae momokani lau do ia lalokau henia diba lasi.

Lau bapatiso murinai lagani 15 bamona, egu lalohadai lau haidaua hamatamaia. Iehova ena Witnes taudia edia Kingdom Hall dekenai tadikaka ta ese tok ia henia bona Iamesi 1:23, 24 ia herevalaia. Ia gwau Dirava ena Hereva be hevarivari bamona, badina taunimanima ta ese sibona ia itaia Iehova ese ia itaia hegeregerena. Lau laloa reana lau sibona lalonai lau itaia gaudia be idau, to Iehova ese ia itaia gaudia be idau. Unai lalohadai matamata lau abia dae haraga lasi. Lau do mamia Iehova ese lau do ia lalokau henia diba lasi.

Dina haida murinai Baibel siri ta lau duahia. Unai ese egu mauri ia haidaua momokani. Unai siri be Isaia 1:18, unuseniai Iehova ia gwau: “Umui mai, ita huanai iseda hereva ita hamaoromaoroa. Ena be emui kara dika be kakakaka momokani, to do ia kurokuro momokani, sinou bamona.” Unai be hegeregere Iehova ia gwau: “Vicky oi mai, ita huanai hereva ita hamaoromaoroa. Oi lau diba, emu kara dikadia lau diba, emu kudouna lau diba​—bona oi lau lalokau henia noho.”

Unai hanuaboi ai lau mahuta diba lasi. Lau daradara noho Iehova be lau do ia lalokau henia lasi eiava, to Iesu ese ena mauri ia henia boubou gauna bamona lau laloa. Bena maoromaoro lau diba vadaeni. Bena lau laloa, Iehova be nega daudau lalonai lau dekenai ia haheauka noho, dala idauidau ai lau dekenai ena lalokau ia hahedinaraia. To toana be Iehova lau hamaoroa: “Emu lalokau be hegeregere lasi lau dekenai. Emu Natuna ena boubou gauna be hegeregere lasi lau totona.” Unai be hegeregere Iesu ena mauri davana be Iehova dekenai lau negea lou. To Iesu ena mauri davalaia boubouna lau laloa dobu neganai, lau mamia Iehova ese lau ia lalokau henia.

NAMO LAU DAVARIA DALANA:

Hari lau mamia lau be goeva, egu mauri be namo, bona lau moale. Egu headava maurina lau moalelaia, bona lau moale badina egu sivarai amo taunimanima haida lau durua diba. Hari lau mamia lau be Iehova kahirakahira lau lao noho.

• IA VARA LAGANINA: 1974

• TANO: RUSSIA

• GUNA: HEAVY-METAL MIUSIKI IA URA HENIA

EGU MAURI GUNANA:

Lau be Votkinsk ai lau vara, bona musiki ia karaia tauna badana ladana, Pyotr Ilich Tchaikovsky be unuseniai ia vara danu. Egu ruma bese be ogogami taudia. Egu tamana ena kara be namo herea, to ia be alkahol inua momo tauna, unai dainai emai ruma lalonai nega momo ai hepapahuahu.

Lau be stiuden namona lasi bona lau bada neganai, lau mamia lau be anina lasi bona ma haida lau tura henia lasi. Haida lau hereva henia lasi bona idia lau trast lasi. Lau dekenai sikuli lao karana be ia auka. Klas lalonai, gau ta lau ura herevalaia neganai, lau gwauraia namonamo diba lasi. Grade 8 gradueisen murinai, egu ripot kad ai inai idia torea: “Ia hereva momo lasi dainai, ena lalohadai ia gwauraia diba lasi.” Unai hereva ese egu hemami ia hadikaia bona lau mamia momokani lau be anina lasi. Bena lau laloa matamaia egu mauri be mai ena anina, eiava?

Lau mero matamata matamata neganai, alkoholo lau inua matamaia. Matamanai alkahol inua karana ese egu hemami ia hanamoa. To lau inuinu momo neganai egu lalomamina ese lau ia kota henia. Bona lau mamia egu mauri be anina lasi. Lau lalometau bada dainai, nega haida dina momo ruma dekenai lau noho. Lau laloa sibona lau hamasea be namo.

Egu mauri lagani be 20 neganai, gau ma ta karaia dainai lau moale. Unai be heavy-metal musiki. Unai musiki ese egu hemami ia hanamoa bona unai miusiki idia ura henia taudia haida lau bamoa. Egu huina lau halataia, ear ring lau atoa, bona lau ura henia miusiki karaia taudia bamona edia dabua bamona lau hahedokilaia. Metairametaira egu kara be ia dika ia lao, lau kara kava bona lau dagedage momo, nega momo egu ruma taudia ida ai hepapahuahu.

Lau laloa heavy-metal musiki lau kamonai neganai, do lau moale, to unai ia vara lasi! Egu kara ia idau, lau ura henia miuski karaia taudia edia kara kereredia lau dibaia neganai, lau moale lasi.

Sibona hamasea karana lau lalohadailaia lou bona lau ura unai lau karaia momokani. To unai lau karaia lasi badina lau diba egu sinana do ia lalohisihisi bada. Lau ia lalokau henia bada bona nega momo lau ia durua. Egu mauri be ia dika momokani, lau ura lasi lau mauri noho, to egu mauri lau hadokoa diba lasi.

Sibona hamasea lalohadaina lau dadaraia totona, Russia taudia ese idia torea buka namodia lau duahia matamaia. Buka ta ai, dubu lalonai ia gaukara tau namona ta ena sivarai ia herevalaia. Maoromaoro lau mamia lau ura bada Dirava ena gaukara lau karaia bona taunimanima lau durua. Bena Dirava lau guriguri henia mai egu kudouna ibounai ida, guna unai lau karaia lasi. Dirava lau noia, lau ura lau ia durua mauri mai ena anina korikori lau davaria totona. Egu guriguri lalonai lau mamia lalomaino lau abia. Hoa gauna ma ta be hora rua murinai, Iehova ena Witnes tauna ta be egu iduara dekenai ia pidipidi bona Baibel stadi totona lau ia noia. Lau abia dae unai be egu guriguri ena haere. Unai dina ai lau moale matamaia.

BAIBEL ESE EGU MAURI IA HAIDAUA DALANA:

Egu heavy-metal musiki kohudia ibounai lau negea ena be ia auka. To unai musiki lau laloaboio haraga lasi. Bema gabu ta lau raka hanai bona unai musiki lau kamonai, karaharagaguna lau karaia gaudia lau laloa lou. To lau ura lasi unai lalohadai dikadia lau laloa noho badina lau ura lau kamonai sivarai namodia sibona be egu kudouna bona lalona dekenai do ia noho. Unai dainai unai musiki idia karaia gabudia dekenai lau lao lasi. Bona bema lau ura lalohadai gunadia lau laloa lou, hanaihanai Iehova lau guriguri henia goadagoada. Unai lau karaia neganai, “Dirava ena maino, laloparara ibounai ia hereaia gauna” lau mamia.—Filipi 4:7.

Baibel lau stadilaia neganai lau diba Keristani taudia edia gaukara be idia kamonai sivarai namona be taunimanima haida dekenai do idia hadibaia. (Mataio 28:19, 20) Lau diba momokani unai gaukara do lau karaia diba lasi. To lau kamonai noho gaudia lau moalelaia bona lalomaino korikorina lau davaria. Lau diba ma haida ese unai gaudia idia dibaia danu be namo. Ena be lau gari, to lau dibaia gaudia be ma haida dekenai lau gwauraia matamaia. Bona lau hoa, badina haida dekenai Baibel lau herevalaia neganai, unai ese lau ia hagoadaia, danu ma haida dekenai lau abia dae gaudia lau herevalaia karana ese lau ia hagoadaia.

NAMO LAU DAVARIA DALANA:

Hari lau headava, bona lau moale badina taunimanima momo—egu tadina bona sinana danu, lau durua Baibel idia dibaia totona. Dirava ena gaukara lau karaia bona taunimanima lau durua Ia idia diba totona. Unai lau karaia dainai lau mamia egu mauri be mai ena anina.