Duahia Taudia Edia Henanadai

Baibel lalonai toasting ena kara ia herevalaia lasi, vadaeni dahaka dainai Iehova ena Witnes taudia ese toasting karana idia karaia lasi?

Galasi ta mai ena wain (eiava alkahol ma ta) dekena amo toasting idia karaia be idau negai ia mai hari ena kara bona taunimanima momo idia karaia, to gabu idauidau ai karaia dalana be idauidau. Nega haida taunimanima ese edia galasi idia daua toho heheni. Bona toasting ena hanamoa hereva ia gwauraia tauna ese ia hahedinaraia idia ura unai tau do ia moale, ia gorere lasi, ia noho daudau, eiava ma hereva haida do ia henia. Danu, idia noho taudia ma haida ese unai toasting ena hereva idia abia dae neganai, edia galasi do idia abia isi bona wain sisina do idia inua. Taunimanima momo idia laloa unai kara be dika lasi, ia be kastom eiava mauri dalana ta sibona, to Iehova ena Witnes taudia ese toasting idia karaia lasi ena badina namodia haida idia noho.

Iehova ena Witnes taudia idia ura taunimanima do idia moale bona idia mauri namo, unai dainai toasting karana idia karaia lasi ena badina be idau. Keristani ginigunana edia negai, hakaua orea ese kongrigeisen haida dekenai ia siaia revareva ena hereva dokona be inai hereva “namo do oi davaria,” “oi noho namo,” eiava “bamahuta” idia torea. (Kara 15:29) Tomadiho korikori taudia haida ese king taudia dekenai idia gwau: “Namona be egu lohia,  .  ia mauri daudau” eiava “King ia mauri daudau.”​—1 King 1:​31; Nehemia 2:3.

To, toasting ena kastom be edeseni amo ia vara? The Watchtower January 1, 1968 ese The Encyclopædia Britannica (1910), Volume 13, rau 121 ena hereva ia gwauraia: “Taunimanima be ‘namo do idia davaria’ totona, toasting idia karaia bona unai kastom be idaunegai tomadiho amo ia vara, idia ese galasi mai ena wain idia inua edia dirava hanamodia totona. Grik bona Roma taudia idia aniani neganai, wain idia bubua edia dirava hanamodia totona, bona tomadiho ena aria dekenai edia dirava bona mase taudia idia hanamodia totona wain idia inua.” Encyclopedia buka ma ia gwau: “Guna unai wain inua ena kastom be boubou bamona bona edia tomadiho karadia ida idia hatamonaia idia mauri noho taudia hanamodia totona.”

Unai kastom gunadia be hari mai anina, a? Lagani 1995 ena buka ta ladana International Handbook on Alcohol and Culture ia gwau: “Hari inai negai taunimanima ese [Toasting karana] idia do karaia noho, ena be idaunegai ena kastom amo ia mai bona unai negana ai taunimanima ese edia dirava hanamoa totona idia hahelagaia gaudia idia bouboulaidia: hegeregere rara eiava wain idia bouboulaia bona edia dirava dekenai idia guriguri bona idia noinoi henidia, idia gwau, do idia ‘mauri daudau!’ eiava ‘namo do idia davaria!’ totona.”

Momokani, ena be gau ta, toana ta eiava kara ta edia badina be idaunegai tomadiho koikoi amo idia vara, to Keristani momokani taudia ese unai kara haida idia karaia diba danu. Hegeregere, pomogranet ena huahua ita laloa. Baibel encyclopedia ta ia gwau: “Idaunegai tomadiho koikoi lalodiai pomogranet be helaga gauna bamona idia gaukaralaia.” To, Dirava ese taunimanima ia hamaorodia, helaga taudia edia dabua ena henuna kahana ena isena ai, kotini varo amo pomogranet toana do idia turia totona, danu Solomona ena dubu lalonai, du edia ataiai kahana ia hagegea kopa gaudia dekenai, pomogranet idia noho. (Esodo 28:33; 2 King 25:17) Ma danu, guna headava ena rini be mai anina tomadiho dekenai. To hari taunimanima momo be unai idia diba lasi, idia laloa headava ena rini ese ia hahedinaraia ta be ia headava.

Tomadiho karana lalonai wain idia gaukaralaia be edena bamona? Hegeregere, nega ta ai, Bala idia tomadiho henia Sekema taudia ese “edia dirava ena dubu lalonai idia vareai bona idia aniani bona idia inuinu bona Abimeleka idia gwauraia dika,” unai be Gideona ena natuna. (Hahemaoro Taudia 9:22-28) Oi laloa Iehova dekenai ia abidadama henia tauna ta ese idia ida ia inuinu bona dirava ta ia noia Abimeleka do ia haorea totona, a? Nega ta Amosa be Israela taudia momo ese Iehova idia dadaraia karana ia herevalaia neganai, ia gwau: “Idia be boubou pata ta ta vairanai idia hekure; bona ogogami taudia amo idia abia moni idia gaukaralaia wain idia hoia bona edia dirava edia dubu dekenai wain idia inua.” (Amosa 2:8) Tomadiho momokani taudia ese unai kara lalonai do idia vareai, herevana wain idia bubua edia dirava idia hanamodia totona eiava wain idia inua sibona, a? (Ieremia 7:​18) Eiava tomadiho momokani tauna be galasi mai ena wain do ia abia isi bona dirava ta ia noia tau ta ena dina vairai do ia hanamoa totona, a?

Inai oi laloa, nega haida Iehova idia tomadiho henia taudia gunadia ese edia imana idia abia isi bona idia noinoi, namo do idia davaria totona. Edia imana idia abia isi Dirava momokanina dekenai. Baibel ia gwau: “Solomona be Iehova ena boubou patana vairanai ia gini . . . bona ena imana ia kehoa bona guba dekenai ia abia isi; bona ia gwau: ‘Iehova, Israela ena Dirava e, Dirava ta be oi bamona lasi, . . . mani emu noho gabuna guba amo do oi kamonai, oibe, mani oi kamonai bona edia dika oi gwauatao.’” (1 King 8:​22, 23, 30) Unai hegeregerena, “Esera ese . . . Iehova . . .ia hanamoa, unai dainai taunimanima ibounai idia gwau, ‘Amen! Amen!’ bona edia imana idia abia isi. Bena Iehova dekenai idia goru diho.” (Nehemia 8:6; 1 Timoteo 2:8) Ia hahedinaraia goevagoeva, unai abidadama taudia ese guba dekenai edia imana idia abia isi lasi laki diravana dekena amo hahenamo idia abia totona.​—Isaia 65:11.

Hari inai negai, toasting idia karaia neganai, reana taunimanima idia laloa lasi dirava ta idia noia hahenamo do idia abia totona, danu idia laloa lasi dahaka dainai edia galasi guba dekenai idia abia isi. Ena be unai kara ena anina idia laloa lasi, to Keristani momokani taudia ese unai kara ena anina idia diba dainai edia kara idia tohotohoa lasi.

Taunimanima momo idia diba idia karaia karadia haida be Iehova ena Witnes taudia ese idia karaia lasi. Hegeregere, taunimanima momo be gavamani ese idia hahelagaia gaudia eiava pepe idia hanamoa, to idia laloa unai be tomadiho karana lasi. Keristani momokani taudia ese edia kara idia koua toho lasi, to unai kara lalonai idia vareai lasi. Bema unai bamona hebou ena nega idia diba, Witnes taudia momo idia hegaegae idia lao lasi totona. Badina idia ura lasi taunimanima idia habadua. Danu, edia lalona idia hadaia vadaeni gavamani hanamoa karadia idia karaia lasi totona, badina Baibel ena hereva idia badinaia. (Esodo 20:​4, 5; 1 Ioane 5:​21) Hari inai negai, taunimanima momo be reana idia laloa lasi toasting be tomadiho karana. To, Keristani momokani taudia ese unai idia karaia lasi ena badina namodia idia noho, badina idia diba ia be tomadiho karana ta. Bona hari danu taunimanima be ‘guba’ amo hahenamo idia ura abia, hegeregere idia ura aneru ena siahu amo heduru idia tahua totona.​—Esodo 23:2.