1. Dahaka dainai hari inai negai ruma bese naria gaukarana be auka?

 INAI tanobada ena toana ia idau ia lao. (1 Korinto 7:31, NW) Unai hereva be lagani 1,900 bona ma haida gunanai idia torea, bona hari inai negai ia guguru momokani! Gau idauidau be idia idau idia lao, bona ruma bese maurina ia idau momokani. Lagani 40 o 50 gunanai taunimanima ese idia karaia karadia be hari idia abia dae lasi. Unai dainai, ruma bese naria namonamo karana ena hekwarahi be bada. To, bema Baibel ena sisiba umui badinaia, unai hekwakwanai do umui hanaia diba.

2. Dahaka karadia dainai ruma bese be moni dalanai idia hekwarahi?

² Hari inai negai taunimanima momo idia laloa ruma bese maurina ia namo sibona be hegeregere lasi. Bisinesi taudia ese gau idauidau idia havaraia bona taunimanima edia lalona veria totona hoihoi gaudia hahedinaraia karana idia gaukaralaia namonamo dainai, tama bona sina milioni momo ese unai gaudia idia hoia diba totona hora momo lalonai moni gaukara idia karaia. Ma milioni haida be dina ta ta ibounai idia hekwarahi bada, edia ruma bese ena aniani sibona idia abia totona. Hora momo lalonai moni gaukara idia karaia, guna bamona lasi, bona reana moni gaukara rua idia karaia, mauri durua gaudia idia abia diba totona. Bona ma haida idia moale bema moni gaukara do idia davaria, badina gaukara be lasi dainai momo idia hekwarahi bada. Oibe, hari inai negai ruma bese maurina be auka, to Baibel ena hakaua herevadia ese ruma bese idia durudia diba, hekwakwanai momo lalodiai idia kwalimu totona.

3. Aposetolo Paulo ese edena hakaua herevana ia gwauraia hedinarai, bona ta ese unai ia badinaia neganai edena bamona unai ese do ia durua ena ruma bese ia naria namonamo totona?

 ³ Aposetolo Paulo be moni ena hekwarahi ia diba. Unai ia hanaia toho lalonai, gau namona ta ia dibaia, bona ena turana Timoteo ia tore henia neganai, unai gauna ia herevalaia. Paulo ia gwau: “Gau ta tanobada dekenai ita abia mai lasi, bona gau ta danu do ita abia lao lasi. Unai dainai bema ita be mai iseda aniani bona dabua neganai, moni dekenai ita laloa momo lasi be namo.” (1 Timoteo 6:7, 8) Momokani, ruma bese ese aniani bona dabua sibona ia abia be hegeregere lasi. Noho gabuna danu ia abia be namo. Natudia ese edukeisen idia abia be namo. Bona medikol gaudia bona gau ma haida be mai edia davana. To, Paulo ese ia gwauraia hakaua herevana ita badinaia diba. Bema iseda ura gaudia ita tahua momo lasi to iseda dabu gaudia ita abia toho, mauri be do ia auka momokani lasi.

4, 5. Laloa guna bona palani karaia karadia ese ruma bese naria gaukarana be edena bamona idia durua?

⁴ Ita ia durua hakaua herevana ma ta be Iesu ena haheitalai ta lalonai ita duahia. Ia gwau: “Bema tau ta ia ura kohoro ruma do ia haginia, ia be guna do ia helai diho, bona haginia ena davana do ia laloa, bema ia be ruma do ia karaia haorea diba, o lasi?” (Luka 14:28) Iesu ese laloa guna, palani karaia karana, ia herevalaia. Karoa gunana ai ita itaia vadaeni, edena bamona unai kara ese headava idia laloa tatau bona hahine matamatadia ia durua diba. Bona idia headava murinai, unai kara ese ia durudia, ruma bese idia naria totona. Unai kara lalonai, laloa guna karana ena anina be moni gaukaralaia dalana umui laloa guna, ia noho monina be mai aonega ida do umui gaukaralaia dalana umui laloa guna. Unai dala ai ruma bese ese ena moni gaukaralaia dalana ia biagua diba, dina ta ta eiava pura ta ta lalonai mauri durua gaudia totona do idia gaukaralaia monina idia atoa siri, bona gau idauidau idia hoia kava lasi.

⁵ Tano haida ai, moni gaukaralaia dalana laloa guna  ena anina be anina bada lasi gaudia hoia totona abitorehai mai ena atoa kau monina badana idia abia lasi. Ma gabu haida ai, ena anina be kredit kadi gaukaralaia dalana idia biagua auka. (Aonega Herevadia 22:7) Reana ena anina ma ta be gau idauidau idia hoia haraga karana—hegeregere idia hoia ena namo eiava idia hoia dainai do idia vara hekwakwanai idia laloa lasi, to idia hoia sibona karana—idia dadaraia. Danu, moni gaukaralaia dalana laloa guna karana ese ia hahedinaraia ta sibona ena ura hagugurua totona laki gadara, kuku ania, bona inuinu kekero karadia dekenai moni ia negea kava dainai, ruma bese lalonai moni ena hekwarahi ia bada ia lao, bona unai bamona kara amo Baibel ena hakaua herevadia idia utua danu.—Aonega Herevadia 23:20, 21, 29-35; Roma 6:19; Efeso 5:3-5.

6. Dahaka hereva momokanidia Baibel lalonai ese ogogami taudia idia durua diba?

⁶ To idia ogogami momokani taudia be edena bamona? Bema idia diba inai tanobada hegegemadai hekwakwanai be do ia noho hanaihanai lasi, reana unai ese edia lalona ia hagoadaia. Kahirakahira do ia vara tanobada matamatana ai, Iehova ese ogogami bona taunimanima idia hahisia gaudia ibounai do ia haorea. (Salamo 72:1, 12-16) Unai idia naria noho lalonai, Keristani taudia momokanidia, ena be idia ogogami momokani, to idia daradoko lasi, badina idia ese Iehova ena gwauhamata idia abidadama henia, ia gwau: “Lau ese umui do lau negea lasi, bona umui do lau rakatania lasi. Lasi bona lasi momokani.” Unai dainai, abidadama tauna be mai ena lalo-goada ida ia gwau diba: “Lohiabada be lauegu durua Tauna, lau be lau gari diba lasi.” (Heberu 13:5, 6) Hari inai nega aukana lalonai, Iehova ese ia idia tomadiho henia taudia be dala momo ai ia durudia, bema idia ese ena hakaua herevadia idia badinaia bona edia mauri lalonai Basileia idia tahua guna. (Mataio 6:33) Idia momo ese aposetolo Paulo ena hereva idia hamomokania diba bona idia gwau: “Gabu ibounai, nega ibounai, lau  boga kunu o lau hitolo, be lau laloa momo lasi. Bona lauegu gau be momo, o hegeregere lasi neganai, egu lalona ia namo noho. [Iehova] ese lau ia hasiahua, vadaeni gau ibounai lau goadalaia diba.”—Filipi 4:12, 13.

7. Edena hereva Iesu ese ia gwauraia, bema ta ese ia badinaia neganai ia do ia durua ena ruma bese ia naria namonamo totona?

⁷ Ena tanobada maurina ena dokona ai, Iesu ia gwau: “Oiemu badibadinai tauna dekenai oi lalokau henia, oi sibona oi lalokau henia bamona.” (Mataio 22:39) Unai sisiba be ruma bese lalonai umui badinaia ese ruma bese naria karana ia durua bada. Momokani, ita ida idia noho taudia—tatau bona hahine, tama sina bona natudia—be  ita lalokau henia dekena taudia korikoridia, ani? Edena dala ai ruma bese taudia ese lalokau idia hahedinaraia diba?

8. Edena dala ai ruma bese taudia ese lalokau idia hahedinaraia diba?

⁸ Dala ta be, ruma bese taudia ta ta iboudiai ese ruma gaukara haida idia karaia. Unai dainai, namona be natudia umui hadibaia idia gaukaralaia gaudia, herevana idia be dabua o gadara gaudia, be edia gabu dekenai idia atoa lou. Daba ta ta iboudiai bedi umui hanamoa karana ese emui nega sisina ia abia bona ia be mai ena hekwarahi, to ruma bese naria gaukarana ia durua bada. Momokani, reana nega haida gau maragidia be edia gabu ai idia noho lasi, to umui ibounai umui gaukara hebou diba, ruma ena toana ia namo totona, bona aniani murinai mereki umui huria totona. Lahedo, sibona ena ura laloa bada, bona gaukara ura henia lasi karadia ese iboudiai edia hemami idia hadikaia. (Aonega Herevadia 26:14-16) To, moale bona gaukara ura henia karadia ese ruma bese idia hagoadaia. “Mai moale danu ia henia tauna be Dirava ese ia lalokau henia.”—2 Korinto 9:7.

9, 10. (a) Nega momo ruma bese lalonai hahine ese dahaka maduna ia huaia, bona edena dala ai haida ese idia durua diba? (b) Ruma gaukara laloa dalana maorona be dahaka?

⁹ Hebogahisi bona lalokau karadia ese ruma bese haida lalonai ia noho hekwakwanai badana idia koua diba. Idaunega amo ema bona hari sinana ese ruma gaukaradia momo idia karaia. Idia ese natudia idia naria, ruma idia hagoevaia, dabua idia huria, bona aniani idia hoia bona idia nadua. Tano haida ai, kastom hegeregerena hahine be uma gabu dekenai idia gaukara danu, uma ena huahua be maketi dekenai idia hoihoilaia, eiava dala ma haida ai ruma bese ena moni idia habadaia. Gabu momo ai, ogogami dainai hahine danu be moni gaukara idia tahua, ena be guna unai bamona idia karaia lasi. Unai gaudia idia karaia goadagoada hahinedia ita hanamoa be namo. Baibel ese ia herevalaia “hahine namona” hegeregerena, ena dina be gaukara idauidau amo ia honu. “Iena  famili ia naridia namonamo noho.” (Aonega Herevadia 31:10, 27) To, ita gwau lasi unai ena anina be hahine sibona be ruma lalonai do ia gaukara. Tau bona hahine be dina ibounai moni gaukara idia karaia murinai, hahine sibona ese ruma gaukara do ia karaia bona ena tau bona ruma bese taudia ma haida be idia laga-ani sibona be namo, a? Lasi momokani. (2 Korinto 8:13, 14 itaia.) Unai dainai, bema sinana ese aniani ia hegaegaelaia, reana do ia moale bema ruma bese taudia ma haida ese ena gaukara idia durua, hegeregere teibolo dekenai mereki bona ma gaudia haida idia atoa, sitoa dekenai idia lao, eiava ruma idia hagoevaia sisina. Oibe, ibounai be unai maduna idia huaia diba.—Galatia 6:2 itaia.

¹⁰ Reana haida idia gwau: “Egu gabu dekenai, tatau be unai bamona gaudia idia karaia lasi.” Reana unai be momokani, to unai gauna do umui laloa be namo, ani? Iehova Dirava ese ruma bese ia havaraia neganai, ia gwau lasi gaukara haida be hahine sibona edia gaukara. Nega ta, Iehova ena hesiai anerudia ese abidadama tauna Aberahamo idia vadivadi henia neganai, Aberahamo danu be vadivadi taudia totona aniani hegaegaelaia bona henia gaukarana ia karaia. (Genese 18:1-8) Baibel ese inai sisiba ia henia: “Namona be tatau ese edia adavana do idia lalokau henia, idia edia tauanina idia lalokau henia hegeregerena.” (Efeso 5:28) Bema, dina ena dokona ai, tau ia hesiku bona ia ura laga-ani, hahine danu be unai mamina ia abia, reana ia hesiku bada herea, ani? (1 Petero 3:7) Unai dainai, tau danu ese ruma dekenai gaukara haida ia karaia be maoro bona unai be lalokau karana, ani?—Filipi 2:3, 4.

11. Edena dala ai Iesu ese haheitalai namona ia hahedinaraia ruma bese taudia iboudiai dekenai?

¹¹ Iesu ese Dirava bona ia idia bamoa taudia ia hamoalea karana ia hahedinaraia namo herea. Ena be ia headava lasi, to Iesu be haheitalai namona tatau dekenai, bona hahine bona natudia dekenai danu. Ia ese sibona ia gwauraia, ia gwau: “Taunimanima ena Natuna bamona,  ia mai lasi taunimanima ese iena hesiai gaukara do idia karaia totona, to ia be taunimanima edia hesiai gaukara karaia totona ia mai.” (Mataio 20:28) Bema ruma bese taudia ibounai be unai bamona lalohadai idia badinaia, do idia moale momokani!

12. Iehova ia ura ena hesiai taudia ese dahaka idia karaia?

¹² Ruma bese naria gaukarana ai ita ia durua diba Baibel ena hakaua herevana ma ta be 2 Korinto 7:1 ai ia noho. Ia gwau: “Tauanina bona lauma hamiroa karadia ibounai do ita hadokoa, bona iseda mauri ita hagoevaia be namo.” Unai hereva, Iehova ese ena lauma amo ia havaraia hereva, idia badinaia taudia be Iehova ese ia abia dae, badina ia ura “Keristani tauna ena kara [be] goevagoeva bona momokani.” (Iamesi 1:27) Bona edia ruma bese be unai dainai hahenamo do ia abia.

13. Ruma bese naria gaukarana lalonai dahaka dainai goeva karana be gau badana?

¹³ Hegeregere, Baibel ese ita ia hadibaia dina ta ai gorere  be do ia ore. Unai nega lalonai, “idia noho taudia ta ese do ia gwau lasi, ‘Lau be gorere.’ ” (Isaia 33:24; Apokalupo 21:4, 5) To, ela bona unai nega, ruma bese ibounai ese nega haida gorere do idia haheaukalaia. Paulo bona Timoteo danu idia gorere. (Galatia 4:13; 1 Timoteo 5:23) To, mai edia diba bada doketa taudia idia gwau gorere momo ita koua diba. Aonega ruma besedia ese gorere haida idia abia lasi bema tauanina bona lauma dalanai idia goeva. Mani ita tahua edena bamona idia karaia.—Aonega Herevadia 22:3 itaia.

14. Kara goeva ese gorere amo ruma bese be edena bamona ia gimaia?

¹⁴ Lauma dalanai ita goeva ena anina ta be iseda kara ia goeva. Taunimanima momo idia diba, Baibel ese kara maoromaoro taravatudia ia abia isi bona headava murimurinai idia karaia mahuta hebou karadia ibounai ia gwauraia dika. “Lebulebu taudia, . . . heudahanai taudia, o lebulebu hahine edia kara bamona idia karaia tatau, o tatau ese tatau danu hemarai karadia idia karaia taudia . . . ta lasi be Dirava ena Basileia do ia davaria diba.” (1 Korinto 6:9, 10) Hari inai tanobada dikana lalonai idia noho Keristani taudia ese unai taravatu idia badinaia namonamo be gau badana. Unai kara amo Dirava idia hamoalea bona edia ruma bese idia gimaia, badina pokese goreredia, hegeregere AIDS, syphilis, gonorrhea, bona chlamydia idia abia lasi.—Aonega Herevadia 7:10-23.

15. Tauanina dalanai goeva lasi karana ta oi gwauraia, ia dainai gorere idia vara diba.

¹⁵ ‘Tauanina hamiroa karadia ibounai idia hadokoa’ karana ese ruma bese ia durua gorere ma haida idia abia lasi totona. Gorere momo idia vara, badina taunimanima be tauanina dalanai idia goeva lasi. Unai kara badana ta be kuku ania karana. Kuku ania karana ese baragi, dabua, bona hodahoda ia hamiroa sibona lasi, to ia dainai taunimanima idia gorere. Lagani ta ta iboudiai taunimanima milioni momo idia mase, badina kuku idia ania. Mani oi laloa; bema unai ‘tauanina hamiroa karana’ idia  dadaraia, lagani ta ta ibounai unai taunimanima milioni momo be idia gorere lasi bona idia do buruka lasi neganai do idia mase lasi!

16, 17. (a) Iehova ese dahaka taravatu ia henia, gorere haida amo Israela taudia ia gimaia totona? (b) Edena dala ai ruma bese ibounai be Deuteronomi 23:12, 13 ese ia hahedinaraia hakaua herevana idia badinaia diba?

¹⁶ Kara ma ta mani oi laloa. Lagani 3,500 bamona gunanai, Dirava ese Israela taudia dekenai ena Taravatu ia henia, edia tomadiho dalana hegaegaelaia totona, bona unai ese edia dina ta ta maurina ia durua danu. Unai Taravatu ese unai bese taudia ia gimaia dainai gorere haida idia abia lasi, badina tauanina dalanai idia goeva totona taravatu haida ia gwauraia. Unai taravatu ta ese kukuri negea karana ia herevalaia. Ia gwau dala maorona ai kamepa murimurinai kukuri idia guria, taunimanima idia noho gabuna ia hamiroa lasi totona. (Deuteronomi 23:12, 13) Unai idaunegai taravatuna be sisiba namona hari danu. Hari inai negai danu taunimanima  idia gorere bona idia mase, badina unai taravatu idia badinaia lasi. a

¹⁷ Israela taudia edia taravatu ese ia hahedinaraia hakaua herevana hegeregerena, namona be ruma bese ena digudigu bona mei rumana—herevana ia be ruma lalonai eiava murimuri ai—be ia goeva bona muramura amo gaigai maragidia idia hamasea be namo. Bema mei rumana ita hagoevaia lasi bona ita koua lasi, lao be do idia vareai bona gaigai maragidia be ruma ena kahana ma haida dekenai do idia abia lao—iseda aniani dekenai danu! Namona be natudia bona taunimanima badadia be unai gabu dekenai idia lao murinai, edia imana idia huria. Bema idia huria lasi, edia kopina dekenai gaigai maragidia do idia mailaia. France ai doketa ta ia gwau, imana huria karana “be do kara hereadaena bogana, baragi, bona kopina ai ita abia diba goreredia koua totona.”

18, 19. Dahaka sisiba idia noho, ogogami gabudia dekenai idia noho taudia edia ruma idia goeva totona?

¹⁸ Momokani, ogogami gabudia dekenai idia noho taudia idia goeva noho be mai ena hekwarahi. Unai bamona gabudia ia diba momo tauna ta be ia gwau: “Siahu bada ese hagoevaia gaukarana ena metau ia habadaia. Lai badadia idia mailaia kahu ese noho rumana ena kahana ibounai ia koua, pauda koremana bamona. . . . Siti, bona siti murimurinai danu, taunimanima momo herea idia noho dainai gorere momo idia vara. Koupa mai edia ranu mirona, ta ese ia kokia lasi momoru bada, taunimanima iboudiai idia gaukaralaia mei rumadia mirodia, gorere idia havaraia bita, pitopito, bona lao be momo herea.”

¹⁹ Unai bamona noho gabuna dekenai ita goeva noho be mai ena hekwarahi. To, unai hekwarahi be mai ena namo. Sopu bona ranu bona hekwarahi sisina edia davana  be maragi, to muramura bona hospital edia davana be bada. Bema unai bamona gabu dekenai umui noho, namona be umui karaia diba hegeregerena, sibona emui ruma bona gabu umui hagoevaia bona tano amo animal edia kukuri umui kokia. Bema medu negana lalonai, emui ruma dekenai ia lao dala maragina dekenai kopukopu be bada, umui ese nadinadi eiava nadi badadia haida umui atoa diba, kopukopu be ruma lalonai ia vareai lasi totona, a? Bema umui ese tamaka eiava silipasi umui gaukaralaia, ruma lalonai umui do vareai lasi neganai umui kokidia diba, a? Danu, namona be ranu umui abia gabuna umui naria, hamiroa gaudia idia vareai lasi totona. Idia gwau lagani ta ta taunimanima milioni rua be idia mase, badina ranu be ia miro bona edia goeva karana idia naria namonamo lasi.

20. Ruma do ia goeva totona, daidia ese maduna idia huaia?

²⁰ Namona be ruma ia goeva totona iboudiai—sinana, tamana, natudia, bona vadivadi taudia—idia hekwarahi be namo. Kenya dekenai sinana ta mai ena natudia 8 ia gwau: “Iboudiai ese edia kahana idia karaia.” Noho rumana ia goeva ese ruma bese ena toana namona ia hahedinaraia. Spain taudia edia aonega herevana ta ia gwau: “Ogogami bona goeva idia noho hebou diba.” Herevana ta be ruma badana ai, ruma maragina ai, eiava biri rumana ai ia noho, to ia goeva dainai gorere momo do ia koua diba.

21. Aonega Herevadia 31:28 ena hereva hegeregerena, dahaka ese ruma bese ena moale ia havaraia diba?

²¹ Aonega Herevadia bukana ese hahine namona ia herevalaia neganai, ia gwau: “Iena natuna ese ia idia tanikiu henia noho, bona iena adavana ese, ia dekenai ia hanamoa henia noho.” (Aonega Herevadia 31:28) Edena negai oi ese oiemu ruma bese tauna ta oi hanamoa? Momokani, ita be siahu ia matamaia neganai idia noho tubutubu gaudia bamona, siahu sisina bona ranu idia abia neganai, palaoapalaoa idia havaraia. Ita ese hanamoa hereva namodia ita abia be namo. Unai ese hahine ia durua bena ia  diba ena tau ese ena gaukara bona naria karana mai ena lalokau ia laloa bada bona ia laloaboio lasi. (Aonega Herevadia 15:23; 25:11) Bona hahine ese ena tau ena gaukara ruma murimurinai bona lalonai dainai ia hanamoa be namo. Danu, bema ruma ai, sikuli ai, eiava Keristani kongregesen ai natudia idia gaukara goada dainai, tama sina ese idia hanamodia neganai, do idia moale. Bona tanikiu karana maragina ese namo bada herea ia havaraia! Inai hereva “Tanikiu” oi gwauraia ena hekwarahi be bada lasi, to ruma bese lalonai ia havaraia namo be bada.

22. Dahaka be gau badana ruma bese ia “goada noho” totona, bona edena dala ai unai do ia vara?

²² Badina momo dainai, ruma bese naria gaukarana be auka. To, umui karaia diba. Baibel ena aonega herevana ta ia gwau: “Aonega bona laloa kehoa tauna ese ruma ia haginia noho, bona iena famili idia tubu goada noho.” (Aonega Herevadia 24:3) Umui ese aonega bona lalo-parara umui abia bema ruma bese taudia ibounai ese Dirava ena ura idia dibaia bona idia badinaia totona idia hekwarahi. Ruma bese lalonai moale umui davaria totona umui hekwarahi be namo, ani!