Karoa 49

Galilea ai Ia Haroro Lou

LAGANI rua bamona lalodiai Iesu ia haroro goadagoada, bena unai murinai ia laga-ani sisina, a? Lasi, ena haroro gaukarana ia habadaia; ia lao Galilea, ena nega ihatoina unai. Hanua badadia bona hanua maragidia dekediai ia lao, edia dubu lalodiai ia hadibadia bona Basileia ena sivarai namona ia harorolaia. Unai laolao ihatoina ai ia itaia gaudia dainai, ia diba namona be ena haroro gaukarana ia habadaia.

Iesu ia loaloa gabudia ai, ia itaia hutuma be lauma dalana ai idia gorere bona idia lalohisihisi. Ia bogadia hisi, badina idia be mai edia bero, bona idia lao idau gabu idau gabu dekenai, mamoe mai edia naria tauna lasi bamona. Bena ena hahediba taudia ia hamaorodia, ia gwau: “Uiti ena anina abia negana ia ginidae vadaeni, to utua taudia be momo lasi. Uma ena biaguna dekenai umui noinoi, ia ese utua taudia ma haida do ia siaia, iena uiti do idia utua.”

Iesu be mai ena palani, unai dainai ena aposetolo 12, lagani ta gunanai ia abidia hidi taudia, ia boiridia, bena ia haridia, orea 6, rua rua amo do idia lao haroro totona. Ia hamaorodia, ia gwau: “Bese idauidau taudia dekenai do umui lao lasi, bona Samaria taudia edia hanua ta dekenai do umui raka vareai lasi. To Israela besena dekenai umui lao, idia be idia boio vadaeni mamoe bamona. Umui raka noho neganai do umui haroro, umui gwau, ‘Guba Basileia be kahirakahira ia mai vadaeni.’ ”

Unai Basileia be Iesu ese guna ia gwauraia, guriguri dalana ia hadibadia neganai. Basileia be ia kahirakahira, anina be, Dirava ese ia abia hidi Pavapavana, Iesu Keriso, be edia huanai ia noho. Iesu ese ena hahediba taudia siahu ia henidia, gorere taudia hamauridia totona bona mase taudia hatoredia isi lou totona, unai amo do idia hahedinaraia diba, idia be unai guba gavamanina ena gwaukau taudia. Ia hamaorodia unai gaukara do idia karaia davana lasi.

Unai murinai ia hamaorodia, edia laolao totona tauanina durua gaudia do idia abidia hegaegae lasi; ia gwau: “Umui emui pusepuse lalonai moni badadia o maragidia do umui udaia lasi. Dala dekenai laolao pusena, dabua rua, tamaka, raka au, do umui abia lao lasi. Badina be gaukara tauna ena aniani idia henia be maoro.” Iesu ia diba, idia harorolaia sivaraina idia moalelaia taudia ese aniani bona mahuta gabudia do idia henidia. Unai dainai ia gwau: “Hanua maragina ta dekenai o hanua badana ta dekenai do umui ginidae neganai, kara namona tauna ta do umui tahua. Vadaeni ia dekenai do umui noho ela bona unai gabu umui rakatania.”

Bena Iesu ese ruma taudia hedavari henidia dalana maorona ia hadibadia, ia gwau: “Ruma dekenai umui raka vareai neganai be do umui hanamoa. Bona bema ruma taudia idia namo, umui emui hanamoa be idia latanai do umui atoa. To bema idia dika, umui emui hanamoa do umui abia lou. To bema ruma taudia o hanua taudia idia abia dae lasi umui, emui hereva idia kamonai lasi, unai gabu umui rakatania, bona emui aena dekenai ia noho momoru umui negea oho unuseni.”

Iesu ia gwau, edia hereva do ia dadaraia hanuana ese hahemaoro metauna do ia davaria. Ia gwau: “Umui lau hamaoroa momokani, Kota henia dinana neganai Sodoma bona Gomora edia dika davana be maragi, to unai hanua ena dika davana be do ia bada.” Mataio 9⁠:35–10⁠:15; Mareko 6⁠:​6-12; Luka 9⁠:​1-5.

▪ Edena negai Iesu ese ena laolao ihatoina Galilea ai ia hamatamaia, bona unuseniai ia itaia gaudia dainai dahaka ia diba?

▪ Ena aposetolo 12 be haroro totona ia siaidia lao neganai, dahaka hahegani ia henidia?

▪ Idia gwau Basileia be ia kahirakahira; dahaka dainai unai bamona idia hereva be maoro?