Karoa 6

Gwauhamata Merona

IOSEF bona Maria be Betelehem dekenai idia noho, bena Iesu ena vara dinadia namba 8 ai, Dirava ese Mose ia henia Taravatuna hegeregerena ena kopina idia utua, bona Israel taudia edia kastom hegeregerena ena ladana idia hatoa. Iena ladana idia hatoa Iesu, guna aneru Gabriel ese ia hamaorodia hegeregerena.

Unai murinai, Iesu ena dina be 40 neganai, idia ese Ierusalem ena dubu dekenai idia laohaia, unai be dala daudauna lasi. Dirava ena Taravatu be, bema hahine ese mero ia abia, dina 40 murinai sibona hagoevaia boubou gauna do ia abia lao dubu dekenai.

Maria be unai bamona ia karaia. Manu maragidia rua sibona ia laohaia, iena boubou gauna unai. Unai ese ia hahedinaraia Iosef bona Maria be moni momo taudia lasi. Mose ena Taravatu be inai: Hahine ese mamoe matamatana ta, iena davana ese manu edia davana ia hanaia momokani gauna, do ia bouboulaia, to bema ena moni be hegeregere lasi, manu rua, kerea o pune, do ia bouboulaia be hegeregere.

Dubu lalonai tau burukana ta ladana Simeon ese Iesu ia abia, ia rosia. Dirava ese ia hamaoroa vadaeni, do ia mase lasi ela bona Iehova ena gwauhamata Mesiana, Keriso, do ia itaia. Unai dina ai Simeon be dubu lalonai ia vareai neganai, lauma helaga ese ia hakaua Iosef bona Maria edia natuna dekenai.

Simeon ese Iesu ia rosia neganai, Dirava ia tanikiu henia, ia gwau: “Lohiabada e, oiemu hesiai tauna harihari mase dekenai mai maino danu do lau lao, oiemu gwauhamata hegeregerena. Badina be egu matana ese oiemu hahemauri ia itaia vadaeni. Oi ese oi karaia hegaegae vadaeni taunimanima ibounai edia vairana dekenai. Ena diarina be inai, bese idauidau dekenai diari henia totona. Bona ia ese hairai bada oiemu bese Israela taudia dekenai do ia henia.”

Iosef bona Maria ese ena hereva idia hoalaia. Bena Simeon ese ia hanamodia bona Maria dekenai ia gwau: “Inai mero Iesu ese Israela taudia momo do ia hamorua, bona momo do ia hatorea isi. . . . To lalohisihisi ese kaia bamona emu lalona do ia gwadaia.”

Unai neganai peroveta hahinena ta danu ia noho, ena ladana be Ana. Iena lagani be 84, bona dubu dekenai ia noho hanaihanai. Unai hora ai ia raka kahirakahira, bena Dirava ia hanamoa bona Iesu ena sivarai be kamonai taudia iboudiai ia hamaorolaidia.

Iosef bona Maria ese dubu dekenai idia vara gaudia idia moalelaidia bada! Momokani, unai gau ese idia hamomokania edia natuna be Dirava ena Gwauhamata Tauna. Luka 2:​21-38; Levitiko 12:​1-8.

▪ Vaia edia kara hegeregerena, edena negai Israel merona ena ladana idia hatoa?

▪ Ena natuna merona ena dina be 40 neganai, Israel hahinena ese dahaka ia karaia, bona Maria be unai ia karaia neganai, edena bamona ia hahedinaraia ia ogogami?

▪ Unai neganai daika daika idia diba Iesu be Mesia, bona edena bamona idia hahedinaraia unai idia diba?