Karoa 86

Ia Boio Merona ena Sivarai

IESU ese parabole rua, mamoe ia boio ena sivarai bona moni ia boio ena sivarai, be Farisea taudia ia henidia murinai, ma parabole ta ia henidia. Lalokau tamana ta bona ena kara ena natuna memero rua dekediai be ia herevalaia. Unai memero rua be mai edia kerere badadia.

Murinai ia vara merona ese ena tamana ia noia neganai, maoromaoro ena ahuna ia henia. Ena tamana ena ruma ia rakatania bena ia lao bona ia lebulebu bada. Mani Iesu ena sivarai oi kamonai bona oi laloa ia herevalaidia taudia ta ta ese daika daika idia laulaulaidia.

Iesu ia gwau: “Tau ta mai ena natuna rua. Murinai ia vara tauna ese ena tamana dekenai ia hereva henia, ia gwau, ‘Lauegu tamana e, iseda kohu mani oi haria, lauegu kahana lau oi henia.’ Vadaeni iena kohu ibounai idia ruaosi dekenai ia haria karaia.” Murinai ia vara tauna ese unai kohu dekenai dahaka ia karaia?

Iesu ia gwau: “Dina momo lasi idia ore, murinai ia vara tauna ese ena kohu ibounai ia haboua, vadaeni ia lao ena laolao dekenai, tano daudau dekenai ia lao, unuseni kara idauidau dekenai iena kohu ia halusia kava.” Ena moni be ariara hahinedia dekenai ia haorea. Gabeai nega dikana ia vara. Iesu ia gwau:

“Ena kohu idia ore neganai, unai tano dekenai hitolo bada ia vara. Ia be ia ogogami vadaeni. Vadaeni ia lao, unai tano tauna ta dekenai ia gaukara. Unai tau ese ia siaia, iena tano dekenai boroma do ia naria karaia. Vadaeni boroma edia aniani ia ura ania, ia boga kunu totona, badina be tau ta ese aniani taina ia henia lasi.”

Boroma naridia gaukarana be gaukara dikana ia dekenai, badina be Taravatu hegeregerena boroma idia goeva lasi! To mero ena lalona ia hahisia bada gauna be, ia hitolo mase dainai boroma edia aniani ia ura henia. Iesu ia gwau, unai dika bada herea ia davaria dainai “ena lalona ia kehoa.”

Iesu ma ia gwau, unai mero be sibona ena lalona dekenai ia gwau: “ ‘Egu tamana be mai ena hesiai taudia momo herea, mai edia davana, bona edia aniani momo idia noho. To lau be lau hitolo mase vadaeni. Lau toreisi, egu tamana dekenai do lau lao, do lau gwau, “Egu tamana e, lau be guba biaguna ena vairana dekenai bona oiemu vairana dekenai kerere lau karaia vadaeni. Lau be hegeregere lasi oiemu natuna do oi gwauraia, lau be emu hesiai tauna do oi halaoa, mai egu davana.” ’ Vadaeni ia toreisi, ena tamana dekenai ia lao.”

Mani inai oi laloa: Mero be ena tamana ena ruma ia rakatania neganai, bema ena tamana ese ia gwau dika henia, gabeai do ia ura lasi ena ruma do ia lou henia. Reana ia laloa ena tano korikori dekenai do ia giroa bona idau tauna dekenai gaukara do ia tahua, bena ena tamana vairanai do ia hemarai lasi. To unai bamona ia laloa lasi. Ia ura ena tamana ena ruma dekenai ia noho!

Unai tama, Iesu ena parabole lalonai, ese iseda lalokau bona hebogahisi Tamana guba dekenai, Iehova Dirava, ia laulaulaia. Bona ia boio merona ese kara dika taudia ia laulaulaidia. Iesu ese ia hereva henidia Farisea taudia ese guna Iesu idia gwauraia dika badina ia be unai bamona taudia ida idia aniani hebou. To vara guna natuna ese daidia ia laulaulaidia?

Ia Boio Merona Idia Davaria Neganai

Ia boio merona be ena tamana ena ruma dekenai ia giroa lao neganai, dahaka ia vara? Iesu ena hereva mani oi kamonai, ia gwau:

“Ia be dala dekenai ia lao noho, ruma dekenai ia raka lao neganai, daudau dekenai ena tamana ese ia itaia, vadaeni ia bogahisihisi henia, ia heau lao, ena aiona dekenai ia rosia, ia kisi henia.” Ia be hebogahisi bona lalokau tamana; iseda Tamana, Iehova, guba dekenai ia laulaulaia namo herea!

Reana tamana ese ena natuna ena lebulebu karadia edia sivarai ia kamonai vadaeni. To ena ruma dekenai ia abia dae haraga, ena hereva ibounai ia do kamonai lasi neganai. Iesu danu be unai bamona ia karaia; taunimanima ia dadaraidia lasi. Ia boio merona ese ia laulaulaidia taudia, kara dika taudia bona takisi gogoa taudia, dekediai ia lao bona ia hereva henidia.

Momokani, Iesu ese ia gwauraia tauna ese ena natuna ena vairana ia itaia neganai, ia diba ia helalo-kerehai vadaeni. Mai ena lalokau ida ia abia dae dainai, ena natuna be sibona ena kara dikadia ia gwauraidia hedinarai. Iesu ia gwau: “Ena natuna ese ia hamaoroa, ia gwau, ‘Egu tamana e, lau be guba biaguna ena vairana dekenai bona oiemu vairana dekenai kerere lau karaia vadaeni, lau be hegeregere lasi oiemu natuna do oi gwauraia.’ ”

To kara haraga ena tamana ese ena hesiai taudia ia hamaorodia, ia gwau: “Dabua namo herea ta umui mailaia, iena tauanina dekenai umui atoa. Ena imana kwakikwaki gauna bona tamaka danu umui mailaia. Boromakau ena natuna, ubua gauna, umui mailaia, do umui alaia. Do ita aniani, do ita moale hebou. Badina be inai egu natuna ia mase, to ia mauri lou vadaeni, ia boio, to lau davaria vadaeni.” Bena “idia moale hebou.”

Unai ia vara neganai, “ia vara guna natuna be uma dekenai.” Sivarai orena oi kamonai neganai, mani oi laloa ia ese daidia ia laulaulaidia. Iesu ia gwau: “Ruma dekenai ia raka lao neganai gitara bona mavaru edia regena ia kamonai. Hesiai tauna ta ia boiria, unai rege ena badina ia nanadaia. Ia gwau, ‘Oiemu tadina ia giroa mai, vadaeni emu tamana ese boromakau ena natuna, ubua gauna, ia alaia vadaeni, badina ena natuna be mai mauri danu bona mai namo danu ia davaria lou dainai.’ To ia be ia badu, ruma dekenai ia raka vareai lasi. Ena tamana ia raka murimuri dekenai lalona ia hanamoa gwauraia. To ia ese ena tamana dekenai ia haere henia, ia gwau, ‘Lau be lagani momo oiemu hesiai gaukara lau karaia vadaeni, bona emu hereva ta lau utua lasi, to nega ta nani ena natuna ta oi henia lasi lau dekenai, nega ta lauegu turana danu inai bamona ai moale lasi. To inai emu natuna be idia loa kava hahine dekenai emu kohu ia haorea kava vadaeni, vadaeni ia giroa mai, oi ese boromakau ena natuna, ubua gauna, oi alaia vadaeni ia ena.’ ”

Unai vara guna natuna bamona, daidia ese kara dika taudia bogadia hisi karana idia maumauraia? Taravatu hadibaia taudia bona Farisea taudia ese, ani? Ia hedinarai goevagoeva vara guna natuna ese idia ia laulaulaidia, badina be Iesu ese kara dika taudia ia abidia dae dainai idia maumauraia neganai, inai parabole ia henidia.

Iesu ena sivarai dokonai, tama ese ena vara guna natuna ia hamaoroa, ia gwau: “Egu natuna e, oi be lau dekenai oi noho, lau dekenai gau ibounai be oiemu. To namo do ita moale, do ita moale bada herea. Badina be inai emu tadina ia mase, to ia mauri lou vadaeni, ia boio, to ita davaria vadaeni.”

Ena sivarai lalonai Iesu ia gwau lasi vara guna natuna be gabeai dahaka ia karaia. Iesu ia mase bona ia toreisi lou murinai, “dubu naria taudia momo danu Iesu ena dala idia abia dae.” Reana idia haida be “vara guna natuna” ese ia laulaulaidia taudia.

Hari inai negai unai memero ruaosi ese daidia idia laulaulaidia? Taudia be inai: Iehova ena ura idia diba dainai ia be edia tamana idia gwauraia. Ia vara guna natuna ese “orea maragi,” o “Dirava ena vara guna natuna taudia . . . edia ladana be guba dekenai idia torea vadaeni” taudia, haida ia laulaulaidia. Edia lalohadai be ia vara guna natuna ena lalohadai bamona. Idia ura lasi “mamoe idaudia haida,” tanobada ai mauri do idia abia taudia, idia abidia dae, badina idia laloa unai taudia ese edia hairai sisina idia abia oho.

Ia boio merona ese ia laulaulaidia taudia be inai: Dirava ena orea idia rakatania tanobada ena moale karadia idauidau moalelaidia totona. To gabeai, idia helalo-kerehai bena idia giroa mai bona Dirava ena hesiai gaukara idia karaia lou. Momokani, Dirava ese idia helalo-kerehai bona ia dekenai idia giroa mai taudia ia lalokau henidia bona ia bogadia hisi! Luka 15:​11-32; Levitiko 11:​7, 8; Kara 6:7; Luka 12:32; Heberu 12:23; Ioane 10:16.

▪ Iesu ese inai parabole be daidia ia henidia, bona dahaka dainai?

▪ Daika ia gwauraia momo inai parabole lalonai, bona dahaka ia vara ia dekenai?

▪ Unai tamana bona murinai ia vara natuna ese daidia idia laulaulaidia Iesu ena negai?

▪ Iesu ese parabole ai ia gwauraia hebogahisi tamana ena kara be edena bamona ia tohotohoa?

▪ Ena tamana ese ena tadina ia abia dae neganai, vara guna natuna be dahaka ia laloa, bona edena dala ai Farisea taudia ese ena kara idia tohotohoa?

▪ Iesu ena parabole ena anina be dahaka hari inai negai?