Karoa 5

Iesu ena Vara

ROMA Basileiana ena pavapava, Kaisara Augusto, ese oda herevana ta ia siaia lao, taunimanima iboudiai be edia ladadia torea totona ena hanua ena hanua do idia lou henia. Unai dainai Iosef be ena vara gabuna, Betelehem, ia lou henia.

Unai oda dainai taunimanima momo herea idia noho Betelehem dekenai. Iosef bona Maria be mahuta gabuna ta idia davaria diba lasi, boromakau bona doniki edia ruma ta sibona. Unuseniai Iesu ia vara. Maria ese dabua amo ia tarua, bena animal edia aniani mauana ta lalonai ia hahekurea.

Momokani, Dirava ena ura dainai Kaisara ese unai oda herevana ia halasia. Unai amo dala ia kehoa, Iesu be Betelehem dekenai do ia vara. Gunaguna, lagani 700 bamona idia do noho ela bona Iesu ia vara neganai, Baibel ia gwau gwauhamata lohiana be unai hanua dekenai do ia vara.

Unai hanuaboi be mai anina bada! Mamoe naria taudia haida be murimuri ai idia noho neganai, diari bada ese ia hagegedia, Iehova ena hairai diarina unai! Bena iena aneru ta ese ia hamaorodia, ia gwau: “Umui gari lasi, hereva namona lau mailaia vadaeni, taunimanima ibounai idia moale totona. Badina be hari inai dina, Davida ena hanua dekenai, umui emui Hamauria Tauna ia vara vadaeni, Keriso Lohiabada unai. Ena toana umui dekenai be inai. Mero maragina do umui davaria, boromakau edia aniani mauana dekenai ia hekure, dabua dekenai idia kumia.” Bena nega tamona aneru momo idia hedinarai, ane idia abia, idia gwau: “Atai momokani dekenai Dirava do ita hanamoa, bona tanobada dekenai be maino, Dirava ia moale henidia taudia ese inai maino do idia abia.”

Aneru ese idia rakatanidia murinai, mamoe naria taudia idia hereva heheni, idia gwau: “Ita lao Betelehema dekenai, Lohiabada ese ita dekenai ia hadibaia gauna do ita itaia.” Idia raka haraga, idia lao, aneru ese ia gwauraia gabuna dekenai Iesu idia davaria. Aneru ia hadibadia herevana idia gwauraia hedinarai neganai, idia kamonai taudia iboudiai idia hoa. Maria be unai hereva ibounai ia laloa bada bona ia laloatao.

Hari inai neganai taunimanima momo idia laloa Iesu be December 25 ai ia vara. To, Betelehem dekenai, December be keru bada bona medu negana. Unai hua lalonai mamoe naria taudia bona edia mamoe be hanuaboi ai murimuri ai idia noho lasi. Danu, unai neganai Iuda taudia momo ese Roma ena Kaisara idia badu henia, unai dainai do ia haganidia lasi keru bada negana lalonai do idia laolao, edia badu do ia habadaia garina. Iesu ena vara negana be October huana ena matamanai bamona. Luka 2:​1-20; Mika 5:2.

▪ Dahaka dainai Iosef bona Maria idia lao Betelehem?

▪ Iesu ia vara hanuaboina dekenai dahaka hoa gauna ia vara?

▪ Edena bamona ita diba Iesu be December 25 ai ia vara lasi?