Karoa 37

Iesu ese Vabu ta ena Lalohisihisi Ia Haorea

IESU ese tuari biaguna ena hesiai tauna ia hamauria bena ia lao Nain. Unai hanua be Kaperanaum ena diho kahanai, edia padana be kilomita 32 bamona. Iesu ena hahediba taudia bona taunimanima hutuma ese idia bamoa. Adorahi ai, Nain kahirakahia dekenai idia ginidae neganai, haida ida idia hedavari, mase tauna ta idia huaia lao idia guria totona.

Iena sinana ia lalohisihisi bada, badina be ia be vabu, bona unai tauhau be ena natuna tamona sibona. Iena tau ia mase neganai, ia dara doko lasi badina be ena natuna ia noho dainai. Iena mauri gabena ia laloa bada; ia dainai ia be mai ena helaro bona ia be mai ena ura bada ia dekenai. To ia mase neganai ena lalona hagoadaia tauna ta be lasi. Hanua taudia be ia ida gara gabuna dekenai idia raka lao neganai, ena lalohisihisi be bada herea momokani.

Iesu ese unai hahine ena lalohisihisi ia itaia neganai ia bogaia hisi, bena mai ena hebogahisi ida ia hereva henia, ia gwau: “Oi tai lasi.” Iesu ena kara bona ena hereva dainai taunimanima idia hoa. Mase patana dekenai ia raka kahirakahira bona ia dogoatao neganai, idia huaia taudia idia gini. Taunimanima iboudiai idia daradara badina be idia diba lasi ia be dahaka do ia karaia.

Momokani, Iesu idia bamoa taudia ese Iesu ena hoa karadia, gorere taudia hamauridia karadia, idia itadia vadaeni. To idia itaia lasi mase tauna ta ia hamauria. Unai ia karaia diba a? Mase tauna ia hereva henia, ia gwau: “Uhau tauna e, lau hereva henia oi dekenai, oi toreisi.” Vadaeni, mase tauna ia helai tore! Ia hereva, bena Iesu ese ena sinana dekenai ia henia.

Taunimanima ese unai tauhau ia mauri momokani idia itaia neganai, idia gwau: “Peroveta tauna badana ta iseda huanai ia hedinarai vadaeni.” Ma haida idia gwau: “Dirava ese ena bese taudia dekenai ia mai itaia vadaeni.” Haraga herea unai kara sivaraina be Iudea ibounai bona ena badibadinai tano ibounai dekenai idia gwauraia loaloa.

Unai neganai Ioane Bapatiso be dibura rumana ai ia do noho. Ena hahediba taudia ese Iesu ena hoa karadia idia hamaorolaia neganai, Ioane ese unai edena bamona ia laloa? Luka 7:​11-18.

▪ Iesu be Nain dekenai ia raka kahirakahira neganai, dahaka ia itaia?

▪ Ia itaia gauna be edena bamona ia laloa, bona dahaka ia karaia?

▪ Iesu ena hoa karana dainai taunimanima be dahaka idia karaia?