Karoa 101

Simona ena Ruma ai Betania Dekenai

IESU ese Ieriko ia rakatania, bena kilomita 19 ia raka daekau ela bona Betania dekenai. Dina ibounai ia raka badina unai be ororo gabuna. Unai hanua maragina, Lasaro bona ena taihuna ruaosi edia, be Olive Ororona ena mairiveina kahanai; ia bona Ierusalem edia padana be kilomita toi.

Unai negai taunimanima momo be Ierusalem dekenai idia ginidae vadaeni Paseka Ariana totona. Idia mai guna, sibodia do idia hagoevaia totona. Reana idia ese mase tauanina ta idia daua toho o ma kara ta idia karaia vadaeni dainai, idia goeva lasi. Unai dainai taravatu hegeregerena, Paseka Ariana do idia karaia totona sibodia idia hagoevaia guna. Idia ginidae guna taudia be dubu ai idia hebou neganai, momo idia henanadai heheni, Iesu be Paseka totona do ia mai eiava lasi.

Ierusalem dekenai hepapahuahu momo idia vara Iesu dainai. Taunimanima momo idia diba tomadiho gunalaia taudia idia ura Iesu do idia hamasea. Taunimanima idia haganidia vadaeni, bema ta ia diba Iesu be edeseniai ia noho, tomadiho gunalaia taudia do ia hadibadia. Nega toi​—Kalaga Ariana dekenai, Dubu Hahelagaia Ariana dekenai, bona Iesu ese Lasaro ia hatorea isi lou murinai​—unai tomadiho gunalaia taudia ese Iesu idia hamasea toho. Unai dainai taunimanima idia henanadai heheni, Iesu be taunimanima vairadiai do ia hedinarai lou eiava lasi? Idia gwau: “Umui be dahaka umui gwau?”

Friday adorahi ai, Nisan 8 ai, dina 6 idia do noho ela bona Iuda taudia edia kalenda hegeregerena Paseka Ariana be Nisan 14 ai do idia karaia neganai, Iesu be Betania dekenai ia ginidae. Edia taravatu dainai, ia be Saturday dekenai ia loaloa diba lasi. Friday, dina ia diho negana ela bona Saturday, dina ia diho negana, idia gwauraia Sabati dinana. Friday hanuaboi ai Iesu be reana Lasaro ena ruma ai ia mahuta, guna ia karaia bamona.

Betania tauna ma ta ese Iesu bona ena bamodia ia boiridia, Saturday adorahi ai ia ida do idia aniani hebou totona. Unai tau be Simona, guna ia be lepra tauna, to reana Iesu ese ia hamauria. Lasaro danu be idia ida ia aniani hebou, bona Mareta be vaia ena kara aria taudia ia hesiai henidia. To Maria be vaia Iesu ia laloa bada dainai kara ta ia karaia ia dekenai. Ena kara dainai hepapahuahu ia vara.

Maria ese nadi kavabuna ta ia abia, ia lalonai be “dehoro mai bonana namona,” kilogram kahana ta hegeregerena. Ena davana be lagani tamona ena gaukara davana bamona! Maria ese unai kavabu ia kehoa, bena dehoro be Iesu ena kwarana bona ena aena dekediai ia bubua, bena ena huina amo Iesu ena aena ia dahudia kaukau. Bonana namona ese ruma ibounai ia hahonua.

Hahediba taudia idia badu, idia gwau: “Dahaka totona inai dehoro ia negea kava?” Bena Iuda Iskariote ia gwau: “Badina dahaka inai dehoro be ia hoia lasi? 300 kina do ia abia, ogogami taudia dekenai do idia harihari henia.” To Iuda be unai bamona ia hereva, ogogami taudia ia bogadia hisi dainai lasi, to badina ia be hahediba taudia edia moni mauana amo ia henaohenao dainai.

Iesu ese Maria ia durua, ia gwau: “Umui rakatania. Ena kara umui koua lasi. Ia be kara namona lau dekenai ia karaia. Ogogami taudia be nega ibounai idia noho umui dekenai, bona umui ura neganai kara namo umui karaia diba idia dekenai, to lau be nega ibounai umui dekenai lau noho lasi. Ia diba gauna ia karaia, lauegu tauanina ia dahua, idia be do idia guria lau totona. Momokani lau hamaoroa umui, tanobada ibounai inai Sivarai Namo do idia haroro karaia, inai hahine ena kara do idia gwauraia, bona iena kara do idia laloatao.”

Iesu be hora 24 mai kahana Betania ai ia noho vadaeni, bona taunimanima momo idia kamonai Iesu be unuseniai. Unai dainai Simona ena ruma dekenai idia mai Iesu bona Lasaro danu itadia totona. Unai dainai hahelaga taudia badadia idia gwaubou Iesu sibona do idia hamasea lasi, to Lasaro danu, badina be taunimanima momo ese Iesu ese ia hatorea isi lou tauna, Lasaro, idia itaia neganai, Iesu idia abidadama henia! Momokani, unai tomadiho gunalaia taudia idia dika momokani! Ioane 11:55–12:11; Mataio 26:​6-13; Mareko 14:​3-9; Kara 1:12.

▪ Dubu dekenai dahaka idia herevalaia, bona dahaka dainai?

▪ Edena negai Iesu be Betania ai ia ginidae, bona Sabati dinana ai edeseniai ia noho?

▪ Maria ese dahaka ia karaia dainai hepapahuahu ia vara, bona edena bamona Iesu ese ia durua?

▪ Dahaka ese ia hahedinaraia hahelaga taudia edia dika be bada herea?