TAUNIMANIMA be hahetoho aukadia idia davaria neganai, Dirava do idia abidadama henia bema hahenamo ta do idia davaria lasi, a? Satani ese unai henanadai be tau ta ladana Iobu dekenai ia gwauraia, bona haere idia abia.

Israela taudia be Aigupito ai idia do noho lalonai, Iobu, Aberahamo ena varavara ta, be hari idia gwauraia Arabia tanona ai ia noho. Unai nega ai, guba dekenai aneru be Dirava vairanai idia hebou bona gwau-edeede aneruna, Satani, be idia huanai ia noho. Guba ai, idia hebou anerudia vairanai, Iehova ia gwau Iobu be iena hesiai tauna namona bona mai ena abidadama bada. Oibe, ia gwau tanobada ai tau ta be Iobu bamona lasi, ia be abidadama bada tauna. To Satani ia gwau, Iobu ese Dirava ia hesiai henia badina Dirava ese Iobu ia hanamoa bona ia gimaia. Ma ia gwau, bema Iobu ena gau ibounai ia haboioa, Dirava do ia gwauraia dika.

Dirava ese Satani dekenai gwaumaoro ia henia Iobu ena taga bona ena natudia ia hadikaia, bena gorere dikana ia henia. To, Iobu ia diba lasi Satani ese unai ia karaia noho, unai dainai Dirava ese ena hisihisi idauidau ia koua lasi dainai ia daradara. To, Iobu be Dirava ia dadaraia lasi.

Iobu ena tura koikoidia toi be ia idia vadivadi henia. Iobu bukana lalonai, rau momo be edia hereva amo idia honu. Unai tatau be idia gwau Iobu be kara dika momo ia karaia dainai Dirava ese ia panisia noho. Danu idia gwau, Dirava be ena hesiai taudia dekenai ia moale lasi bona ia abidadama henia lasi. To Iobu ese edia koikoi herevadia ia dadaraia. Mai ena lalona ibounai ida ia gwau, ena abidadama ai do ia haheauka noho ela bona ia mase!

To, Iobu ia kerere badina ia gwau ia be kara maoromaoro tauna. Tau matamata ta ladana Elihu be edia hereva ibounai ia kamonai noho bona ia ese Iobu bona ena tura koikoidia ia hamaoromaoroa. Ia ese Iobu ia sisiba henia, badina Iehova Dirava be mai ena maoro tanobada bona guba do ia lohiaia ia laloa lasi, to taunimanima ena ladana abia isi karana ia laloa bada. Danu, Elihu ese Iobu ena tura koikoidia ia gwau henidia dikadika.

Bena Iehova Dirava ese Iobu ia hereva henia, ena lalohadai ia hamaoromaoroa. Ia havaraia gaudia idauidau ia herevalaia, badina ia ura Iobu ia laloparara Dirava ena siahu be bada, bona taunimanima edia be maragi. Iobu be mai lalomanau ida Dirava ena sisiba ia abia dae. Bona Iehova be “lalokau bona hebogahisi bada Diravana” dainai, Iobu ena gorere ia hanamoa bona ena taga be nega rua amo ia habadaia bona natudia 10 ia henia. (Iamesi 5:​11) Iobu be hahetoho aukana lalonai ena abidadama dekenai ia gini goada dainai ia kwalimu, bona Satani ena hereva taunimanima be hahetoho idia davaria neganai Dirava do idia rakatania be koikoi.

​—Iobu bukana amo.