KONGREGESEN ta ta dekenai, Tiokratik Haroro Sikuli naria totona elda ta idia abia hidi. Bema unai maduna namona oi abia, sikuli bona stiuden taudia ta ta ese edia hereva dalana idia hanamoa karana oi laloa bada neganai, sikuli ese emui kongregesen ia durua bada.

Emu gaukara ena kahana badana be pura iboudiai emui kongregesen ena Tiokratik Haroro Sikuli oi hakaua. Oi laloatao kahana idia karaia stiuden taudia sibona lasi to kamonai taudia idia noho danu. Namona be sikuli oi hakaua dalana amo kongregesen ibounai ese hadibaia hereva namodia idia kamonai, bona idia lalonai inai stadi bukana ena rau 5 ia lao 8 lalonai idia gwauraia sikuli ena tahua gaudia ta eiava haida oi hahedinaraia.

Stiuden taudia ibounai oi laloa, herevana duahiduahi idia karaia, haheitalai bamona kahana ta idia karaia, eiava hereva ta idia henia. Idia oi durua bena do idia laloa idia abia kahana be gaukara ta sibona lasi, to ia be Iehova idia hesiai henia gaukarana idia hanamoa dalana namona. To momokani, edia kara ia namo ia lao totona, idia gaukara goada be mai anina bada. To danu, gau badana be oi ese dala namona ai idia oi kara henia, idia oi durua sisiba kahadia idia lalo-pararalaia totona, bona unai sisiba badinaia daladia oi hahedinaraia. Unai dainai, hereva ta ta oi kamonai namonamo, lalohadai namodia oi gwauraia diba totona.

Gau badana be nega maorona ai sikuli oi hamatamaia bona haorea. Haheitalai namona oi hahedinaraia bona emu hereva be idia makaia negana lalonai oi gwauraia. Bema stiuden ta ese ena nega ia hanaia, oi eiava emu durua tauna ese toana ta amo unai umui hahedinaraia. Namona be stiuden ese ena sentens ia haorea bona platfom ia rakatania. Bema program ena kahana ma ta ena nega idia hanaia, oi sibona emu hereva oi hakwadogia, bena hebou murinai unai tadikaka ida unai oi herevalaia.

Bema hebou dekenai oi noho, oi ese sikuli oi hakaua be namo. Bema nega haida oi noho lasi, elda oreana ese guna ia abia hidi elda ta ese sikuli do ia naria. Bema sediual karaia totona, kahana henia pepadia torea bona henia totona, eiava program ena kahana ta do ia karaia diba volantia ta oi tahua totona heduru oi ura, elda oreana ese ia abia hidi hesiai tauna ta ese oi ia durua diba.

Stiuden Taudia Matamatadia. Pablisa taudia ibounai oi hagoadaia sikuli dekenai idia vareai totona. Kongregesen idia bamoa taudia ma haida idia vareai diba danu, bema Baibel ena hadibaia herevadia idia abia dae bona edia mauri be Keristani hakaua herevadia hegeregerena. Ta ia ura vareai neganai, ia oi hanamoa. Bema ia be do pablisa lasi, oi be sikuli naria tauna dainai sikuli dekenai idia vareai taudia edia taravatu be ia ida oi herevalaia, bona unai oi karaia lalonai ia ida Baibel stadi ia karaia tauna (eiava abidadama tama eiava sina) ia noho danu be namo. Unai taravatu be bapatiso lasi pablisa taudia edia taravatu hegeregerena. Idia be Hesiai Gaukara Karaia Totona Ita Hegaegae bukana ena rau 98 ia lao 100 dekenai idia noho. Sikuli dekenai idia noho taudia ibounai edia ladana be lista dekenai oi torea.

Sisiba Pepana Gaukaralaia Dalana. Stiuden  ta ta edia sisiba pepana be edia sikuli bukana ena rau 79 ia lao 81 dekenai ia noho. Kala idauidau ese idia hahedinaraia hegeregerena, sisiba namba 1 ia lao 17 be duahiduahi kahana lalonai idia badinaia diba. Haheitalai bamona idia karaia kahadia lalonai sisiba ibounai idia badinaia diba to sisiba namba 7, 52, bona 53 lasi. Hereva henia kahadia lalonai sisiba iboudiai idia badinaia diba to sisiba namba 7, 18, bona 30 lasi.

Stiuden ta ese sisiba matamatana ia abia neganai, namona be sikuli naria tauna ia itaia stiuden ena buka dekenai ia noho sisiba pepana ai, inai ladana “Henia Dinana” henunai unai sisiba badinai ia noho gabuna ai pensolo amo deit idia torea. Stiuden ese ena kahana ia karaia murinai, ia sibona oi hereva henia neganai oi nanadaia bema unai sisiba kahana dokonai ia noho eksasais ia karaia, eiava. Bema ia karaia, sisiba pepana dekenai ia noho mauana dekenai maka ta oi atoa. Bema oi laloa unai sisiba kahana do ia hanamoa noho be namo, sisiba pepa dekenai maka ma ta oi atoa lasi; “Haorea Dinana” ena kahana ai gau ta oi torea lasi. Unai maka be sisiba ma ta ia hanamoa matamaia neganai do oi atoa. Danu, stiuden ena buka ena rau 82 dekenai, ia karaia dalana ena laurina kahana ai, stiuden ena kahana ta ta ia karaia murinai deit oi torea. Sisiba pepana bona karaia daladia ena pepa ai, nega rua kahana ta ta badinaia totona maka torea gabudia idia noho. Stiuden taudia ese sikuli dekenai edia buka do idia abia mai.

Kahana ta totona hereva hanamoa sisiba tamona sibona oi makaia. Lista dekenai idia torea hegeregerena sisiba ta ta do idia badinaia ela bona dokona be namo. To, bema stiuden haida ese diba idia abia haraga, reana idia oi hagoadaia diba idia sibona ese oi abia hidi sisiba haida do idia stadilaia bona badinaia. Bena edia haroro bona hadibaia gaukarana idia durua namonamo kahadia dekenai idia oi durua.

Ena be stiuden tauna be lagani momo lalonai sikuli dekenai ia noho vadaeni, kahana ta ta ia stadilaia bona badinaia karana amo heduru ia abia. Bema oi itaia stiuden taudia be edena kahana idia hanamoa be namo, reana sisiba pepana dekenai idia torea hegeregerena sisiba kahadia oi henia lasi to idia totona kahana oi abia hidi diba.

Sisiba Henia Dalana. Sisiba oi henia neganai, Baibel ena haheitalai bona hakaua herevadia oi badinaia namonamo. Namona be stiuden taudia idia itaia oi henia sisiba bona oi henia dalana be Dirava ena Hereva lalonai idia noho hakaua hereva namodia hegeregerena.

Oi laloatao oi be emu tadikaka bona taihu ida oi “gaukara hebou.” (2 Kor. 1:24) Idia bamona, oi ese emu haroro bona hadibaia gaukarana oi hanamoa noho be namo. Tiokratik Haroro Sikuli amo Heduru Oi Abia bukana oi stadilaia, ena sisiba oi badinaia, bona haheitalai namona oi hahedinaraia, ma haida ese idia tohotohoa totona.

Unai oi karaia lalonai, namona be stiuden taudia oi durua toho, duahiduahi, hereva henia, bona hadibaia namonamo taudia ai idia lao. Unai oi karaia totona, namona be dala idauidau ai stiuden taudia oi durua bena idia lalo-parara sisiba ena kahana idauidau be dahaka dahaka, dahaka dainai idia be mai anina bada, bona edena bamona unai do idia hanamoa. Inai stadi bukana idia karaia dalana ese unai dekenai oi do ia durua. To, nega momo, buka amo hereva oi duahia sibona be hegeregere lasi. Idia hahedinaraia lalohadai bona badinaia dalana oi herevalaia.

 Bema stiuden tauna ese kahana ta ia karaia namonamo, ia oi hanamoa. Hereva kwadogi amo oi hahedinaraia dahaka dainai ia namo bona mai anina bada. Bema kahana ta ia badinaia noho be namo, namona be unai ena badina ia lalo-pararalaia. Unai ia karaia dalana oi herevalaia. Unai oi hahedinaraia namonamo, to danu, oi kara namo.

Namona be oi lalo-parara, taunimanima momo dekenai ma haida vairanai hereva idia henia be auka. Bema ta ia laloa ena kahana ia karaia namonamo lasi, reana ia laloa do ia tohoa noho be badina lasi. Iesu ena kara oi tohotohoa, ia ese “manoka taudia” ia hebogahisi henidia. (Mat. 12:20) Stiuden tauna ena hemami oi laloa. Sisiba oi henia neganai, oi laloa stiuden tauna be ia matamata eiava ia manada pablisa. Mai momokani ida taunimanima oi hanamoa karana ese idia ia hagoadaia bena edia kara idia hanamoa toho.

Stiuden ta ta oi kara henia mai hemataurai ida. Roma 12:10 ese ita ia hadibaia: “Umui ta ta dekenai danu do umui matauraia.” Unai be sisiba namodia Tiokratik Haroro Sikuli dekenai sisiba ia henia tauna dekenai! Bema stiuden tauna ena mauri lagani ese emu ia hanaia, 1 Timoteo 5:​1, 2 ena hakaua herevana oi badinaia namonamo. To, herevana ta ena mauri lagani be hida, ena kara ia hanamoa totona mai hebogahisi ida sisiba oi henia neganai, do ia abia dae haraga.​—Aon. 25:11.

Sisiba oi henia neganai, stiuden dekenai inai hadibaia karana ena tahua gauna oi hahedinaraia. Ena hereva oi gwauraia namo bona sisiba ma ta dekenai do ia hanaia lao be unai tahua gauna lasi. Ma haida ese idia ura henia hereva henia tauna bona hadibaia tauna ai do ia lao be unai tahua gauna lasi. (Aon. 25:27) Iseda ura be ita abia harihari gauna, iseda hereva, ita gaukaralaia Iehova hanamoa totona bona ma haida ita durua Iehova idia diba bona idia lalokau henia totona. Ita idia hadibaia ena badina be do ita hegeregere Mataio 24:14 bona 28:​19, 20 idia hahedinaraia gaukarana ita karaia totona. Idia hegeregere bapatiso tadikaka be gabeai idia abia hidi diba, taunimanima vairanai hereva idia henia karana bona hadibaia gaukarana amo Dirava ena “mamoe orea” do idia naria.​—1 Pet. 5:​2, 3.

Stiuden taudia oi hagoadaia, sisiba matamatana ta oi henidia neganai, dina haida sibona murinai stadi bukana amo unai kahana idia duahia. Idia oi hagoadaia, unai amo idia dibaia gaudia be sikuli totona edia kahana idia hegaegaelaia, dina ta ta ai ma haida ida idia herevahereva, hebou dekenai haere idia henia, bona haroro gaukara idia karaia negadiai do idia badinaia.

Kahana Henia Dalana. Namona be pura toi idia do noho neganai unai oi karaia. Kahana iboudiai be pepa dekenai oi torea bena oi henia be namo.

Kongregesen hadibaia kahadia be elda taudia, unai kahadia idia karaia namonamo diba elda taudia, dekenai oi henia, bona idia hadibaia namonamo diba hesiai taudia dekenai danu.

Edena stiuden kahadia be tadikaka do oi henia bona edena be taihu dekenai oi henia oi abia hidi neganai, sikuli ena sediual dekenai idia noho hadibaia herevadia oi badinaia. Bema stiuden kahadia idia henia taihu be momo to tadikaka be haida sibona, namona be tadikaka dekenai duahiduahi kahadia sibona oi henia lasi to hereva henia kahadia oi henia danu.

Kahana oi henia neganai taunimanima edia noho dalana oi laloa. Elda eiava hesiai tauna ta  be sikuli dekenai kahana oi henia be mai badina bema unai dina tamona ai Hesiai Hebou dekenai kahana ia karaia eiava unai pura ai kongregesen dekenai pablik tok do ia henia, a? Taihu ta dekenai kahana oi henia be mai badina bema unai dina tamona ai ena natuna maragina ta, do ia durua natuna, be kahana ia karaia danu, a? Kahana ta ena hereva be matamata tauna eiava ia do bapatiso lasi stiuden tauna dekenai ia hegeregere do ia karaia totona, a? Oi itaia stiuden ia abia kahana bona ia badinaia sisiba kahana idia hegeregere.

Taihu taudia dekenai oi henia kahana lalonai, nega momo stiuden tauna ese karaia dalana ia abia hidi rau 78 ia lao 82 ai idia noho hadibaia herevadia hegeregerena. Durua tauna tamona oi makaia, to iharuana ia abia hidi diba danu. Bema stiuden tauna ia ura durua tauna ta ia abia, ia karaia dalana ia namo totona, iena noinoi oi laloa bada be namo.

Klas Ma Haida. Bema stiuden taudia edia namba be 50 ia hanaia, reana stiuden taudia edia kahadia totona oi ura klas ma ta umui hamatamaia. Emui kongregesen ia karaia diba hegeregerena, stiuden edia kahana iboudiai eiava kahana ginigabedia rua sibona unuseniai umui karaia diba.

Namona be klas ta ta be mai edia sisiba henia tauna namona, bona ia be elda ta be namo. Bema badina ta ia noho, hesiai tauna namona ta ese unai ia karaia diba. Elda oreana ese unai sisiba henia taudia ia abia hidi be namo. Idia danu oi gaukara hebou namonamo, unai amo stiuden ena goada do oi diba, herevana edena klas dekenai ena kahana ia karaia.

Duahiduahi Kosi. Bema elda oreana ia laloa kongregesen taudia sisina momo be kongregesen ia gaukaralaia gadona ai duahiduahi idia hadibaia be namo, Tiokratik Haroro Sikuli ida unai umui hegaegaelaia diba. Unai lalonai reana toretore bona duahiduahi idia hadibaia, eiava duahiduahi idia hanamoa sibona.

Unai kosi be Tiokratik Haroro Sikuli dekenai stiuden edia kahadia idia henia neganai umui karaia be badina lasi. Heduru namona idia abia totona reana sikuli ena nega be hegeregere lasi. Kongregesen elda taudia ese umui karaia dalana bona negana do idia abia hidi. Dahaka do umui karaia be namo hegeregerena dala umui abia hidi, iboudiai do umui hadibaia hebou eiava idia ta ta umui hadibaia.

Tisa namona umui abia hidi be gau badana. Bema mai dalana, unai gaukara be ia duahiduahi namonamo bona unai gado ia diba namonamo tadikaka dekenai umui henia. Bema unai bamona tadikaka ta ia noho lasi, elda taudia ese mai ena diba bona ia kara namo taihu ta idia noia diba do ia durua totona. Unai taihu ese kosi ia hadibaia neganai kwarana koua gauna ia atoa.​—1 Kor. 11:​3-10; 1 Tim. 2:​11, 12.

Duahiduahi Bona Toretore Dalana buklet bona Apply Yourself to Reading and Writing buklet be gado momo dekenai idia gaukaralaia. Unai buklet be duahiduahi bona toretore dalana hadibaia totona. Gau ma haida umui gaukaralaia diba danu, kosi lalonai idia noho taudia edia duahiduahi dalana hegeregerena. Stiuden taudia edia diba ia bada ia lao neganai, namona be idia umui hagoadaia Tiokratik Haroro Sikuli dekenai idia vareai totona.

Oi be Tiokratik Haroro Sikuli ena naria tauna dainai, kongregesen durua totona gau momo oi karaia diba. Oi hegaegae namonamo, bona Roma 12:​6-8 ena hereva hegeregerena, oi abia gaukarana be Dirava amo oi abia dava bada maduna bamona oi karaia namonamo.