NOA be mai ena adavana bona natuna memero toi. Iena natudia edia ladadia be Sema, Hamo bona Iapeta. Bona unai natudia ta ta be mai edia adavadia. Unai dainai Noa ena ruma bese taudia ibounai be eit.

Dirava be gaukara idauna ta Noa dekenai ia henia. Noa Ia hamaoroa lagatoi badana ta do ia karaia. Unai lagatoi ena bada be bouti badana ta bamona, to ena toana be maua badana ta hegeregerena. Dirava ia gwau: ‘Sitori toi do oi karaia, bona ia lalonai daiutu haida oi atoa.’ Unai daiutu be Noa bona ena ruma bese, animal, bona aniani totona.

Dirava ese Noa ia hamaoroa danu lagatoi do ia koua namonamo, ranu ia vareai garina. Dirava ia gwau: ‘Lau be abata bada herea do lau siaia bona tanobada ibounai do lau hadikaia. Lagatoi lalonai idia noho lasi taudia ibounai do idia mase.’

Noa bona ena natudia ese Iehova idia kamonai henia bona lagatoi idia karaia matamaia. To taunimanima ma haida be idia kiri sibona bona idia kara dika noho. Noa be taunimanima dekenai Dirava ese do ia karaia gauna ia gwauraia neganai, ta ese ia abia dae lasi.

Lagatoi idia haorea haraga lasi badina ia be bada herea. Dokonai, lagani momo murinai lagatoi idia haorea. Dirava ese Noa ia hamaoroa animal be lagatoi lalonai ia hakaudia vareai. Dirava ia gwau animal idauidau be rua rua amo ia mailaia, tau ta bona hahine ta. To Dirava be Noa ia hamaoroa animal haida be seven seven amo ia hakaudia vareai. Dirava ese Noa ia hamaoroa manu idauidau ibounai ia gogoa danu. Noa be Dirava ena hereva ibounai hegeregerena ia karaia.

Gabeai Noa bona iena ruma bese be lagatoi lalonai idia vareai. Bena Dirava ese iduara ia koua. Noa bona ena ruma bese be lagatoi lalonai idia naria. Mani oi laloa, oi be idia ida lagatoi lalonai oi naria noho. Dirava ia hereva bamona abata be momokani do ia mai, eiava?