LAGANI momo idia ore​—lagani 10, lagani 20, lagani 30, lagani 39! Bona Israela taudia be taunimanima idia noho lasi tanona dekenai idia do noho. To unai lagani momo lalonai, Iehova ese ena taunimanima ia naridia. Mana amo ia ubudia. Dina ai, ori ta amo ia hakaudia, bona hanuaboi ai, lahi ta amo ia hakaudia. Bona unai lagani ibounai lalonai edia dabua idia dika lasi bona edia aena dekenai toto idia vara lasi.

Aigupito idia rakatania ena lagani ibounai be 40 ena hua ginigunana inai. Israela taudia be Kadesi ai idia kamepa lou. Lagani 40 gunanai idia be unuseniai idia noho neganai, spai taudia idia siaia Kanana tanona idia itaia totona. Mose ena taihuna Miriama be Kadesi ai ia mase. Bona guna bamona, unuseniai ma hekwakwanai ta ia vara.

Taunimanima ese ranu idia davaria lasi. Unai dainai Mose dekenai idia maumau: ‘Guna ai mase be namo. Dahaka dainai oi ese ai Aigupito amo oi hakaua inai gabu dikana dekenai? Iniseniai gau ta ia tubu diba lasi. Uiti, fig, vain huahua bona ma huahua haida be lasi. Ranu danu be lasi ai inua totona.’

Mose bona Arona be guriguri totona palai dubuna dekenai idia lao neganai, Iehova ese Mose ia hamaoroa: ‘Taunimanima oi haboua. Bena edia vairanai dekenai unai nadi oi hereva henia. Do ia diho ranu be do ia hegeregere taunimanima bona animal ibounai totona.’

Unai dainai Mose ese taunimanima ia haboudia, bona ia gwau: ‘Dirava dekenai abidadama lasi taudia e, umui kamonai! Arona bona lau ese ranu inai nadi amo umui totona do ai abia, a?’ Bena Mose ese au ta amo nadi be nega rua ia botaia, bona nadi dekena amo ranu bada herea ia diho. Unai ranu be ia hegeregere taunimanima bona animal ibounai ese idia inua totona.

To Iehova be Mose bona Arona dekenai ia badu. Ena badina oi diba, a? Badina Mose bona Arona idia gwau idia ese nadi amo ranu do idia henia. To henia tauna korikorina be Iehova. Bona Mose bona Arona be hereva momokani idia gwauraia lasi dainai, Iehova ese idia ia panisia. Ia gwau: ‘Umui ese egu taunimanima Kanana dekenai do umui hakaua vareai lasi.’

Nega sisina murinai Israela taudia ese Kadesi idia rakatania. Daudau lasi murinai Horo Ororona dekenai idia mai. Inai ororo ataiai Arona ia mase. Ena mauri lagani be 123. Israela taudia idia lalohisihisi bada herea bona dina 30 Arona totona idia taitai. Murinai, ena natuna mero Eleasara be Israela bese edia hahelaga tauna badana ai ia lao.