TAUNIMANIMA tausen momo be Babulonia amo laolao daudauna idia karaia ela bona Ierusalema. To idia ginidae neganai, Ierusalema be ia dika momokani. Tau ta be unuseniai ia noho lasi. Israela taudia be gau ibounai do idia haginia lou.

Idia haginia gauna ginigunana ta be boubou patana. Unuseniai animal boubouna, eiava harihari gaudia be Iehova dekenai idia henia. Hua haida murinai, Israela taudia ese dubu idia haginia matamaia. To kahirakahira idia noho taudia idia ura lasi Israela taudia ese idia haginia. Unai dainai idia hagaridia, edia gaukara idia hadokoa totona. Dokonai, Parasa ena king matamata idia noia unai haginia gaukarana ia taravatua totona.

Lagani momo idia ore. Israela taudia be Babulonia amo idia giroa bena lagani 17 idia ore vadaeni. Iehova ese ena peroveta taudia Hagai bona Sekaraia ia siaia, taunimanima do idia hadibaia dubu haginia gaukarana idia hamatamaia lou totona. Taunimanima be Dirava ena heduru dekenai idia tabekau, bona peroveta taudia idia kamonai henidia. Haginia gaukarana idia hamatamaia lou, ena be taravatu ese ia koudia.

Unai dainai Parasa ena lohia tauna ta ladana Tatenai ia mai bona Israela taudia ese dubu idia haginia lou ena badina ia tahua. Israela taudia ese ia idia hamaoroa idia be Babulonia dekenai idia noho neganai, King Kurese ese idia ia hamaoroa: ‘Hari Ierusalema dekenai umui lao bona emui Dirava, Iehova, ena dubu umui haginia lou.’

Tatenai be revareva ta ia siaia Babulonia dekenai bona ia henanadai bema Kurese, ia mase vadaeni tauna, ese unai hereva ia gwauraia. Daudau lasi murinai Parasa ena king matamatana ena haere idia abia. Unai revareva lalonai ia hamomokania Kurese ese unai hereva ia gwauraia. Bona king ia torea: ‘Israela taudia ese edia Dirava ena dubu do idia haginia. Bona oi lau hagania idia do oi durua.’ Lagani foa murinai dubu idia haginia ore, bona Israela taudia be idia moale bada.

Lagani momo ma idia ore. Dubu idia haginia murinai kahirakahira lagani 48 idia ore vadaeni. Ierusalema dekenai idia noho taudia be ogogami taudia, bona hanua bona Dirava ena dubu be ia hairai lasi. Babulonia dekenai Israela tauna Esera ese Dirava ena dubu hanamoa lou sivaraina ia kamonai. Unai dainai ia karaia gauna oi diba, a?

Esera be Parasa edia king, Aratasaseta itaia totona ia lao, bona inai king namona ese Esera dekenai harihari gaudia momo ia henia Ierusalema dekenai ia abia lao totona. Esera ese Babulonia ai idia noho Israela taudia ia noia ia do idia durua unai harihari gaudia be Ierusalema dekenai idia huaia lao totona. Taunimanima 6,000 bamona idia ura lao. Idia ese siliva, golo bona dava bada kohudia momo do idia huaia.

Esera ia lalo-hekwarahi, badina taunimanima dikadia haida be dala dekenai idia noho. Unai tatau ese edia siliva bona golo idia henaoa bona idia hamasedia garina. Unai dainai Esera ese taunimanima ibounai ia haboua, inai laulau dekenai oi itaia bamona. Bena Iehova dekenai idia guriguri Ierusalema dekenai idia lou lao neganai idia do ia gimaia totona.

Iehova ese ia gimadia. Hua 4 lalonai idia laolao murinai, Ierusalema dekenai idia ginidae. Unai ese ia hahedinaraia heduru totona Iehova dekenai idia tabekau taudia be Ia ese do ia gimadia.