INISENIAI oi itaia, Iesu be mero maragina ta ia rosia noho. Unai ese ia hahedinaraia Iesu ese maragidia ia laloa bada. Idia itaia noho tatau be ena aposetolo taudia. Iesu be idia dekenai dahaka ia gwauraia noho? Mani ita itaia.

Iesu bona ena aposetolo taudia be gabu daudauna amo idia giroa. Dala dekenai aposetolo taudia be sibodia huanai idia hepapahuahu. Unai dainai edia loaloa murinai Iesu ese ia nanadaidia: ‘Dala dekenai dahaka umui hepapahuahulaia?’ Momokani Iesu be edia hepapahuahu ena badina ia diba. To ia henanadai badina ia ura diba bema aposetolo taudia ese ia do idia hamaoroa.

Aposetolo taudia idia haere lasi, badina idia be dala dekenai daika ia bada idia hepapahuahulaia. Aposetolo taudia haida idia ura ma haida amo idia bada. Iesu be edena dala amo idia do ia hamaoroa sibodia idia abia isi be maoro lasi?

Mero maragina ia boiria bona idia ibounai edia vairanai ia haginia. Ia gwau: ‘Lau ura inai umui diba, bema emui kara umui haidaua lasi bona natudia maragidia bamona umui karaia lasi, Dirava ena basileia lalonai do umui vareai diba lasi. Inai natuna bamona ia kara tauna be basileia lalonai do ia hereadae.’ Iesu be unai bamona ia hereva ena badina oi diba, a?

Badina natudia maragidia idia laloa lasi idia be ma haida amo idia bada. Unai dainai, aposetolo taudia be unai dala dekenai natudia bamona idia kara bona daika ia bada idia hepapahuahulaia lasi be namo.

Danu, nega haida Iesu ia hahedinaraia natudia maragidia ia laloa bada. Hua haida murinai taunimanima haida ese edia natudia idia abia mai Iesu idia itaia totona. Aposetolo taudia ese idia koudia toho. To Iesu ese ena aposetolo taudia ia hamaoroa: ‘Natudia maragidia be lau dekenai idia mai be namo. Umui koua lasi, badina Dirava ena basileia be unai bamona taudia edia.’ Bena Iesu ese natudia ia rosia bona ia hanamodia. Iesu ese natudia maragidia ia lalokau henia ita dibaia be namo herea, ani?