INAI au latadia, flaoaflaoa hairaidia bona ororo badadia mani oi itadia. Inai gabu be mai ena hairai, ani? Dia be mero maragi ena imana amo ia aniani noho mani oi itaia. Bona laiona bona hosi be gabu tamona dekenai idia noho. Oi ura emu ruma be inai bamona gabu lalonai ia noho, a?

Dirava ia ura tanobada paradaisona lalonai oi mauri hanaihanai. Bona Ia ura lasi hari inai negai taunimanima ese idia mamia hisihisi idauidau oi abia. Paradaiso matamatana lalonai do idia noho taudia dekenai Baibel ena gwauhamata be inai: ‘Dirava be idia danu do ia noho. Mase, taitai eiava hisihisi do idia ore momokani. Gau gunadia be idia ore vadaeni.’

Iesu ia lohia neganai unai ibounai do idia vara. Oi diba edena negai unai do ia vara, a? Oibe, tanobada amo dika idauidau bona kara dika taudia ibounai ia kokia murinai. Laloaboio lasi, Iesu be tanobada dekenai ia noho neganai, gorere idauidau taudia ia hanamodia, bona mase taudia ia hatorea isi lou danu. Iesu ese unai ia karaia badina ia ura hahedinaraia, Dirava ena Basileia ia lohiaia neganai, tanobada ibounai dekenai unai bamona do ia karaia.

Unai tanobada paradaiso matamatana lalonai ita noho be namo herea momokani! Iesu, bona ia abia hidi taudia haida be guba dekenai do idia lohia. Unai lohia taudia ese tanobada taudia ibounai do idia naria namonamo bona do idia hamoaledia. Dirava ena paradaiso matamatana lalonai mauri hanaihanai ita abia totona, do ita karaia gaudia mani ita itaia.