Tomadiho ibounai lalonai, kara namo taudia haida idia noho. Idia dekenai, sivarai namona be inai: Dirava ese ia itadia bona ia lalodia. To, dubu taudia haida be kara dikadia idia karaia noho. (2 Korinto 4:3, 4; 11:13-15) Hegeregere, ripoti haida ese idia hahedinaraia, dubu taudia haida be tuari, terorist, ala-ala, bona natu maragidia hadikaia karadia lalonai idia vareai. Unai kara dainai, Dirava idia abidadama henia kara namo taudia idia lalohisihisi.—Mataio 24:3-5, 11, 12 duahia.

Tomadiho momokanina be Dirava ia hamoalea noho, to tomadiho koikoina be Dirava ia habadua noho. Badina, tomadiho koikoina ese Dirava bona mase ia hadibaia dalana be Baibel ena hahediba herevadia hegeregerena lasi. To, Iehova ia ura taunimanima ese Iena sivarai momokanina idia dibaia.—Hadibaia Tauna 9:5, 10; 1 Timoteo 2:3-5 duahia.

Ena be tomadiho momo idia gwau Dirava idia lalokau henia, to lasi, idia be Satani ena tanobada idia ura henia bada. Unai bamona tomadiho ese Dirava idia koia diba lasi. (Iamesi 4:4) Baibel ese tomadiho koikoi ibounai ia gwauraia, “Babulonia Badana.” Inai ladana, Babulonia be idaunega hanuana o siti ta ena ladana. Noa ena negai Abata ia ore murinai, unai siti amo tomadiho koikoi ia matamaia. Taunimanima idia koia bona dagedage henia noho tomadiho ibounai be kahirakahira Dirava ese do ia hadikaia ore.—Apokalupo 17:1, 2, 5, 16, 17; 18:8 duahia.

Sivarai namona ma ta be inai: Tanobada ibounai, tomadiho koikoi lalonai idia noho kara namo taudia be Iehova ese ia lalodia. Iehova ese unai bamona taudia dekenai Baibel ena hereva momokani ia hadibaia, bona ia hamaorodia  tomadiho koikoi idia rakatania totona.—Mika 4:2, 5 duahia.

Baibel ena hereva momokani idia ura diba taudia, bona kara namodia idia ura karaia taudia, be Iehova ese ia lalodia. Ia ese idia ia hamaoroa, tomadiho koikoi idia rakatania. Dirava idia lalokau henia taudia idia ura edia kara idia haidaua, unai amo Dirava idia hamoalea.—Apokalupo 18:4 duahia.

Idaunegai, aposetolo taudia ese sivarai namona idia harorolaia neganai, kara namo taudia be mai moale ida, unai sivarai idia abia dae. Iehova ese mauri dalana matamatana idia dekenai ia hadibaia—idia ese unai mauri idia moalelaia, badina ia be mai ena ahuna bona mai ena helaro. Edia haheitalai namona ese ita ia durua, badina idia ese sivarai namona idia abia dae, bona edia mauri lalonai Iehova idia atoa guna.—1 Tesalonika 1:8, 9; 2:13 duahia.

Tomadiho koikoi idia rakatania taudia ibounai be Iehova ese ia boiridia, iena orea lalonai idia vareai totona. Bema Iehova ena boiboi oi abia dae, (1) oi be iena turana ai do ia halaoa, (2) Iehova ia tomadiho henia bona lalokau henia orea matamatana lalonai oi do ia abia dae, bona (3) oi dekenai mauri hanaihanai ahuna do ia henia.—Mareko 10:29, 30; 2 Korinto 6:17, 18 duahia.

Sivarai namona ma ta be inai: Dirava ese tomadiho koikoi do ia hahemaoro henia. Unai murinai, taunimanima ibounai do idia noho namonamo. Tomadiho koikoi ta ese taunimanima do ia hakaua kerere lasi bona do ia hapararaia lasi. Tanobada do idia noholaia taudia ibounai be mai lalotamona ida Dirava momokanina tamona do idia tomadiho henia.—Apokalupo 18:20, 21; 21:3, 4 duahia.