Iehova ese ruma bese ena heau dalana ia hamatamaia neganai, natuna naria ena maduna be tama sina dekenai ia henia. (Kolose 3:20) Tama sina edia maduna be natudia do idia hadibaia namonamo, Iehova idia lalokau henia bona taunimanima namodia ai idia lao totona. (2 Timoteo 1:5; 3:15) Danu, emu natuna ena kudouna ai idia noho gaudia oi dibaia be namo. Bona oi ese haheitalai namona oi hahedinaraia danu be gau badana. Bema Iehova ena Hereva be emu kudouna ai ia noho, vadaeni emu natuna do oi hadibaia goevagoeva.​—Salamo 40:8.

BAIBEL IA GWAU: “[Oi] kamonai haraga, to [oi] hereva haraga lasi.” (Iamesi 1:19) Oi ura emu natudia idia mamia idia be oi idia hereva henia diba. Namona be idia diba hanaihanai oi noho hegaegae edia hereva oi kamonai totona. Namona be umui huanai maino ia noho, unai amo edia lalohadai idia gwauraia hedinarai diba. (Iamesi 3:18) Bema idia laloa idia do oi hereva o kara auka henidia, reana edia lalohadai ibounai do idia gwauraia lasi. Namona be emu natudia dekenai oi haheauka, bona hanaihanai oi hamaorodia idia oi lalokau henia.​—Mataio 3:17; 1 Korinto 8:1.

OI KARAIA DIBA GAUNA:

• Emu natudia idia ura oi idia hereva henia neganai, oi noho be namo

• Hanaihanai emu natudia ida oi herevahereva, to hekwakwanai negadiai sibona lasi

BAIBEL IA GWAU: “Aonega tauna ese sibona do ia laloa namonamo guna, vadaeni kara do ia karaia.” (Aonega Herevadia 13:16) Nega haida, emu natudia edia kara bona vairana toana amo edia hereva ena anina bona edia hemami korikori do oi lalopararalaia. Nega momo matamata taudia be idia laloa namonamo lasi bona idia hereva. Baibel ia gwau: “Hereva do oi kamonai guna, gabeai do oi haere. Bema oi haere haraga, oi be kavakava.” (Aonega Herevadia 18:13) Namo lasi oi badu haraga.​—Aonega Herevadia 19:11.

OI KARAIA DIBA GAUNA:

• Herevana emu natuna be dahaka ia gwauraia, to namona be ena hereva oi koua lasi o oi badu lasi

• Namona be emu matamata negana oi laloa lou bona unai negai oi laloa bada gaudia oi laloa

BAIBEL IA GWAU: “Lauegu natuna e, oiemu tamana bona sinana, edia hadibaia hereva do oi kamonai henia.” (Aonega Herevadia 1:8) Iehova ese tama sina dekenai siahu ia henia natudia idia naria totona. Namona be natudia ese tama sina idia matauraia bona kamonai henia. (Efeso 6:1-3) Natudia idia itaia diba, bema edia tama sina be idia “lalotamona momokani” eiava lasi. (1 Korinto 1:10) Unai dainai, bema gau ta dekenai umui lalotamona lasi, namo lasi natudia ese unai idia itaia. Badina unai ese edia matauraia karana umui dekenai do ia hamaragia.

OI KARAIA DIBA GAUNA:

• Emui natudia do umui sisiba henidia dalana umui herevalaia bona abia hidi

• Bema natuna hadibaia dalana dekenai emu lalohadai be emu adavana ena amo ia idau, namona be ena lalohadai oi lalopararalaia toho

BAIBEL IA GWAU: “Mero dekenai mauri dala maorona do oi hadibaia.” (Aonega Herevadia 22:6) Emu natudia hadibaia namonamo karana be do ia vara kava lasi. Namona be palani ta oi karaia natuna hadibaia totona, bona matahakani karana ia noho be namo. (Salamo 127:4; Aonega Herevadia 29:17) Emu natudia do oi matahakani henia ena anina be idia do oi panisia sibona lasi, to danu oi hadibadia dahaka dainai oi matahakani henidia. (Aonega Herevadia 28:7) Danu, namona be emu natudia oi hadibaia Iehova ena Hereva do idia lalokau henia bona ia lalonai idia noho hakaua herevadia do idia laloa dobu. (Salamo 1:2) Unai ese idia do ia durua lalomamina goevana idia abia totona.—Heberu 5:14.

OI KARAIA DIBA GAUNA:

• Emu natudia oi durua unai amo idia ese Iehova be tau Korikorina ta bamona idia abidadama henia diba

• Oi durudia edia kara namodia idia hadikaia diba gaudia hegeregere, Intanet bona facebook ai idia noho gaudia, idia dibaia bona dadaraia. Oi hadibaia edena bamona idia ese matabodaga dalanai natuna hadikaia taudia idia dadaraia diba