Iehova ia ura “oiemu adavana korikori dekenai do oi kara momokani, bona ia sibona do oi ura henia.” (Aonega Herevadia 5:15) Emu headava lalonai badinaia heheni be mai anina bada. Bema unai umui karaia lasi, ta ese ta ena hereva do ia abia dae lasi bona lalokau do ia goada lasi.

Hari inai negai, headava taudia momo be ta ta idia badinaia lasi. Emu headava oi gimaia totona, emu lalona oi hadaia inai gau rua oi karaia.

BAIBEL IA GWAU: “Mai anina bada gaudia do umui diba.” (Filipi 1:10) Emu headava be mai anina bada gauna ta dainai, emu headava oi atoa guna be namo.

Iehova ia ura emu adavana ena namo oi laloa bada bona umui “moale hebou.” (Hadibaia Tauna 9:9) Ia ura lasi emu adavana oi laloaboio, to umui ta ta be dala umui tahua umui hamoalea heheni totona. (1 Korinto 10:24) Namona be emu adavana ia mamia ia oi ura henia bona laloa bada.

OI KARAIA DIBA GAUNA:

• Hanaihanai nega umui atoa gau haida umui karaia hebou, bona unai nega be oi bona emu adavana sibona totona

• Namo lasi oi gwau “lau,” to oi gwau “ai”

BAIBEL IA GWAU: “Bema tau ta be hahine ta ia raraia ela bona ia ura henia dikadika, unai tauna be iena kudouna dekenai ia heudahanai vadaeni.” (Mataio 5:28) Bema ta be matabodaga karadia ia laloa momo, ita gwau diba ia heudahanai vadaeni.

Iehova ia gwau namona be ‘emu kudouna do oi naria namonamo.’ (Aonega Herevadia 4:23; Ieremia 17:9) Unai oi karaia totona, namona be emu matana danu oi gimaia. (Mataio 5:29, 30) Iobu ena haheitalai oi badinaia be namo, ia be ena matana dekenai taravatu ia atoa, nega ta kekeni ta do ia itaia noho lasi. (Iobu 31:1) Namona be emu lalona oi hadaia ponografi oi itaia lasi. Danu emu lalona oi hadaia, ma ta oi ura henia lasi, to emu adavana sibona do oi lalokau henia.

OI KARAIA DIBA GAUNA:

• Ma haida dekenai oi hahedinaraia emu adavana oi lalokau henia momokani

• Emu adavana ena hemami oi matauraia, bona kara haraga emu adavana ena hemami do ia hadikaia hebamo karadia oi dadaraia vaitani