Bema oi ura Dirava ena turana ai oi lao, namona be Dirava ia abia dae tomadihona oi badinaia. Iesu ia gwau “tomadiho taudia momokani” ese “momokani” ai Dirava do idia tomadiho henia. (Ioane 4:​23, 24) Dirava tomadiho henia dalana maorona be tamona sibona. (Efeso 4:​4-6) Tomadiho momokanina be mauri hanaihanai dekenai ita ia hakaua lao, bona tomadiho koikoi be mase dekenai ita ia hakaua lao.​​—Mataio 7:​13, 14.

Tomadiho momokanina oi dibaia diba bema ia idia badinaia taudia edia kara oi tahua. Iehova be namo dainai, namona be ia idia tomadiho henia taudia be taunimanima namodia. Orensi au namona ese orensi namodia ia havaraia hegeregerena, tomadiho momokanina ese taunimanima namodia ia havaraia.​​—Mataio 7:​15-​20.

Iehova ena turadia ese Baibel idia matauraia bada. Idia diba Baibel be Dirava amo. Baibel ena hereva idia abia dae edia mauri ia hakaua bona edia hekwakwanai ia hanamoa totona, bona ia amo heduru idia abia Dirava idia diba totona. (2 Timoteo 3:​16) Idia harorolaia gaudia idia badinaia toho.

Iehova ena turadia ese ta ta dekenai lalokau idia hahedinaraia. Iesu ese taunimanima dekenai Dirava ena kara ia hadibaia bona gorere taudia  ia hanamoa neganai, ia hahedinaraia idia ia lalokau henia. Tomadiho momokanina idia badinaia taudia danu ese ma haida dekenai lalokau idia hahedinaraia. Iesu bamona, idia ese ogogami taudia bona bese idau taudia idia laloa maragi lasi. Iesu ia gwau taunimanima ese ena hahediba taudia do idia diba, ta ta dekenai lalokau idia hahedinaraia dainai.​​—Ioane 13:35.

Dirava ena turadia ese Dirava ena ladana, Iehova, idia matauraia. Bema ta ia ura lasi oiemu ladana ia gaukaralaia, ia be oiemu turana namona, a? Lasi! Turana namona ta ita abia neganai, ena ladana ita gaukaralaia bona ma haida dekenai ena kara namodia ita herevalaia. Unai dainai Dirava ena turadia ai idia ura lao taudia ese ena ladana idia gaukaralaia bona ma haida dekenai ia idia herevalaia be namo. Iehova ia ura unai bamona ita karaia.​​—Mataio 6:9; Roma 10:​13, 14.

Iesu bamona, Dirava ena turadia ese taunimanima dekenai Dirava ena Basileia idia hadibaia. Dirava ena Basileia be guba gavamanina bona tanobada be paradaiso ai do ia halaoa. Dirava ena turadia ese ma haida dekenai unai Dirava ena Basileia sivaraina namona idia harorolaia.​​—Mataio 24:14.

Iehova ena Witnes taudia idia hekwarahi Dirava ena turadia ai idia lao totona. Baibel idia matauraia bona ta ta dekenai lalokau idia hahedinaraia. Danu, idia ese Dirava ena ladana idia gaukaralaia bona idia matauraia bona ma haida dekenai Dirava ena Basileia idia hadibaia. Iehova ena Witnes taudia be hari inai negai tanobada ai tomadiho momokanina idia badinaia.