Dirava ese kara dika taudia do ia koua, Paradaiso idia hadikaia lasi totona. Iena turadia sibona be unuseniai do idia noho. Kara dika taudia dekenai dahaka do ia vara? Haere oi abia totona, mani Noa ena sivarai momokanina oi laloa. Noa be lagani tausen momo gunanai ia noho. Ia be tau namona bona ia hekwarahi bada Iehova ena ura ia karaia totona. To taunimanima ma haida ese tanobada dekenai kara dikadia idia karaia. Unai dainai Iehova ese Noa ia hamaoroa unai kara dika taudia haorea totona abata do ia mailaia. Noa ia hamaoroa lagatoi ta do ia karaia, Abata ia mai neganai ia bona ena ruma bese do idia mase lasi totona.​​—Genese 6:​9-​18.

Noa bona ena ruma bese ese lagatoi idia karaia. Noa ese taunimanima ia hadibaia Abata do ia mai, to idia kamonai lasi. Kara dika idia karaia noho. Lagatoi idia haginia ore murinai, Noa ese animal ia abidia vareai lagatoi lalonai, bona ia bona ena ruma bese idia vareai danu. Bena Iehova ese medu badana ia mailaia. Medu be dina 40 bona hanuaboi 40 ia diho. Ranu ese tanobada ibounai ia koua.​​—Genese 7:​7-​12.

 Kara dika taudia ese edia mauri idia haboioa, to Noa bona ena ruma bese idia mauri. Iehova ese unai Abata amo ia hamauridia bena kara dika amo ia hagoevaia tanobadana dekenai idia noho. (Genese 7:​22, 23) Baibel ia gwau hari danu dina ta ia mai noho, Iehova ese kara maoromaoro idia dadaraia taudia do ia haorea totona. Kara namo taudia do ia haorea lasi. Paradaiso tanobadana ai do idia noho ela bona hanaihanai.​​—2 Petero 2:​5, 6, 9.

Hari inai negai momo ese kara dikadia idia karaia. Tanobada be hekwakwanai amo ia honu. Iehova ese ena Witnes taudia ia siaia loulou taunimanima idia hadibaia totona, to momo idia ura lasi Iehova ena hereva idia kamonai. Idia ura lasi edia dala idia haidaua. Idia ura lasi Dirava ese ia gwauraia dahaka be maoro bona dahaka be kerere idia abia dae. Unai taudia dekenai be dahaka do ia vara? Edia kara do idia haidaua, a? Momo ese edia kara do idia haidaua lasi. Kara dika taudia haorea negana ia mai, bona do idia mauri lou lasi.​​—Salamo 92:7.

Tanobada do ia ore lasi; to paradaiso ai do ia lao. Dirava ena turana ai idia lao taudia be tanobada Paradaisona ai do idia noho ela bona hanaihanai.​​—Salamo 37:29.