Sivarai namona oi abia neganai oi moale, ani? Oi bona emu lalokau taudia totona sivarai namona ta ia noho.

Unai sivarai namona be Baibel lalonai, lagani momo gunanai, guba bona tanobada ia Havaraia Tauna, Iehova Dirava ena siahu amo idia torea. Inai buka lalonai, ita ese Baibel bukadia foa do ita herevalaia bona edia sivarai be namo herea ita ibounai totona. Dirava ese tatau foa ia abia hidi unai buka idia torea totona, unai buka edia ladadia be Mataio, Mareko, Luka, bona Ioane.

Momo ese unai bukadia idia gwauraia Evanelia Bukadia foa. Unai buka ese Iesu ena haroro gaukara eiava sivarai namona ia herevalaia: Iesu be Dirava ese ia gaukaralaia taunimanima hamauria totona, bona ia be King, Dirava ena guba Basileia lalonai bona ia ese tanobada ai, ia idia abidadama henia taudia ibounai dekenai, noho hanaihanai hahenamo do ia mailaia.​—Mareko 10:17, 30; 13:13.

Dahaka dainai Dirava ese tatau foa ia gaukaralaia Iesu ena mauri sivaraina idia torea?

Unai buka foa ese ita ia durua Iesu ena sivarai, iena hereva bona ia karaia gaudia amo namo ita abia. Haheitalai:Tatau foa be ladana bada tisa ta badinai idia gini. Tisa vairanai ia gini tauna be takisi gogoa gaukarana ia karaia. Idiba kahanai be doketa tauna ia gini. Lauri kahanai be haoda tauna ia gini bona ia be tisa ena turana namona. Bona tisa murinai ia gini tauna be mero matamata, ia be tisa ena hereva bona ia karaia gaudia ia raraia noho. Unai tatau foa be kara momokani taudia, bona edia ura bona lalohadai be ta ta amo ia idau. Unai dainai idia ta ta ese tisa ena hereva bona ia karaia gaudia idia torea neganai, unai sivarai idia torea dalana be ta ta amo ia idau. To idia ta ta ese idia torea gaudia, eiava tisa ena hereva bona ia karaia gaudia ibounai ena sivarai be unai buka foa lalonai ita duahia neganai, ita lalopararalaia namonamo diba. Unai haheitalai amo ita itaia, Hahediba Tauna Badana Iesu, ena mauri sivaraina be buka foa lalonai idia torea karana ese ita ia durua bada diba.

Haheitalai ita do herevalaia noho: Takisi gogoa tauna ia ura Iuda taudia edia lalona do ia veria  dainai, idia durua totona tisa ena hadibaia herevadia eiava ia karaia karadia haida ia toredia hebou. Doketa tauna be tisa ese gorere eiava aena dika taudia ia hanamoa sivaraidia ia torea totona, ia ese takisi gogoa tauna ia torea sivarai haida ia torea lasi, eiava dala idauna ai ia torea. Tisa ena turana namona be tisa ena kara bona iena hemami ia torea. Mero matamatana be sivarai kwadogidia sibona ia torea. To, idia ta ta ese idia torea sivaraidia be maoro bona momokani. Unai haheitalai ese ia hahedinaraia, buka foa lalonai Iesu ena mauri sivaraina idia torea karana ese ita ia durua bada, iena gaukara, hadibaia herevadia bona kara ita lalopararalaia namonamo diba.

Reana haida idia gwau, ‘Mataio Ena Evanelia Bukana’ eiava ‘Ioane Ena Evanelia Bukana.’ To, unai buka ta ta ese “Iesu Keriso ena sivarai namona” idia herevalaia. (Mareko 1:1) Oibe, unai bukadia lalonai idia noho sivarai ese gau tamona idia herevalaia, unai be Iesu ena evanelia gaukarana eiava sivarai namona.

Baibel idia stadilaia taudia momo ese Mataio, Mareko, Luka bona Ioane ena buka lalonai idia torea sivaraidia idia tahua, bona idia davaria hereva ibounai be hegeregere. Lagani 170 C.E., Syria toretore tauna Tatian be unai bamona ia karaia. Ia davaria unai buka foa be Dirava ena siahu amo idia torea bona hereva ibounai be idia maoro, unai dainai Iesu ena mauri bona haroro gaukara ida ia hegeregere sivaraina amo, Diatessaron bukana ia karaia.

Inai buka, Iesu—Dala, Hereva Momokani, Mauri be unai hegeregerena, to ena sivarai ibounai be momokani bona maoromaoro. Badina, hari ita ese Iesu ena peroveta herevadia bona parabole momo edia guguru dalana ita lalopararalaia namonamo. Unai ita diba dainai, Iesu ena hereva, ia karaia gaudia bona unai gaudia idia vara negadia ita lalopararalaia goevagoeva. Akioleji taudia ese idia davaria gaudia haida ese ita idia durua, evanelia bukadia idia torea taudia edia lalohadai ita lalopararalaia totona. Momokani, idia vara gaudia haida edia nega korikori be ta ia gwauraia maoromaoro diba lasi. To Iesu—Dala, Hereva Momokani, Mauri bukana ese Iesu ena mauri sivaraina ia gwauraia hedinarai namonamo.

Inai buka oi duahia neganai, do oi moalelaia bada. Bona laloatao, oi bona emu lalokau taudia ese inai mai anina bada hereva umui laloa. Iesu Keriso ese aposetolo tauna Toma dekenai ia gwau: “Dala be lau, hereva momokani be lau bona mauri be lau. Lau sibona amo tau ta be Tamana dekenai ia mai diba.”​—Ioane 14:6.

Inai buka, Iesu—Dala, Hereva Momokani, Mauri, ese oi do ia durua, unai amo do oi abia dae Iesu be “dala.” Ia sibona amo Iehova Dirava ita guriguri henia diba. Ma danu, Iesu amo Dirava ida maino ita karaia diba. (Ioane 16:23; Roma 5:8) Oibe, Iesu sibona amo Dirava ese ita ia lalonamo henia bona iena turana ai ita lao diba.

Iesu be “hereva momokani.” Ia be hereva momokani sibona ia gwauraia, bona ena mauri lalona unai ia badinaia. Peroveta herevadia momo herea ia hagugurua; “Iesu amo idia ibounai be ‘oibe.’” (2 Korinto 1:20; Ioane 1:14) Unai peroveta herevadia ese ita ia durua, Dirava be iena ura hagugurua totona Iesu ia karaia gaukara ita lalopararalaia totona.​—Apokalupo 19:10.

Bona Iesu Keriso be “mauri.” Iena mauri goevadaena bona rara amo mauri davana ia karaia, unai ese dala ia kehoa “mauri korikorina,” anina be “mauri hanaihanai” ita abia diba. (1 Timoteo 6:12, 19; Efeso 1:7; 1 Ioane 1:7) Danu, Iesu ese ia hamomokania mase taudia milioni momo totona ia be “mauri,” badina do idia toreisi lou bona Paradaiso ai mauri hanaihanai do idia abia.​—Ioane 5:28, 29.

Ita ibounai be Iesu ese Dirava ena ura ia hagugurua totona ia karaia gaukaradia ita lalopararalaia bona laloa bada be namo. Iesu be “dala, hereva momokani bona mauri,” namona be mai moale ida ia oi dibaia noho.