Lagani 31 C.E. ena Pasova ia mai kahirakahira neganai, Galilea ai Iesu be hahediba gaukara dekenai ia bisi bada. Bena Dirava ena Taravatu hegeregerena, Ierusalema dekenai ia lao Pasova aria totona. To ia naria namonamo, badina Iuda taudia idia ura ia idia hamasea. (Ioane 7:1) Unai murinai Galilea dekenai ia giroa lou.

Iesu be reana Kaperanauma ai ia noho neganai, Ierusalema amo Farisea taudia bona taravatu hadibaia taudia be ia dekenai idia mai. Dahaka dainai? Idia ura itaia bema Iesu be tomadiho ena taravatu ta do ia utua, vadaeni do idia samania. Idia nanadaia: “Dahaka dainai emu hahediba taudia ese sene taudia edia kastom idia makohia? Hegeregere, idia aniani gwauraia neganai edia imana idia huria lasi.” (Mataio 15:2) Dirava ese ena taunimanima ia hamaoroa lasi, ‘edia imana do idia huria ela bona edia diuna.’ (Mareko 7:3) To Farisea taudia idia gwau bema ta be unai ia karaia lasi, unai be kerere badana.

Iesu ese maoromaoro edia samani koikoi herevana ia haerelaia lasi. To mai edia ura ida Dirava ena Taravatu idia utua karana ia gwauraia. Ia nanadaidia: “Dahaka dainai emui kastom karadia dainai, Dirava ena taravatu umui makohia? Hegeregere, Dirava ia gwau, ‘Emui tamana bona sinana umui matauraia,’ bona ‘Ena tamana eiava sinana ia hereva dika henia tauna be do idia hamasea.’ To umui gwau, ‘Bema ta be ena tamana eiava sinana dekenai ia gwau: “Lau dekenai ia noho gauna amo oi lau durua diba lasi, badina ia be lau gwauhamatalaia vadaeni Dirava dekenai do lau hariharilaia,” unai tauna ese ena tamana do ia matauraia lasi.’”​—Mataio 15:3-6; Esodo 20:12; 21:17.

Farisea taudia idia gwau, Dirava dekenai idia gwauhamatalaia moni, kohu, eiava gau ma ta be dubu helaga ena, unai dainai gaukara ma ta totona do idia gaukaralaia lasi. To momokani, unai tauna ese ia gwauhamatalaia harihari gauna be dubu totona lasi, to iena. Hegeregere, natuna mero ta ia gwau diba ena moni o kohu be “kobana,” anina be inai harihari gauna be Dirava o dubu helaga totona ia gwauhamatalaia vadaeni. Unai be hegeregere ia henia moni o tano be dubu helaga ena. Unai moni o kohu be natuna ese ia gaukaralaia diba, to ia gwau ena tama sina burukadia durua totona do ia gaukaralaia lasi. Unai dainai ia ese iena maduna ena tama sina dekenai ia dadaraia.​—Mareko 7:11.

Dirava ena Taravatu hagagevaia karana dekenai Iesu ia badu bona ia gwau: “Umui ese emui kastom karana amo Dirava ena hereva be anina lasi gauna ai umui halaoa. Umui koikoi taudia e, Isaia ese umui ia perovetalaia, ia gwau: ‘Inai taunimanima be edia udu bibina amo lau idia hanamoa, to edia kudouna be lau amo ia daudau momokani. Lau idia tomadiho henia kava noho, badina edia hahediba herevadia be taunimanima edia taravatu sibona.’” Farisea taudia be Iesu ese ia hereva auka henidia neganai, idia haere lasi. Unai dainai hutuma ia boiria ia kahirakahira idia mai totona. Ia gwau: “Umui kamonai bona inai hereva edia anina umui lalopararalaia. Tau ta ena uduna lalonai idia vareai gaudia ese ia idia hamiroa lasi, to iena uduna amo idia raka-lasi gaudia ese ia idia hamiroa.”​—Mataio 15:6-11; Isaia 29:13.

Gabeai ruma ta lalonai idia noho neganai, hahediba taudia ese Iesu idia nanadaia: “Oi laloparara Farisea taudia be emu hereva dainai idia badu, a?” Ia haere: “Egu guba Tamana ese ia hadoa lasi au ibounai be do ia kokia. Rakatanidia, idia be matakepulu hakaua taudia. Bema matakepulu tauna ta ese matakepulu tauna ma  ta ia hakaua, idia ruaosi be guri lalonai do idia moru.”​—Mataio 15:12-14.

Petero be hahediba taudia ma haida dainai ia henanadai, dahaka gaudia ese tau ta idia hamiroa neganai, Iesu ia hoa. Ia gwau: “Uduna dekenai idia vareai gaudia be bogana dekenai idia lao, bena toileti dekenai idia diho. Unai umui diba lasi, a? To uduna amo idia raka-lasi gaudia be kudouna amo idia mai, bona unai gaudia ese tau ta idia hamiroa. Hegeregere kudouna amo idia mai lalohadai dikadia be, ala-ala, heudahanai, matabodaga karadia, henaohenao, hereva koikoi, bona Dirava ena ladana hadikaia herevadia. Unai gaudia ese tau ta idia hamiroa, to imana huria lasi bona aniani karana ese tau ta ia hamiroa lasi.”​—Mataio 15:17-20.

Unai hereva amo Iesu ia hahedinaraia ta be aniani ia do hegaegaelaia o ia do ania lasi neganai ena imana ia huria be anina lasi, a? Lasi. To ia ese tomadiho gunalaia taudia ia gwauraia dika, badina Dirava ena taravatu maorodia idia laloa maragi, bona sene karadia idia laloa bada. Oibe, ta ena kudouna ai idia noho lalohadai dikadia ese ta ia hamiroa diba.