Kaperanauma ai, Iesu ese Farisea taudia ia hereva auka henia. Gabeai, unai dina tamona ai, ruma ia rakatania bona Galilea Gohuna dekenai ia lao, unuseniai hutuma idia haboua. Vadaeni bouti ta ia guia, kone ia rakatania bona taunimanima dekenai guba Basileia ia herevalaia matamaia. Haheitalai eiava parabole amo idia ia hadibaia. Kamonai taudia momo be Iesu ese ia herevalaia gaudia idia diba, unai dainai Basileia ena gaukara idauidau idia lalopararalaia.

Parabole ginigunana ai, Iesu ese hadohado tauna ena sivarai ia gwauraia. Uhe haida be dala badinai idia moru bona manu ese idia ania. Ma haida be nadi gabunai idia moru, unuseniai tano be sisina sibona. Uhe idia tubu neganai, edia ramudia be tano lalonai idia diho momokani lasi, bona dina siahu dainai idia kakoro bona mase. Uhe ma haida be ava ginigini huanai idia moru, bena idia tubu neganai ava ginigini ese idia koua. To haida be tano namona ai idia moru. Bona huahua idia atoa, “ta be huahua 100 momo ia atoa, ta be 60, bona ma ta be 30.”​—Mataio 13:8.

Parabole ma ta ai, Iesu ese Basileia be tau ta ese uhe ia hadoa karana ida ia hahegeregerea. Inai parabole ai, ena be hadohado tauna be ia mahuta eiava ia noga, to uhe be idia tubu. “Edena bamona ia tubu be ia diba lasi.” (Mareko 4:27) Sibodia idia tubu, anina idia havaraia, bena ia gogodia.

Bena Iesu ese hadohado karana ena parabole ihatoina ia gwauraia. Tau ta be uhe namodia ia hadoa, to “taunimanima idia mahuta noho lalonai,” ena inai tauna ese witi huanai ava dikadia  ia hadoa. Unai tau ena hesiai taudia ese idia nanadaia, bema unai ava do idia kokia. To ia haere: “Lasi, badina ava dikadia umui kokia neganai, witi danu umui kokia garina. Namona be ruaosi idia tubu hebou ela bona gogoa negana, bena gogoa negana ai gogoa taudia do lau hamaoroa: Ava dikadia umui kokia guna bona umui kwatua hebou, lahi dekenai gabua totona. Bena witi be egu haboua rumana lalonai do umui haboua.”​—Mataio 13:24-30.

Kamonai taudia momo be biru gaukara idia diba. Iesu ese danu momo idia diba gauna ma ta ia gwauraia, unai be mastadi uhe maragina. Unai uhe be au badana ai ia lao, unai amo ena rigi ai manu be edia ruma idia karaia diba. Ia gwau: “Guba Basileia be mastadi uhena ta bamona, tau ta ese ia abia bona ena uma lalonai ia hadoa.” (Mataio 13:31) Iesu be mastadi uhe hadoa dalana ia hadibaia lasi. To, unai parabole amo ia ese gau maragina momokani be gau badana ai ia lao dalana ia hahedinaraia.

Bena Iesu be momo idia diba gauna ma ta ia herevalaia. Ia gwau: “Guba Basileia be isti bamona, hahine ta ese ia abia bona paraoa disi toi ida ia mikisia.” (Mataio 13:33) Ena be taunimanima be isti ena gaukara idia itaia lasi, to paraoa ibounai ia hatubua diba. Unai hegeregerena, taunimanima be guba Basileia ena gaukara idia itaia lasi, to Basileia ena gaukara be ia bada noho.

Unai parabole ia gwauraidia murinai, Iesu ese hutuma ia siaia lao, bena ia noho rumana dekenai ia lao. Nega sisina murinai, ena hahediba taudia be ia dekenai idia mai, badina idia ura ena hereva ena anina idia diba.

Guna Iesu be parabole ia gaukaralaia bona hahediba taudia idia kamonai, to hari parabole momo ia gwauraia. Unai dainai idia nanadaia: “Dahaka dainai parabole amo idia oi hereva henia?”​—Mataio 13:10.

Unai ia karaia Baibel ena peroveta herevana ia hagugurua totona. Mataio ia gwau: “Parabole sibona amo idia ia hereva henia, unai amo peroveta tauna ia gwauraia herevana ia guguru, ia gwau: ‘Egu uduna amo parabole do lau gwauraia, matamana negana amo idia hunia gaudia do lau hahedinaraia.’”​—Mataio 13:34, 35; Salamo 78:2.

To badina ma haida dainai, Iesu ese parabole ia gaukaralaidia. Unai ese taunimanima edia kudouna ai idia noho lalohadai ia hahedinaraia. Momo be Iesu idia ura henia, badina sivarai ia gwauraia namonamo bona hoa karadia ia karaia. To idia ura lasi sibodia edia ura idia dadaraia bona Iesu murinai idia raka, edia Lohiabada bamona. (Luka 6:46, 47) Idia ura lasi edia lalohadai eiava kara idia haidaua. Ena be hereva idia kamonai, to idia laloa dobu lasi.

Iesu ese ena hahediba taudia ia haere henia, ia gwau: “Unai dainai parabole amo idia lau hereva henia, badina idia itaia to idia itaia kava, bona idia kamonai to idia kamonai kava, bona anina idia lalopararalaia lasi. Bona Isaia ia gwauraia peroveta herevana be idia dekenai ia guguru noho. Ia gwau: ‘. . . . Inai taudia edia lalona ia auka.’”​—Mataio 13:13-15; Isaia 6:9, 10.

To unai hereva be Iesu idia kamonai henia taudia ibounai totona lasi. Iesu ma ia gwau: “Umui moale badina emui matana idia itaia bona emui taiana idia kamonai. Umui lau hamaoroa momokani, peroveta taudia bona kara maoromaoro taudia momo be idia ura umui itaia gaudia idia itaia, to idia itaia lasi bona idia ura umui kamonai gaudia idia kamonai, to idia kamonai lasi.”​—Mataio 13:16, 17.

 Aposetolo 12 bona hahediba taudia ma haida be kudou-maoro taudia bona hereva idia kamonai. Unai dainai Iesu ia gwau: “Umui dekenai Dirava ese dala ia kehoa guba Basileia ena hunia hereva helagadia umui lalopararalaia totona, to idia dekenai dala ia kehoa lasi.” (Mataio 13:11) Hahediba taudia idia ura bada Iesu ena hereva ena anina idia lalopararalaia, unai dainai Iesu ese idia dekenai hadohado tauna ena parabole ena anina ia gwauraia.

Iesu ia gwau: “Uhe be Dirava ena hereva.” (Luka 8:11) Bona tano be taunimanima edia kudouna. Unai ese idia ia durua Iesu ena parabole ena anina idia diba totona.

Dala badinai idia moru uhe ia herevalaia, ia gwau: “Diabolo ia mai bona edia kudouna amo unai hereva ia kokia, unai dainai idia abidadama lasi bona mauri do idia abia lasi.” (Luka 8:12) Nadi momo gabunai idia moru uhe ia herevalaia neganai, ia ese mai moale ida hereva idia abia dae, to unai hereva be edia kudouna ai ia diho momokani lasi taudia edia kudouna ia herevalaia. “Basileia ena hereva dainai hisihisi eiava dagedage [idia] davaria neganai” idia moru. Oibe, reana edia ruma bese eiava ma haida amo “hahetoho” idia davaria neganai, edia abidadama idia rakatania.​—Mataio 13:21; Luka 8:13.

Ava ginigini huanai idia moru uhe be edena bamona? Iesu ese ena hahediba taudia ia hamaoroa, unai be hereva idia kamonai taudia ia herevalaia. To “inai nega oromana ena lalohekwarahi gaudia bona taga ena koikoi siahuna” ese idia ia koua. (Mataio 13:22) Ena be hereva idia kamonai bona idia abia dae, to anina idia atoa lasi, badina tanobada gaudia idia laloa bada bona Dirava idia laloa maragi.

Parabole dokonai, Iesu ese tano namona ia herevalaia. Unai ese hereva idia kamonai, idia abia dae momokani bona lalopararalaia taudia ia laulaulaia. Dahaka ia vara? “Huahua idia havaraia.” Edia noho dalana hegeregere, haida be idia buruka eiava gorere, idia ibounai be huahua idauidau idia havaraia. Haida be 100, haida be 60, bona ma haida be 30. Oibe, Dirava idia hesiai henia dainai hahenamo idia abia taudia be “mai kudou namo ida hereva idia kamonai murinai,  idia abia dae momokani bona mai haheauka ida huahua idia havaraia.”​—Luka 8:15.

Iesu ese parabole edia anina ia hahedinaraia neganai, reana ena hahediba taudia idia moale bada! Hari parabole edia anina idia diba. Iesu ia ura ena parabole edia anina idia lalopararalaia, unai amo ma haida dekenai hereva momokani idia hadibaia diba. Iesu ia henanadai: “Lamepa be bosea ta amo idia koua lasi eiava bedi ta henunai idia atoa lasi, ani? To lamepa be ena atoa gauna dekenai idia atoa, ani?” Unai dainai, Iesu ese ia hamaorodia: “Mai ena taiana tauna ia kamonai be namo.”​—Mareko 4:21-23.

Iesu ese hadohado tauna ena parabole ena anina ia gwauraia murinai, ena hahediba taudia idia ura diba ma haida idia abia. Idia noinoi: “Mani ai dekenai uma lalonai idia tubu ava dikadia ena parabole oi gwauraia hedinarai.”​—Mataio 13:36.

Unai idia karaia neganai, idia hahedinaraia idia be kone ai idia gini taudia amo idia idau. Idia be Iesu ena hereva idia kamonai, to idia ura lasi unai parabole edia anina idia tahua bona idia badinaia. Idia be parabole ena sivarai sibona idia moalelaia. Iesu ia itaia ena hahediba taudia edia kara be kone dekenai idia gini taudia amo ia idau, ia gwau:

“Hari umui kamonai herevadia do umui laloa namonamo. Badina bema umui kamonai namonamo do umui laloparara bona unai umui karaia neganai, gau momo do umui lalopararalaia.” (Mareko 4:24) Hahediba taudia be Iesu amo idia kamonai herevadia idia laloa bada. Idia ura diba ma haida idia abia dainai, Iesu ese idia dekenai gau ma haida ia hadibaia, bona hari idia laloparara. Iena hahediba taudia dekenai witi bona ava dikadia parabolena hahedinaraia totona, ia gwau:

“Uhe namona ia hadoa tauna be taunimanima ena Natuna. Witi umana be tanobada. Uhe namodia be Basileia ena natudia, to ava dikadia be Dika Tauna ena natudia. Ava dikadia ia hadoa inai tauna be Diabolo, gogoa negana be nega oromana ena dokona, bona gogoa taudia be aneru.”​—Mataio 13:37-39.

Iesu ese ena parabole ena kahana ta ta ia herevalaia murinai, do ia vara gauna ia herevalaia. Ia gwau inai nega ena dokonai, utua taudia eiava aneru, ese ava dikadia bamona Keristani taudia koikoidia be “Basileia ena natudia” amo do idia hapararaia. Bena “kara maoromaoro taudia” do idia gogoa bona “edia Tamana ena Basileia lalonai” do idia diaridiari. To “Dika Tauna ena natudia” be edena bamona? Idia be dika bada do idia davaria, bona do “idia taitai bona edia isena do idia koria.”​—Mataio 13:41-43.

 Bena Iesu ese ena hahediba taudia dekenai parabole ma toi ia gwauraia. Ginigunana be inai: “Guba Basileia be uma dekenai idia hunia dava bada kohuna ta bamona, tau ta ese ia davaria bona ia hunia lou. Bona ia moale dainai ia lao bona ena kohu ibounai ia hoihoilaia bona unai uma ia hoia.”​—Mataio 13:44.

Ma ia gwau: “Guba Basileia be pel nadi namodia ia tahua loaloa hoihoi tauna ta bamona. Dava bada pel nadi ta ia davaria neganai, ia lao bona karaharaga ena kohu ibounai ia hoihoilaia bona unai pel nadi ia hoia.”​—Mataio 13:45, 46.

Unai parabole rua ai, Iesu ia hahedinaraia tau ta be mai ura ibounai ida gau ibounai ia rakatania, dava bada kohu ia abia totona. Hoihoi tauna be “ena kohu ibounai” ia hoihoilaia, dava bada pel nadina ia hoia totona. Iesu ena hahediba taudia be dava bada pel nadi ena parabole idia lalopararalaia. Bona “uma dekenai idia hunia dava bada kohu” ia davaria tauna be “kohu ibounai” ia hoihoilaia unai uma ia hoia totona. Unai parabole rua ai, ta be ena kohu ibounai ia hoihoilaia dava bada gauna ia abia totona. Unai be hegeregere tau ta be ena kohu ibounai ia rakatania, unai amo Dirava kahirakahira ia lao diba. (Mataio 5:3) Iesu ena parabole idia kamonai taudia haida be edia kohu ibounai idia rakatania, unai amo Dirava kahirakahira idia lao bona Iesu ena hahediba taudia ai idia lao diba.​—Mataio 4:19, 20; 19:27.

Dokonai, Iesu ia gwau guba Basileia be reke bamona, davara dekenai idia negea bona gwarume idauidau idia abia. (Mataio 13:47) Gwarume idia hapararaia neganai, namodia be bosea ai idia haboua, to dikadia idia negea. Iesu ia gwau, inai tanobada ena dokonai unai do ia vara—aneru ese kara dika taudia be kara maoromaoro taudia amo do idia hapararaia.

Iesu ese ena hahediba taudia ginigunadia ia boiria “taunimanima haoda henia taudia” ai do idia lao neganai, ia be laulau dalanai ia haoda. (Mareko 1:17) To ia gwau reke ena parabole be vaira negana eiava “nega oromana ena dokona ai” do ia guguru. (Mataio 13:49) Unai dainai Iesu ena hereva idia kamonai aposetolo taudia bona hahediba taudia ma haida idia diba gabeai gau namodia momo do idia vara.

Iesu be bouti lalonai ia helai bona ia hereva henia taudia be diba ma haida idia abia. Iesu be mai ura ida “ena hahediba taudia sibona ida ia noho neganai, unai ibounai edia anina ia gwauraia hedinarai.” (Mareko 4:34) Ia be “ruma biaguna ta bamona, ena dava bada kohu haboua rumana amo gau matamatadia bona gunadia ia mailaia.” (Mataio 13:52) Iesu be unai parabole ia gaukaralaidia neganai, iena hadibaia dalana ia heagilaia lasi. To, ia be ena hahediba taudia dekenai dava bada hereva momokanidia ia hadibaia. Momokani, ia be ‘hadibaia tauna’ hereadaena!