Farisea taudia be sene taravatudia idia badinaia dainai, Iesu ese ia gwau henidia. Bena ia bona ena hahediba taudia be Poinikia ena siti rua Turo bona Sidono dekenai idia lao, unai be notwest kahanai, bona ia daudau.

Iesu be ruma ta ia davaria ia noho totona, to ia ura lasi taunimanima idia diba ia be unuseniai. To, unuseniai danu taunimanima ese idia itaia. Unai hanua dekenai ia vara Grik hahinena ese Iesu ia davaria bona ia noia: “Lohiabada, Davida ena Natuna e, lau oi hebogahisi henia. Lauegu natuna kekeni be demoni ese ia biagua dainai hisihisi bada ia mamia.”​—Mataio 15:22; Mareko 7:26.

Nega sisina murinai, hahediba taudia be Iesu idia noia: “Oi siaia lao, badina ia be iseda murinai ia mai bona ia boiboi noho.” Iesu ese unai hahine ia dadaraia ena badina ia gwauraia: “Dirava ese taunimanima ibounai dekenai lau ia siaia lasi, to Israela besena ena boio mamoe sibona dekenai lau ia siaia.” To unai hahine ia hesiku lasi. Ia be Iesu dekenai ia lao, ia tui diho bona ia gwau: “Lohiabada e, lau oi durua!”​—Mataio 15:23-25.

Unai hahine ena abidadama ia tohoa totona, Iesu ese Iuda taudia edia lalohadai kererena idau bese taudia dekenai ia gwauraia: “Natudia edia paraoa idia abia bona sisia maragidia dekenai idia negea be maoro lasi.” (Mataio 15:26) Iesu ese “sisia maragidia” ia herevalaia karana amo ia hahedinaraia, ia be Iuda lasi taudia ia hebogahisi henia. Iena vairana toana bona gadona ese unai idia hahedinaraia.

Unai hahine be ia badu lasi, to Iuda taudia edia lalohadai kererena ia lalopararalaia bona mai manau ida ia gwau: “Oibe Lohiabada, to sisia maragidia be edia biagudia edia teibolo amo idia moru momoru idia ania danu.” Iesu ia itaia ia be kudou-maoro hahinena bona ia gwau: “Hahine e, emu abidadama be bada herea. Emu ura gauna be oi dekenai do ia vara.” (Mataio 15:27, 28) Bona unai ia vara, herevana ena natuna kekeni be unuseni ia noho lasi! Hahine be ruma dekenai ia giroa neganai, ia itaia ena natuna kekeni be bedi dekenai ia hekure, bona ia namo—“demoni ese ia rakatania vadaeni”!​—Mareko 7:30.

Poinikia tanona amo Iesu bona ena hahediba taudia be Ioridane Sinavai idia hanaia. Bona Dekapoli kahanai idia ginidae, unai be Galilea Gohu ena not kahanai. Unuseni amo ororo ta idia daekau, to hutuma ese idia davaridia. Taunimanima ese Iesu dekenai aena dika, matakepulu, hereva diba lasi, bona gorere taudia idia mailaia. Gorere taudia be Iesu ena aena badinai idia atoa bona ia hanamodia. Taunimanima idia hoa, bona Israela ena Dirava idia hanamoa.

Iesu ese taia kudima bona hereva diba lasi tauna ta ia laloa bada. Reana hutuma huanai unai tauna ena hemami mani oi laloa. Iesu ia itaia unai tauna ia gari dainai, hutuma amo ia hakaua siri. Idia sibona idia noho neganai, Iesu ese do ia karaia gauna ia hahedinaraia. Iena ima kwakikwaki be unai tauna ena taiana lalonai ia atoa, bena ia kanudi murinai, unai tau ena malana ai ena imana ia atoa. Bena Iesu be guba ia itaia, bona ia gwau “Epata,” anina be “Oi kehoa.” Unai negai, unai tau ia kamonai bona ia hereva diba. Iesu ia ura lasi unai idia gwauraia loaloa, badina ia ura taunimanima ese ia karaia gaudia idia itaia bona sibona do idia kamonai, unai amo ia idia abidadama henia diba.​—Mareko 7:32-36.

Taunimanima idia itaia Iesu be gorere taudia ia hanamoa dainai, “idia hoa bada herea.”  Idia gwau: “Ia ese gau ibounai ia karaia namonamo. Ia dainai taia kudima taudia idia kamonai bona hereva diba lasi taudia idia hereva.”​—Mareko 7:37.