Kohu momo tahua karana dekenai Iesu ese ena hahediba taudia dekenai sisiba namona ia henia. To iena hahediba taudia sibona dekenai unai ia gwauraia lasi. Farisea taudia danu be unuseniai idia noho, bona Iesu ena hereva idia laloa bada be namo. Dahaka dainai? Badina idia be “moni idia ura henia bada.” Iesu ena hereva idia kamonai neganai, ia “dekenai edia vairana idia hadikaia.”​—Luka 15:2; 16:13, 14.

To Iesu ia gari lasi. Idia dekenai ia gwau: “Taunimanima vairanai umui gwau umui be kara maoromaoro taudia, to Dirava be emui kudouna ia diba. Badina taunimanima ese idia laloa mai anina bada gauna be anina lasi Dirava ena matanai.”​—Luka 16:15.

Farisea taudia be vaia taunimanima ese idia lalodia bada, to hari unai be do ia idau. Idia be hanamoa bada idia abia, idia taga, politikol gaukaradia idia durua, bona tomadiho dalanai taunimanima idia veria, to hari do idia noho kava. To Dirava idia ura dibaia taudia be hanamoa bada do idia abia. Iesu ese ia hahedinaraia gau haida do idia idau, ia gwau:

“Taravatu bona Peroveta Taudia edia hereva idia harorolaia ela bona Ioane ena nega. Bena unai nega amo idia harorolaia sivarai namona be Dirava ena Basileia, bona taunimanima idauidau ibounai be unai idia tahua goadagoada noho. Momokani, guba bona tanobada idia boio diba, to Taravatu ai leta ta do ia boio diba lasi, ela bona edia hereva ibounai idia guguru.” (Luka 3:18; 16:16, 17) Edena dala ai Iesu ia hahedinaraia gau haida do idia idau?

Iuda dubu gunalaia taudia be mai hekokoroku ida idia gwau Mose ena Taravatu idia badinaia. Mani oi laloa, Ierusalema ai, Iesu ese matakepulu tauna ena matana ia hanamoa neganai, Farisea taudia be mai hekokoroku ida idia gwau: “Ai be Mose ena hahediba taudia. Ai diba Dirava ese Mose ia hereva henia.” (Ioane 9:13, 28, 29) Dirava ese Mose amo Taravatu ia henia ena badina ta be, manau taudia be Mesia dekenai ia hakaudia lao, unai be Iesu. Ioane Bapatiso ese Iesu ia gwauraia Dirava ena Mamoe Natuna. (Ioane 1:29-34) Ioane ese ena hesiai gaukara ia matamaia negana amo, ogogami taudia huanai idia noho manau Iuda taudia be “Dirava ena Basileia” ena sivarai idia kamonai. Oibe, Dirava ena Basileia henunai idia ura noho bona heduru idia abia taudia totona “sivarai namona” ia noho.

Mose ena Taravatu ia guguru bona Mesia dekenai taunimanima ia hakaua lao. Bona hari unai Taravatu idia badinaia be anina lasi. Hegeregere, Taravatu ia gwau, badina idauidau dainai ta be ena adavana ia divosia diba, to Iesu ia gwau: “Iena hahine ia divosia bona hahine ma ta ia adavaia tauna be ia heudahanai, bona ena tau ese ia divosia hahinena ia adavaia tauna danu  be ia heudahanai.” (Luka 16:18) Unai hereva dainai Farisea taudia be idia badu dikadika!

Iesu ese parabole ta ia gwauraia bona unai ese ia hahedinaraia gau badadia haida do idia idau. Parabole ai, tatau rua edia noho dalana ia idau haraga. Unai parabole oi laloa neganai, namona be oi laloatao idia kamonai noho taudia huanai, Farisea taudia idia noho, idia be moni idia ura henia bada bona idia ura taunimanima ese idia hanamodia.

Iesu ia gwau: “Taga tauna ta ia noho bona nega ibounai dava bada pepol dabua ia karaia, bona dina ta ta ai ena mauri namona ia moalelaia. To noinoi tauna ta ladana Lasaro ia noho. Ia be toto amo ia honu, bona nega momo unai taga tauna ena geiti dekenai idia huaia lao. Ia ura taga tauna ena teibolo amo idia moru aniani ia ania. Danu, sisia idia mai bona ena toto idia demaria.”​—Luka 16:19-21.

Kamonai taudia idia diba Iesu ese ia herevalaia “taga tauna” be Farisea taudia, badina idia be moni idia ura henia. Iuda tomadiho gunalaia taudia danu idia ura dava bada bona hairai bada dabua idia hahedokilaia. Danu, idia be tomadiho dalanai idia taga, unai dainai Dirava ena gaukara idia karaia diba. Oibe, parabole ai Iesu ese dava bada pepol dabua ia hahedokilaia tauna ia herevalaia, unai ese ia hahedinaraia Farisea taudia be vaia idia ura lada bada idia abia. Bona dabua kurokuro ese ia hahedinaraia idia be sibona idia gwauraia kara maoromaoro taudia.​—Daniela 5:7.

 Unai taga bona hekokoroku taudia ese ladana maragi taudia be edena bamona idia laloa? Idia gwauraidia ‛am ha·’a′rets eiava tano taudia, idia be Taravatu idia diba lasi bona do idia hadibadia be anina lasi. (Ioane 7:49) Unai ese ia “noinoi tauna ta ladana Lasaro” dekenai ia vara gauna ia hahedinaraia, ia hitolo dainai “taga tauna ena teibolo amo idia moru aniani ia ania.” Taga tauna ese Lasaro ia laloa maragi hegeregerena, tomadiho gunalaia taudia ese lada maragi taudia idia laloa maragi, idia laloa Dirava be idia dekenai ia moale lasi.

Unai kara be nega daudau ia vara, to Iesu ia diba nega ia ginidae vadaeni unai taga tauna bamona taudia bona Lasaro bamona taudia huanai gau haida idia idau totona.

Iesu ese taga tauna bona Lasaro edia noho dalana ia idau karana ia herevalaia. Ia gwau: “Gabeai noinoi tauna ia mase, bena aneru ese idia huaia lao Aberahamo ena badinai. Taga tauna danu ia mase bona idia guria. Bona Mase Gurina dekenai ia hisihisi noho, bena ia roha isi bona daudau dekenai Aberahamo ia itaia bona Lasaro be ia badinai.”​—Luka 16:22, 23.

Idia kamonai taudia idia diba Aberahamo be idaunegai ia mase bona Mase Gurina ai ia noho. Baibel ese ia hahedinaraia Mase Gurina, eiava Sheol, ai idia noho taudia, Aberahamo danu, be gau ta idia itaia lasi o idia hereva lasi. (Hadibaia Tauna 9:5, 10) Vadaeni tomadiho gunalaia taudia ese Iesu ena parabole be edena bamona idia laloa? Moni ura henia tomadiho gunalaia taudia bona ladana maragi taudia dekena Iesu ena hereva ena anina be dahaka?

Iesu ese do ia idau gauna ia hahedinaraia, ia gwau, ‘Taravatu bona Peroveta Taudia edia hereva idia harorolaia ela bona Ioane Bapatiso ena nega, to unai nega amo idia harorolaia sivarai namona be Dirava ena Basileia.’ Ioane bona Iesu Keriso ese idia harorolaia sivaraina dainai, taga tauna bona Lasaro edia mauri ia idau.

Unai manau eiava ogogami taudia be nega daudau lalonai idia ura bada Dirava idia dibaia. To idia be Ioane Bapatiso bona gabeai Iesu ese ia harorolaia Basileia sivaraina idia abia dae bona unai ese idia ia durua. Guna, idia be tomadiho gunalaia taudia edia “teibolo amo idia moru aniani” sisina idia ania, anina be tomadiho gunalaia taudia amo diba sisina idia abia. To hari, idia be Baibel ena hereva momokani idia dibaia, Iesu ese ia hadibaia gaudia unai. Unai be hegeregere, hari Iehova Dirava ese idia ia lalonamo henia.

To, taga bona ladana bada tomadiho gunalaia taudia be Ioane bona gabeai Iesu ese ia harorolaia Basileia sivaraina idia dadaraia. (Mataio 3:1, 2; 4:17) Bona idia badu, badina unai sivarai ese Dirava ena hahemaoro karana ia hahedinaraia.  (Mataio 3:7-12) Bema Iesu bona ena hahediba taudia ese Dirava ena sivarai harorolaia gaukara idia hadokoa, moni ura henia tomadiho gunalaia taudia be do idia moale. Unai gunalaia taudia be parabole ese ia gwauraia taga tauna bamona, ia gwau: “Aberahamo, egu tamana e, lau oi hebogahisi henia bona Lasaro oi siaia ena ima kwakikwaki be ranu lalonai ia atoa bona egu malana ia hakerua, badina inai lahi lalonai lau hisihisi bada noho.”​—Luka 16:24.

To unai do ia vara lasi. Tomadiho gunalaia taudia momo be edia kara do idia haidaua lasi. Idia ura lasi “Mose bona Peroveta Taudia idia kamonai henia,” bema edia toretore idia duahia, do idia abia dae Iesu be Dirava ese ia abia hidi Mesiana bona King. (Luka 16:29, 31; Galatia 3:24) Idia be sibona idia hamanaua lasi bona idia ura lasi ogogami taudia, Iesu idia abia dae bona Dirava ena lalonamo idia abia taudia amo heduru idia abia. Iesu ena hahediba taudia be edia abidadama o hereva momokani idia rakatania lasi, tomadiho gunalaia taudia hamoalea totona. Iesu ena parabole ai, “Tamana Aberahamo” ese taga tauna dekenai ia gwauraia herevana ese unai ia hahedinaraia, ia gwau:

“Egu natuna e, oi laloatao oi mauri neganai emu gau namodia oi abia, to Lasaro be gau dikadia ia abia. Hari iniseniai ena lalona ia namo, to oi be oi hisihisi noho. Bona danu, guri badana be ai bona umui huanai ia noho, unai dainai iniseni amo umui dekenai idia ura lao taudia be idia lao diba lasi, bona taunimanima be unai kahana amo ai dekenai idia mai diba lasi.”​—Luka 16:25, 26.

Momokani, ogogami taudia bona dubu gunalaia taudia huanai unai senisi ia vara be maoro! Iesu ena huaia auna idia abia dae manau taudia be hari goada matamata idia abia bona Dirava idia dibaia noho. (Mataio 11:28-30) Hua haida murinai, taravatu matamata be Taravatu gwaubou ena gabu ia abia neganai, gau momo do idia idau. (Ieremia 31:31-33; Kolose 2:14; Heberu 8:7-13) Pentekoste 33 C.E. ai, Dirava ese lauma helaga ia bubua neganai, do ia hedinarai goevagoeva Dirava ese Iesu ena hahediba taudia ia lalonamo henia, to Farisea taudia bona edia bamodia lasi.