Iesu be Samaria eiava Galilea ai ia do noho. Farisea taudia ese idia nanadaia, edena negai Basileia do ia mai. Idia laloa Basileia ia mai neganai, aria badana do idia karaia. To Iesu ia gwau: “Dirava ena Basileia ena mai dalana be ibounai ese do idia lalopararalaia lasi, bona taunimanima be do idia gwau lasi, ‘Itaia, ia be iniseniai!’ eiava, ‘Itaia, ia be unuseniai!’ Kamonai! Dirava ena Basileia be emui huanai ia noho.”​—Luka 17:20, 21.

Reana haida idia laloa Iesu ena hereva anina be Basileia be Dirava ena hesiai taudia edia kudouna ai ia noho. To unai be momokani lasi, badina Basileia be Iesu ese ia hereva henia Farisea taudia edia kudouna ai ia noho lasi. To ia be edia huanai, badina Dirava ena Basileia do ia lohiaia King, Iesu, be edia huanai ia noho.​—Mataio 21:5.

Farisea taudia idia lao murinai, Iesu ese ena hahediba taudia dekenai do ia mai Basileiana ia gwauraia. Basileia do ia lohiaia negana ia herevalaia, to ia hamaorodia: “Nega ta do umui ura taunimanima ena Natuna ena dina ta umui itaia, to do umui itaia lasi.” (Luka 17:22) Iesu ese ia hahedinaraia taunimanima ena Natuna be Basileia ai do ia lohia negana be vaira nega ai do ia vara. Unai nega ia do mai lasi neganai, hahediba taudia haida be do idia ura bada unai nega idia itaia, to do idia naria ela bona Dirava ese ia abia hida negana ai taunimanima ena Natuna ia mai.

Iesu ma ia gwau: “Taunimanima be umui dekenai do idia gwau, ‘Itaia, ia be unuseniai!’ eiava, ‘Itaia, ia be iniseniai!’ Do umui lao lasi eiava edia murinai do umui heau lao lasi. Kevaru ena diari be guba ena kahana ta amo ela bona ma kahana ta dekenai ia hedinarai hegeregerena, unai dina ai taunimanima ena Natuna danu be unai bamona do ia hedinarai.” (Luka 17:23, 24) Iesu ena hahediba taudia be mesia koikoidia murinai idia lao lasi totona, edena bamona sibodia idia gimaia diba? Iesu ia gwau Mesia momokanina be kevaru ena diari bamona guba ena kahana amo ia lao ma kahana ta ai do ia hedinarai. Basileia do ia lohiaia negana be taunimanima ibounai ese do idia itaia.

Bena Iesu ese guna idia vara gaudia amo taunimanima edia kara vaira nega ai ia hahegeregerea, ia gwau: “Noa ena nega ai ia vara hegeregerena, taunimanima ena Natuna ena negai unai bamona do ia vara . . . Lota ena nega danu unai bamona ia vara: Idia aniani, idia inuinu, idia hoihoi, idia hadohado bona ruma idia haginia noho. To Lota be Sodoma ia rakatania dinana ai, guba amo lahi bona salipa be medu bamona ia diho, bona idia ibounai ia hadikaia ore. Taunimanima ena Natuna ia hedinarai dinana ai, unai bamona do ia vara.”​—Luka 17:26-30.

Iesu ia gwau lasi Noa bona Lota edia negai idia noho taudia be dika idia davaria badina  dina ta ta idia karaia gaudia idia karaia, hegeregere idia aniani, inuinu, hoihoi, hadohado, bona ruma idia haginia. Noa, Lota bona edia famili be unai gaudia haida idia karaia danu. To taunimanima ma haida be unai gaudia dekenai idia bisi bona Dirava ena ura bona idia noho negana idia laloa lasi. Unai dainai Iesu ese ena hahediba taudia ia hagoadaia, namona be Dirava ena ura idia laloa bada bona idia karaia. Idia dekenai roho mauri dalana ia hadibaia, unai amo Dirava ese vaira nega ai dika bada ia mailaia neganai, do idia mase lasi.

Namo lasi hahediba taudia be tanobada gaudia eiava idia “rakatania gaudia” ese edia lalona ia veria. Iesu ia gwau: “Unai dina ai, namo lasi ruma ataiai ia noho tauna ia diho ruma lalonai ena kohu ia abia totona. Unai hegeregerena, namo lasi uma dekenai ia noho tauna be ia rakatania gaudia totona ia giroa lou. Lota ena adavana umui laloatao.” (Luka 17:31, 32) Ia be damena nadi ai ia lao.

Iesu ese taunimanima ena Natuna be King ai do ia lao negana ma ia herevalaia, ena hahediba taudia ia hamaoroa: “Unai hanuaboi ai, taunimanima rua be geda tamona ai do idia hekure. Ta do idia abia lao, to ma ta do idia rakatania.” (Luka 17:34) Unai dainai haida be do idia mauri, to ma haida be dika do idia davaria.

Hahediba taudia idia henanadai: “Lohiabada e, unai be edeseniai do ia vara?” Iesu ia gwau: “Mase tauanina ia noho gabuna ai, ugava danu be unuseniai do idia haboua.” (Luka 17:37) Oibe, haida be ugava manu bamona. Unai hahediba taudia be Keriso korikorina, taunimanima ena natuna dekenai do idia haboua. Unai nega ai, Iesu ese mauri ia henia hereva momokanina be iena abidadama hahediba taudia dekenai do ia henia.