Iesu ia bapatiso negana amo inai be kahirakahira lagani toi bamona, bona lagani 32 C.E. be kahirakahira do ia ore. Vanegai sibona ia bona ena hahediba taudia be Ierusalema dekenai Ruma Maragidia Ena Aria totona idia lao. Reana idia be unai gabu kahirakahira idia do noho. (Luka 10:38; Ioane 11:1) Iesu ena hua oredia 6 lalonai, ia be Iudea o Ioridane Sinavai kahana, Perea ena distrik dekenai ia haroro. Idia be sivarai namona idia kamonai danu be namo.

Lagani 30 C.E. ena Pasova Ariana murinai, Iesu be hua haida lalonai Iudea ai ia haroro bena Samaria amo ia hanaia lao. Lagani 31 C.E. ena Pasova Ariana kahirakahira, Ierusalema ai Iuda taudia idia ura Iesu idia hamasea. Ia be lagani ta mai kahana, Galilea ena not kahanai ia haroro. Unai nega ai, momo be iena murinai idia raka. Galilea ai, Iesu ese ena aposetolo taudia ia treinia bona ia siaidia, ia hamaorodia: “Umui haroro, umui gwau: ‘Guba Basileia be ia kahirakahira vadaeni.’” (Mataio 10:5-7) Bena Iudea ai haroro gaukara badana ia hegaegaelaia.

Unai haroro gaukara hamatamaia totona, Iesu ese hahediba taudia 70 ia abia hidi bona rua rua ia siaidia. Iudea ai idia ese Basileia idia harorolaia. Unuseniai “uma aniani gogoa gaukarana be bada, to gaukara taudia be momo lasi.” (Luka 10:2) Idia be unai gabudia dekenai do idia lao guna, bona reana Iesu be gabeai do ia lao. Unai hahediba taudia 70 ese gorere taudia do idia hanamoa bona Iesu ese ia harorolaia sivaraina do idia gwauraia.

Idia be sinagoga sibona lalonai do idia haroro lasi. Iesu ese ia hamaorodia taunimanima edia ruma dekenai do idia lao. Idia dekenai ia gwauraia herevadia be lagani ta gunanai ena aposetolo 12 dekenai ia gwauraia danu. Ia gwau: “Ruma ta dekenai umui vareai neganai, inai umui hereva guna: ‘Mani inai ruma ai maino ia noho.’ Bona bema maino ia ura henia tauna ta ia noho, emui maino be ia latanai do ia noho.” Do idia harorolaia sivaraina be dahaka? Iesu ia gwau: “Idia umui hamaoroa: ‘Dirava ena Basileia be ia mai kahirakahira vadaeni.’”​—Luka 10:5-9.

Ia hamaorodia ibounai ese idia do idia abia dae lasi. To idia karaia gaukarana ese kamonai taudia do ia hegaegaelaia, unai amo Iesu ia mai neganai, momo do idia ura Lohiabada idia hedavari henia bona ia amo diba idia abia.

Iesu ena hahediba taudia 70 be Basileia idia harorolaia murinai, ia dekenai idia giroa. Mai moale ida ia idia hamaoroa: “Lohiabada e, emu ladana ai gaukaralaia dainai, demoni ese ai idia kamonai henia danu.” Unai ripoti namona  dainai Iesu ia moale, ia gwau: “Satani lau itaia, kevaru bamona guba amo ia moru vadaeni. Kamonai! Lau ese umui dekenai siahu lau henia gaigai bona doadoa do umui moia.”​—Luka 10:17-19.

Iesu ese iena murinai idia raka taudia ia hamaoroa idia be gau dikadia idia hanaia diba, gaigai bona doadoa idia moia bamona. Bona idia abia dae diba danu,vaira nega ai Satani be guba amo do ia moru. Danu, Iesu ese hahediba taudia 70 dekenai inai mai anina herevana ia gwauraia: “Lauma dikadia ese umui idia kamonai henia dainai umui moale lasi, to umui moale badina emui ladana be guba dekenai idia torea vadaeni.”​—Luka 10:20.

Iesu ia moale bada bona ena Tamana ia hanamoa, badina ia ese inai manau hesiai taudia ia gaukaralaia inai gaukara badana idia karaia totona. Bena ena hahediba taudia dekenai ia gwau: “Umui itaia noho gaudia idia itaia taudia be idia moale. Badina umui lau hamaoroa, peroveta taudia bona king momo be idia ura umui itaia noho gaudia idia itaia, to idia itaia lasi bona idia ura umui kamonai noho gaudia idia kamonai, to idia kamonai lasi.”​—Luka 10:23, 24.