Farisea taudia idia abia dae lasi Iesu ese matakepulu tauna ia hanamoa dainai, iena tama sina idia boiria. Iena tama sina idia diba idia be ‘sinagoga amo idia lulua’ diba. (Ioane 9:22) Bema unai ia vara, Iuda taudia ma haida do idia bamoa lasi, bona moni abia dalanai edia ruma bese do ia hekwarahi bada.

Farisea taudia ese henanadai rua idia henia: “Inai be emui natuna, umui gwau ia vara neganai ia matakepulu, a? To, edena bamona hari ia itaia diba?” Ena tama sina idia haere: “Ai diba inai be emai natuna bona ia vara neganai ia be matakepulu. To hari ia itaia diba dalana be ai diba lasi, bona daika ese ena matana ia kehoa be ai diba lasi.” Ena be edia natuna ese ia vara gauna be idia dekenai ia gwauraia, to edia hereva idia naria namonamo, idia gwau: “Ia umui nanadaia. Ia be tau badana vadaeni. Ia sibona do ia hereva be namo.”​—Ioane 9:19-21.

Unai dainai Farisea taudia ese unai tau idia boiria lou bona ia hagaria totona, idia gwau idia davaria hamomokania gaudia amo Iesu do idia samania. Idia oda henia: “Dirava vairanai oi hereva momokani. Ai diba unai tauna be kara dika tauna.” Edia hereva ia haloua, ia gwau: “Ia be kara dika tauna eiava lasi be lau diba lasi.” Ma ia gwau: “Lau diba gauna be inai, ena be guna lau matakepulu, to hari lau itaia diba.”​—Ioane 9:24, 25.

Farisea taudia idia ura Iesu dekenai kerere ta idia davaria dainai, idia gwau: “Oi dekenai dahaka ia karaia? Edena bamona emu matana ia kehoa?” Unai tau be mai gari lasi ida ia haere: “Umui lau hamaoroa vadaeni, to umui kamonai lasi. Dahaka dainai umui ura lau gwauraia lou? Umui danu umui ura iena hahediba taudia ai umui lao, a?” Farisea taudia be mai badu ida idia gwau: “Oi be unai tau ena hahediba tauna, to ai be Mose ena hahediba taudia. Ai diba Dirava ese Mose ia hereva henia, to ai diba lasi inai tauna be edeseni amo ia mai.”​—Ioane 9:26-29.

Ogogami tauna ia hoa, ia gwau: “Inai be hoa gauna momokani, umui diba lasi unai tauna be edeseni amo ia mai, to ia ese egu matana ia kehoa.” Bena idia dekenai Dirava ese ia lalonamo henia bona edia guriguri ia kamonai taudia ia gwauraia: “Ita diba Dirava be kara dika taudia ia kamonai henia lasi, to bema tau ta ese Dirava ia gari henia bona ena ura ia karaia, ia ese unai tauna ia kamonai henia. Guna negadia amo, tau ta ese mai matakepulu danu ia vara tauna ena matana ia kehoa sivaraina ita kamonai lasi.” Dokonai ia gwau: “Bema unai tauna be Dirava amo ia mai lasi, gau ta do ia karaia diba lasi.”​—Ioane 9:30-33.

Farisea taudia ese noinoi tauna ena hereva idia hakoikoia diba lasi dainai, idia gwau henia: “Oi be kara dika ai oi vara, to oi ura ai oi hadibaia, a?” Bena ia idia negea raka-lasi.​—Ioane 9:34.

Iesu be unai ia kamonai neganai, unai tauna ia tahua, bena ia nanadaia: “Oi ese taunimanima ena Natuna oi abidadama henia, a?” Ia namo tauna ia haere: “Mani lau oi hamaoroa ia be daika, unai amo ia lau abidadama henia diba?” Iesu be maoromaoro ia gwau: “Oi be ia oi itaia vadaeni, bona ia be oi ia hereva henia noho.”​—Ioane 9:35-37.

Unai tauna ia gwau: “Lohiabada e, oi lau abidadama henia.” Unai tauna be mai abidadama bona hemataurai ida Iesu vairanai ia tui diho. Bona Iesu be inai mai anina bada herevana ia gwauraia: “Inai hahemaoro karana totona lau be tanobada dekenai lau mai, idia itaia lasi taudia do idia itaia, bona idia itaia taudia be do idia matakepulu.”​—Ioane 9:38, 39.

Unuseniai idia gini Farisea taudia idia diba idia be matakepulu lasi. To idia laloa Iesu be idia ia herevalaia, badina ia gwau idia ese taunimanima  be dala maorona ai idia hakaua lasi. Unai dainai mai badu ida idia henanadai: “Ai danu be ai matakepulu, a?” Iesu ia gwau: “Bema umui matakepulu, umui dekenai kara dika ta do ia noho lasi. To umui gwau, umui itaia dainai, emui kara dika be umui latanai do ia noho.” (Ioane 9:40, 41) Bema Israela ai idia be hahediba taudia lasi, bona idia gwau Iesu be Mesia lasi, unai ita lalopararalaia diba. To idia be Taravatu idia diba dainai, Iesu idia dadaraia karana be kerere badana.