Kana ai headava aria ia ore murinai, Iesu be Kaperanauma dekenai ia lao. Iena sinana bona ena tadidia, Iamesi, Iosepa, Simona bona Iuda be ia ida idia lao.

To, dahaka dainai Iesu be Kaperanauma dekenai ia lao? Nasareta bona Kana be siti maragidia, to Kaperanauma be dala badana badinai bona kone kahanai ia noho siti badana ta. Danu, Iesu ena hahediba taudia matamatadia momo be Kaperanauma dekenai o kahirakahira siti ai idia noho. Iesu be unuseniai ia lao, badina unai amo edia gabu ai haroro gaukara dalana ia hadibaia diba.

Iesu be Kaperanauma dekenai ia noho neganai, hoa karadia ia karaia danu. Unuseniai bona kahirakahira idia noho siti momo be ia karaia gaudia edia sivarai idia kamonai. To, daudau lasi murinai, Iesu bona ena hahediba taudia, tomadiho idia laloa bada Iuda tatau unai, be Ierusalema dekenai do idia lao lagani 30 C.E. ena Pasova Aria karaia totona.

Ierusalema ena dubu helaga dekenai, Iesu ese kara idauna ta ia karaia, bona ena hahediba taudia idia hoa, badina guna unai kara idia itaia lasi.

Dirava ena Taravatu hegeregerena Israela taudia ese dubu helaga ai animal do idia bouboulaia. Bona vadivadi taudia be unuseniai aniani do idia abia be namo. Unai dainai Taravatu hegeregerena, gabu daudau amo Ierusalema dekenai idia lao vadivadi taudia be moni do idia mailaia bena unuseniai “boromakau, mamoe, nanigosi” bona gau ma haida idia hoia diba. (Deuteronomi 14:24-26) Unai dainai, Ierusalema ai hoihoi taudia be dubu helaga ena ariara badana dekenai animal eiava manu idia hoihoilaia. To, idia haida ese taunimanima idia koia badina unai animal edia davana idia habadaia momokani.

Iesu ia badu momokani bona moni idia senisia taudia edia moni ia bubua, edia pata ia girodia bona idia ia lulua. Bena ia gwau: “Inai gaudia be iniseni amo umui abia siri! Namo lasi egu Tamana ena ruma be maketi gabuna ai umui halaoa!”​—Ioane 2:16.

Iesu ena hahediba taudia ese unai idia itaia neganai, Dirava ena Natuna idia perovetalaia herevana idia laloa lou: “Emu ruma lau ura henia bada, egu lalona dekenai unai ura be lahi bamona.” To Iuda taudia ese ia idia nanadaia: “Ai dekenai dahaka toa do oi hahedinaraia, unai amo do ai diba oi be mai emu maoro inai gaudia oi karaia totona?” Iesu ia haere: “Inai dubu helaga umui hadikaia bona dina toi lalonai do lau haginia lou.”​—Ioane 2:17-19; Salamo 69:9.

Iuda taudia idia laloa Iesu ese Ierusalema ena dubu helaga ia herevalaia, unai dainai idia nanadaia: “Inai dubu helaga be lagani 46 lalonai idia haginia, to dina toi lalonai do oi haginia lou, a?” (Ioane 2:20) To, Iesu be unai hereva ia gwauraia neganai, ia be ena tauanina ia herevalaia. Lagani toi murinai, Iesu be mase amo ia toreisi lou neganai, ena hahediba taudia ese unai hereva idia laloa lou.