Iesu be dina 40 taunimanima lasi gabuna ai ia noho bona Galilea dekenai ia do lao lasi neganai, Ioane bapatiso dekenai ia lao guna. Iesu be Ioane kahirakahira ia raka lao neganai, Ioane ese ia poinia, bona ia ida idia gini taudia dekenai ia gwau: “Itaia, Dirava ena Mamoe Natuna, ia be tanobada taudia edia kara dika kokia tauna! Lau herevalaia tauna be inai: ‘Lau murinai ia mai tauna be egu vairanai ia lao vadaeni, badina lau do vara lasi neganai, ia be ia noho vadaeni.’” (Ioane 1:29, 30) Ena be Ioane ia vara guna bona Iesu be gabeai ia vara, to ia diba gunaguna Iesu be lauma tauna ta guba ai ia noho.

Wiki haida gunanai, Iesu ia lao bapatiso ia abia gwauraia neganai, Ioane ia diba lasi Iesu be Mesia ai do ia lao. Ioane ia gwau: “Lau danu be ia lau diba lasi, to lau mai bona ranu lalonai bapatiso lau karaia, unai amo ia be Israela taudia dekenai do ia hedinarai.”​—Ioane 1:31.

Ioane be ena kamonai taudia dekenai Iesu ia bapatisoa bona ia vara gauna ia herevalaia, ia gwau: “Lau itaia lauma helaga be pune manu bamona guba amo ia diho bona ia latanai ia helai. Ena be ia lau diba lasi, to lau ia siaia ranu lalonai bapatiso do lau karaia Tauna be lau dekenai ia gwau: ‘Do oi itaia, ia latanai lauma helaga ia diho bona ia helai, inai tauna be lauma helaga amo bapatiso do ia karaia.’ Bona lau itaia vadaeni, bona lau hamomokania inai tauna be Dirava ena Natuna”—Ioane 1:32-34.

Murina dinana ai, Ioane be ena hahediba taudia rua ida ia noho neganai, Iesu be idia dekenai ma ia mai. Ioane ia gwau: “Itaia, Dirava ena Mamoe Natuna!” (Ioane 1:36) Unai neganai, Ioane Bapatiso ida idia gini hahediba taudia rua be Iesu murinai idia raka. Idia ta be Andrea, bona ta be inai sivarai ia torea tauna, iena ladana danu be Ioane. Toana be inai Ioane be Iesu ena kasin, badina ia be Salome ena natuna. Salome be reana Maria ena sista, bona ena adavana be Sebedeo.

Iesu ia giroa bona ia itaia Andrea bona Ioane be ia murinai idia raka noho, bona idia ia nanadaia: “Dahaka umui tahua noho?”

Idia henanadai: “Rabi e, oi be edeseni oi noho?”

Iesu ia haere: “Umui mai bona do umui itaia.”​—Ioane 1:37-39.

Andrea bona Ioane be Iesu ida idia lao bona unai dina ai ia ida idia noho, unai be adorahi 4 oklok bamona. Andrea be ia moale bada dainai ena tadikakana Simona, ena ladana ma ta be Petero, ia tahua bona ia hamaoroa: “Ai be Mesia ai davaria vadaeni.” (Ioane 1:41) Vadaeni, Andrea ese Iesu dekenai Petero ia hakaua lao. Gabeai idia vara gaudia ese idia hahedinaraia, Ioane danu be ena tadikakana Iamesi ia tahua bena Iesu dekenai ia hakaua lao. To, Ioane ese unai sivarai be iena Evanelia bukana lalonai ia torea lasi.

 Unai dina murinai, Iesu ese Filipo ia davaria, ia be Betesaida tauna. Betesaida be Galilea Gohuna ena not kahana ai, Andrea bona Petero danu be unai siti amo. Iesu ese Filipo ia boiria: “Lau murinai oi raka.”​—Ioane 1:43.   

Filipo ese Natanaela, ena ladana ma ta be Batolomeo, ia davaria bona ia hamaoroa: “Ai be Iesu, Nasareta tauna Iosepa ena natuna ai davaria vadaeni. Mose ena Taravatu bona Peroveta Taudia edia toretore lalonai ia idia herevalaia.” Natanaela ia daradara bona Filipo dekenai ia gwau: “Gau namona ta be Nasareta amo ia mai diba, a?”

Filipo ese ia hamaoroa: “Oi mai bona itaia.” Iesu ia itaia Natanaela ia mai noho bona ia gwau: “Itaia, ia be Israela tauna momokanina, ia dekenai koikoi ta be lasi.”

Natanaela ia henanadai: “Edena bamona lau oi diba?”

Iesu ia haere: “Filipo ese oi ia do boiria lasi bona fig auna henunai oi helai noho neganai, oi lau itaia vadaeni.”

Natanaela ia hoa, bona ia gwau: “Rabi e, oi be Dirava ena Natuna, oi be Israela ena King.”

Iesu ia henanadai: “Lau oi abidadama henia badina lau gwau oi lau itaia fig auna henunai oi helai, a? Inai kara idia hereaia karadia ma haida do oi itaia.” Bena Iesu ia gwauhamata: “Umui lau hamaoroa momokani, do umui itaia guba be do ia kehoa, bona Dirava ena aneru be taunimanima ena Natuna dekenai do idia diho mai bona idia daekau lao.”​—Ioane 1:45-51.

Nega sisina murinai, Iesu bona ena hahediba taudia matamatadia be Ioridane Koura idia rakatania bona Galilea dekenai idia lao.