Iesu bona ena hahediba taudia be Iudea amo Galilea dekenai idia lao noho, Samaria distrik ena not kahana dala idia badinaia. Edia laolao amo idia hesiku bada. Dina tubua ai, Sukara siti kahirakahira dekenai ia noho ranu guri badinai idia laga-ani. Lagani handred momo gunanai, unai guri be Iakobo ese ia geia o haida ia hoia idia geia totona. Hari Palestine ai, unai ranu guri be Nablus siti kahirakahira ia noho.

Iesu be ranu guri badinai ia laga-ani lalonai, iena hahediba taudia be kahirakahira ia noho siti dekenai idia lao, aniani hoia totona. Idia lao murinai, Samaria hahine ta be ranu utua totona ia mai. Iesu be ia dekenai ia gwau: “Mani ranu sisina oi henia, lau inua totona.”​—Ioane 4:7.

Iuda bona Samaria taudia be idia inai heheni dainai, idia herevahereva lasi. Unai dainai hahine ia hoa bona ia henanadai: “Dahaka dainai lau amo ranu oi noia, oi be Iuda tauna, bona lau be Samaria hahinena?” Iesu ia haere: “Bema Dirava ena davana lasi harihari gauna oi diba bona bema oi diba daika be oi dekenai ia gwau, ‘Mani ranu sisina oi henia, lau inua totona,’ vadaeni ia do oi noia, bona oi dekenai mauri ranuna do ia henia.” Hahine ia gwau: “Tau badana e, oi dekenai ranu utua gauna ta ia noho lasi, bona guri be ia dobu. Vadaeni, edeseni amo mauri ranuna do oi abia? Oi be emai sene tauna Iakobo oi hereaia, a? Ia ese ai dekenai inai ranu guri ia henia, bona ia bona ena natudia bona boromakau be inai ranu guri amo ranu idia inua.”​—Ioane 4:9-12.

Iesu ia gwau: “Inai ranu idia inua taudia ibounai be do idia ranu mase lou. To lau henia ranuna ia inua tauna be do ia ranu mase lou lasi. Unai ranu be ia lalonai ranu guri ta bamona ai do ia lao bona do ia lohilohi dae, mauri hanaihanai ia henia totona.” (Ioane 4:13, 14) Ena be Iesu ia hesiku, to ia ura hahemauri hereva momokanidia be Samaria hahine dekenai ia harorolaia.

Hahine ia gwau: “Tau badana e, lau dekenai unai ranu oi henia, unai amo do lau ranu mase lou lasi, bona inai gabu dekenai ranu utua totona do lau mai loulou lasi.” Iesu be ena hereva ia haidaua, ia gwau: “Oi lao, emu adavana oi boiria bona inai gabu dekenai umui mai.” Hahine ia gwau: “Lau be adavana lasi.” To Iesu ena hereva dekenai ia hoa, badina Iesu ia gwau: “Oi hereva maoro, oi gwau, ‘Lau be adavana lasi.’ Badina oi be tatau 5 oi adavaia vadaeni, bona hari oi ida ia noho tauna be emu adavana lasi.”​—Ioane 4:15-18.

Hahine ia diba unai be momokani, unai dainai ia gwau: “Tau badana e, hari lau diba oi be peroveta tauna.” Bena ia hahedinaraia ia ura Dirava ena hereva ia diba. Edena dala ai? Ia gwau: “Emai sene taudia [Samaria taudia] be inai ororo [Gerisima Ororo, unai be idia kahirakahira] dekenai idia tomadiho, to umui [Iuda taudia] gwau taunimanima be Ierusalema dekenai idia tomadiho be namo.”​—Ioane 4:19, 20.

To Iesu be Samaria hahinena dekenai ia gwau: “Nega ta do ia mai, inai ororo bona Ierusalema dekenai danu Tamana do umui tomadiho  henia lasi.” Bena ia hamaoroa: “To nega ta do ia mai, bona ia ginidae vadaeni, tomadiho momokani taudia ese lauma ai bona momokani ai Tamana do idia tomadiho henia. Oibe, badina Tamana be unai bamona taudia ia tahua noho, ia idia tomadiho henia totona.”​—Ioane 4:21, 23, 24.

Iesu ena hereva ena anina be dahaka? Mai anina bada gauna Dirava dekenai be ia ita  tomadiho henia dalana, to ia ita tomadiho henia gabuna lasi. Hahine ia hoa bona ia gwau: “Lau diba Mesia be do ia mai, ia idia gwauraia Keriso. Ia mai neganai, ai dekenai gau ibounai do ia gwauraia hedinarai.”​—Ioane 4:25.

Bena Iesu ese mai anina bada hereva momokanina ia gwauraia: “Tauna be lau inai, oi lau hereva henia noho.” (Ioane 4:26) Mani unai oi laloa! Inai hahine be dina tubua ai ranu utua totona ia mai, bona Iesu ese ia hadibaia ia be Mesia! Unai be hahenamo badana, badina Iesu be ma haida dekenai unai ia do gwauraia lasi.

Iesu ena hahediba taudia be aniani ida Sukara amo idia giroa mai. Bona idia itaia Iesu be idia rakatania gabunai ia noho, unai be Iakobo ena ranu guri badinai, to ia be Samaria hahine ida ia herevahereva. Hahediba taudia idia ginidae neganai, hahine be ena ranu hodu ia rakatania bona siti dekenai ia lao.

Sukara dekenai ia ginidae neganai, Iesu ese ia dekenai ia gwauraia gaudia be taunimanima dekenai ia gwauraia. Idia ia hamaoroa: “Umui mai bona egu kara ibounai be lau dekenai ia gwauraia tauna umui itaia.” Bena edia ura habadaia totona ia nanadaidia: “Reana ia be Keriso, eiava?” (Ioane 4:29) Mose ena nega amo taunimanima momo be unai idia ura diba. (Deuteronomi 18:18) Unai dainai Sukara taudia idia ura lao Iesu idia itaia totona.

Hahediba taudia ese Iesu idia noia idia mailaia aniani ia ania totona. To ia gwau: “Lau be mai egu aniani, to unai umui diba lasi.” Hahediba taudia idia daradara, bona ta ta dekenai idia gwau: “Daika ese ia dekenai aniani ia henia?” Iesu be mai manau ida ena hahediba taudia dekenai ia hahedinaraia dahaka be mai anina bada, ia gwau: “Egu aniani be lau ia siaia tauna ena ura do lau karaia bona lau dekenai ia henia gaukarana do lau hagugurua.”​—Ioane 4:32-34.

 Iesu be witi utua gaukarana ia herevalaia lasi, badina unai be hua 4 murinai do idia karaia. To, Iesu be hahediba taudia halaoa gaukarana ia herevalaia, ia gwau: “Emui kwarana umui abia isi bona witi uma umui itaia, idia kurokuro vadaeni gogoa totona. Utua tauna be ena davana ia abia noho bona huahua be mauri hanaihanai totona ia haboua noho, unai amo hadoa tauna bona utua tauna be do idia moale hebou.”​—Ioane 4:35, 36.

Reana Iesu ia laloparara iena hereva dainai Samaria hahine be kara ta do ia karaia. Sukara hanua amo momo be unai hahine ena hereva dainai Iesu idia abidadama henia, badina ia hamaorodia: “Lau karaia gaudia ibounai be lau dekenai ia gwauraia.” (Ioane 4:39) Unai dainai, Sukara amo ranu guri dekenai idia mai neganai, Iesu idia noia do ia noho bona idia do ia hadibaia. Iesu be edia hereva ia abia dae bona dina rua Samaria dekenai ia noho.

Samaria taudia ese Iesu ena hereva idia kamonai neganai, momo be ia idia abidadama henia. Unai hahine idia hamaoroa: “Guna ai be emu hereva dainai ai abidadama, to hari ai danu ese ena hereva ai kamonai bona ai diba inai tauna be momokani tanobada ia hamauria tauna.” (Ioane 4:42) Oibe, Samaria hahine be haheitalai namona. Keriso ena sivarai ita harorolaia neganai, taunimanima edia lalona ita veria unai amo do idia ura hereva ma haida idia kamonai.

Laloatao hua 4 murinai be uma aniani gogoa negana. Unai hanua dekenai reana November eiava December hua lalonai bali idia utua. Anina be 30 C.E. ena Pasova aria murinai, Iesu bona ena hahediba taudia be hua 8 bamona Iudea dekenai taunimanima idia hadibaia bona idia bapatisoa. Hari edia hanua Galilea dekenai idia lao noho. Unuseniai dahaka do ia vara?