Iesu ia toreisi lou murinai, Galilea ena ororo ai, ena aposetolo taudia 11 ida ia hedavari. Hahediba taudia 500 mai kahana idia lao danu, idia haida be guna idia daradara. (Mataio 28:17; 1 Korinto 15:6) To Iesu ena hereva ese idia do ia durua unai amo idia abia dae ia be ia mauri lou.   

Iesu be idia ia hamaoroa Dirava ese guba bona tanobada lohiaia siahuna be ia dekenai ia henia. “Unai dainai umui lao,” ia gwau, “bese ibounai taudia be hahediba taudia ai umui halaoa, bona Tamana, Natuna, bona lauma helaga ladanai idia do umui bapatisoa, bona idia umui hadibaia, umui dekenai lau henia hahegani ibounai idia badinaia totona.” (Mataio 28:18-20) Oibe, Iesu ia mauri sibona lasi to ia ura inai sivarai namona be do idia harorolaia noho.   

Iesu ena murinai idia raka taudia ibounai—tatau, hahine, bona natudia—ese unai hahegani idia abia. Edia haroro bona hadibaia gaukarana be edia inai taudia ese idia koua toho, to Iesu be idia hagoadaia, ia gwau: “Dirava ese lau dekenai siahu ia henia, guba bona tanobada gaudia ibounai lau biagua totona.” Hahediba taudia dekenai unai hereva ena anina be dahaka? Ia hamaorodia: “Lau be dina iboudiai umui ida do lau noho ela bona inai nega oromana ena dokona.” Iesu ia gwau lasi sivarai namona idia harorolaia taudia ese hoa karadia do idia karaia. To idia be lauma helaga ese do ia durua.   

Iesu be ia toreisi lou bona “dina 40 lalonai” ena hahediba taudia dekenai ia hedinarai. Ia be taunimanima ta bamona ia hedinarai, “unai amo do idia hamomokania ia be ia mauri vadaeni,” bona “Dirava ena Basileia ia herevalaia.”​—Kara 1:3; 1 Korinto 15:7.

Aposetolo be Galilea ai idia noho neganai, Iesu ese ia hamaorodia Ierusalem dekenai do idia giroa. Idia hedavari neganai, Iesu ese ia hamaorodia: “Ierusalema umui rakatania lasi, to Tamana ese ia gwauhamatalaia gauna totona umui naria noho, lau amo unai umui kamonai vadaeni, badina Ioane be ranu amo bapatiso ia karaia, to dina haida murinai umui be lauma helaga amo bapatiso do umui abia.”​—Kara 1:4, 5.   

Gabeai, Iesu be ena aposetolo taudia ida ia hebou lou. Bena “idia ia hakaua lao ela bona Betania,” Olive Ororona ena ist kahana ai. (Luka 24:50) Ena be idia ia hamaoroa vadaeni do ia lao, to idia do laloa noho iena Basileia be tanobada ai do ia haginia.​—Luka 22:16, 18, 30; Ioane 14:2, 3.

Iesu idia nanadaia: “Lohiabada e, inai nega ai oi ese Israela dekenai basileia do oi haginia lou, a?” Bona ia haere ia gwau: “Tamana ese ena siahu hegeregerena ia atoa nega eiava ia abia hidi dinadia umui diba be anina lasi. To lauma helaga be umui latanai ia diho neganai, siahu do umui abia. Bena Ierusalema, Iudea ibounai, Samaria, bona tanobada ena daudau momokani gabudia dekenai lau do umui gwauraia hedinarai.”​—Kara 1:6-8.

Olive Ororona ai idia do noho neganai, Iesu be guba dekenai ia daekau matamaia. Bena ori ese ia koua dainai idia itaia lasi. Iesu ia toreisi lou neganai, ia be taunimanima ta bamona ia hedinarai. To hari guba dekenai ia daekau neganai lauma tauanina ia abia. (1 Korinto 15:44, 50; 1 Petero 3:18) Aposetolo taudia be ia idia itaia noho lalonai, “tatau rua mai dabua kurokuro” ida be idia badinai idia gini. Idia be aneru, bona idia gwau: “Galilea tatau e, dahaka dainai umui gini bona guba umui raraia  noho? Inai Iesu, umui amo Dirava ese guba dekenai ia abia daekau tauna, be hari umui itaia ia daekau hegeregerena do ia mai.” Kara 1:10, 11.   

Iesu ese tanobada ia rakatania neganai, kibi idia hiriria lasi taunimanima hadibaia totona, to ena hesiai taudia sibona ese idia itaia. Do ia mai karana be “ia daekau hegeregerena”—kibi do idia hiriria lasi taunimanima hadibaia totona, to ena hesiai taudia sibona do idia diba Basileia ai ia lohia vadaeni.

Aposetolo taudia be Ierusalema dekenai idia giroa. Dina haida lalonai, hahediba taudia be “Iesu ena sinana Maria bona Iesu ena tadikakadia” danu idia hebou. (Kara 1:14) Idia guriguri noho badina idia ura abia hidi hahediba tauna be Iesu ia karaia gaukara bona ena toreisi lou ia hamomokania. Unai amo ia ese Iuda Iskariote ena gabu do ia abia. (Mataio 19:28) Baibel lalonai inai be nega ginigabena gadara ta amo Dirava ena ura idia tahua. (Salamo 109:8; Aonega Herevadia 16:33) Mataia, reana guna Iesu ese ia siaia hahediba taudia 70 huanai ia noho tauna, idia abia hidi bona “ia be aposetolo taudia 11 ida idia duahia hebou.”​—Kara 1:26.   

Iesu ia daekau guba dekenai bena dina 10 idia ore murinai, Iuda taudia edia aria negana, unai be Pentekoste dinana, lagani 33 C.E. lalonai, hahediba taudia 120 bamona be Ierusalema ai, ataiai daiutu ta lalonai idia hebou. Karaharaga regena ta ia diho mai, lai bada ena regena bamona be ruma ia hahonua. Bona lahi ena malana bamona be hahediba taudia edia kwarana ataiai ia hedinarai. Bena idia ibounai be gado idauidau ai idia hereva matamaia. Iesu ese ia gwauhamatalaia lauma helagana idia abia unai!​—Ioane 14:26.