Iesu ia bapatiso murinai, ena be iena hesiai gaukara ia do hamatamaia lasi, to iena inai tauna, unai Diabolo ese ia tohoa loulou, badina ia ura lasi Iesu ia kwalimu. Gabeai, Iesu ese dika tauna be inai bamona ia herevalaia: “Tanobada ena lohia be ia mai noho, bona lau dekenai ia be siahu lasi.”​—Ioane 14:30.

Aposetolo Ioane be matahanai amo ‘huala badana, idaunegai gaigaina, iena ladana be Diabolo bona Satani’ dekenai do ia vara gauna ia itaia. Taunimanima edia inai tauna be guba amo do ia nega diho, bona “ia badu dikadika, badina ia diba iena nega be ia kwadogi.” (Apokalupo 12:9, 12) Badina namona ta dainai Keristani taudia idia abia dae, idia be unai ‘nega kwadogina’ lalonai idia noho, bona kahirakahira “huala badana, unai idaunegai gaigaina” be guri dobu masemase lalonai do idia nega diho, bona lagani 1000 lalonai Iesu be Dirava ena Basileia do ia lohiaia neganai, unai huala badana be gau ta do ia karaia lasi.​—Apokalupo 20:1, 2.   

Unai negai, tanobada dekenai dahaka do ia vara? Daidia do idia noho, bona edia noho dalana be edena bamona? Unai haerelaia totona, Iesu ese mamoe bona nanigosi parabolena ia herevalaia. Iesu ena tadikaka idia kara namo henia bona idia ida idia gaukara hebou mamoe bamona kara maoromaoro taudia dekenai vaira nega ena hahenamo ia hahedinaraia. Bona ia idia dadaraia nanigosi bamona taudia dekenai do ia vara gauna danu ia hahedinaraia. Iesu ia gwau: “Bona unai [nanigosi] taudia be do idia mase ela bona hanaihanai, to kara maoromaoro taudia [mamoe] be mauri hanaihanai do idia abia.”​—Mataio 25:46.

Unai amo Iesu be ena badinai idia tauadae kara dika tauna dekenai ia gwauraia herevana  ita lalopararalaia. Iesu be ena abidadama aposetolo taudia dekenai ia karaia gwauhamata, guba Basileia ai do idia lohia be ia dekenai ia gwauraia lasi. To, Iesu ese unai helalo-kerehai tauna dekenai ia gwauhamata: “Hari dina oi lau hamaoroa momokani, oi be lau ida Paradaiso ai do ita noho.” (Luka 23:43) Unai tauna be vaira negai, Paradaiso o uma hairaina dekenai do ia noho ena helaro ia abia. Momokani, vaira negai Iesu ese taunimanima ia hahemaoro henia neganai, mamoe bamona taudia be Paradaiso ai “mauri hanaihanai” do idia abia danu.

Unai be aposetolo Ioane ese ia gwauraia tanobada ai do ia vara maurina ida ia hegeregere. Ia gwau: “Dirava ena palai rumana be taunimanima ida ia noho, bona ia be idia ida do ia noho, bona idia be ena taunimanima ai do idia lao. Bona Dirava be idia ida do ia noho. Bona ia ese mata ranu ibounai be edia matana amo do ia dahua ore, bona mase, lalohisihisi, taitai, bona hisihisi be do idia ore. Gau gunadia be idia ore vadaeni.”​—Apokalupo 21:3, 4.

Unai kara dika tauna ese Paradaiso ai mauri ia moalelaia totona, mase amo ia toreisi lou guna be namo. To ia sibona lasi, mase taudia ma haida danu be do idia toreisi lou. Iesu ese unai ia hahedinaraia, ia gwau: “Nega ta ia mai noho, gara gabudia ai idia noho taudia ibounai ese ena gadona do idia kamonai bona do idia raka-lasi. Kara namo idia karaia taudia be do idia toreisi lou mauri abia totona, to kara dika idia karaia taudia be do idia toreisi lou hahemaoro abia totona.”​—Ioane 5:28, 29.

To Iesu ida guba ai do idia noho taudia ma haida dekenai dahaka do ia vara? Baibel ia gwau: “Idia be Dirava bona Keriso edia hahelaga taudia bona lagani 1,000 lalonai Keriso ida do idia lohia.” (Apokalupo 20:6) Iesu ida do idia lohia taudia be guna tanobada ai idia noho tatau bona hahine. Unai dainai mai hebogahisi bona laloparara ida do idia lohia.​—Apokalupo 5:10.

Iesu be ena mauri davalaia boubouna amo tanobada ai idia noho taudia edia kara dika do ia kokia. Ia bona ia ida do idia lohia taudia ese abidadama taudia do idia durua idia goevadae totona. Oibe, taunimanima be mauri do idia moalelaia, unai be Dirava ena ura ginigunana hegeregerena. Ia ese Adamu bona Heva ia hamaoroa edia bese do idia havaraia bona tanobada ibounai do idia hahonua. Danu, Adamu ena kara dika ese ia havaraia mase be do ia ore!   

Iesu ese Iehova ia gwauraia gaudia ibounai be unai negai do ia hagugurua. Lagani 1000 Lohia Negana ia ore neganai, Iesu ese Basileia bona goevadae taudia ibounai be ena Tamana dekenai do ia henia. Aposetolo Paulo ese Iesu ena manau karana ia herevalaia, ia gwau: “Dirava ese gau ibounai be Natuna henunai do ia atoa murinai, Natuna be sibona do ia atoa Dirava henunai, ia dekenai gau ibounai ia henia Diravana unai. Unai dala amo, Dirava sibona be gau ibounai edia Lohia ai do ia lao.”​—1 Korinto 15:28.

Oibe, Iesu be gaukara badana ia karaia Dirava ena ura ia hagugurua totona. Bona unai ura be do idia guguru noho ela bona hanaihanai, bona Iesu be iena hereva hegeregerena do ia gaukara noho, badina ia sibona ia gwau: “Dala be lau, hereva momokani be lau bona mauri be lau.”​—Ioane 14:6.