1-3. (a) Tama sina bona edia beibi be dahaka kara idia hahedinaraia, bona idia amo dahaka ita dibaia? (b) Tau ta be ita dekenai lalokau ia hahedinaraia neganai, dahaka ita karaia, bona dahaka henanadai ita laloa be namo?

 TAMA SINA be edia beibi ena kiri idia itaia neganai, idia moale. Nega momo edia vairana be beibi ena vairana kahirakahira dekenai idia atoa, idia hereva bona kiri henia. Idia ura bada natuna ena kiri idia itaia. Bena nega sisina murinai, idia itaia beibi ia kiri. Beibi ena kiri toana ese ena lalokau ia hahedinaraia, badina ena tama sina edia lalokau ia mamia.

² Beibi ena kiri ese taunimanima edia kara badana ta ia hadibaia. Vaia, ita idia lalokau henia taudia ita lalokau henia. Iehova ese ita be unai bamona ia karaia. (Salamo 22:9) Ita tubu daekau neganai, dala momo ai ita idia lalokau henia taudia amo lalokau hahedinaraia dalana ita dibaia. Reana oi maragi neganai emu tama sina, varavara, eiava turadia ese oi dekenai lalokau idia hahedinaraia dalana, oi laloatao diba. Unai ese emu kudouna dekenai hemami namona ia havaraia, ia bada, bona emu kara amo ia hedinarai. Unai dainai, oi ese idia oi lalokau henia danu. Emu hetura karana Iehova Dirava ida be unai bamona danu, a?

³ Baibel ia gwau: “Ita ese lalokau ita hahedinaraia, badina ia ese ita ia lalokau henia guna.” (1 Ioane 4:19) Inai buka ena Kahana 1 ia lao 3 dekenai oi itaia, Iehova Dirava ese lalokau dalana ai ena siahu, hahemaoro goeva, bona aonega be emu namo totona ia gaukaralaia. Bona Kahana 4 dekenai, ia ese dala namodia momo ai ena lalokau be taunimanima ibounai—bona oi totona—ia hahedinaraia. Unai dainai namona be ita sibona ita nanadaia, ‘Edena dala ai do lau hahedinaraia Iehova lau lalokau henia bada?’

4. Taunimanima ese Dirava lalokau henia ena anina be edena bamona idia laloa?

⁴ Lalokau ia Hamatamaia Tauna, Iehova, ia diba momokani lalokau be mai ena siahu ma haida ia durua kara namo idia hahedinaraia totona. Unai dainai, herevana abidadama lasi taudia idia gwau-edeede loulou, to Iehova ia diba ena lalokau dainai haida be ia do idia lalokau henia danu. Bona, momokani taunimanima milioni be unai bamona idia karaia vadaeni. To madi, inai tanobada dikana ena tomadiho ese taunimanima dekenai lalohadai kereredia idia hadibaia dainai, Dirava lalokau henia karana ena anina idia diba lasi. Taunimanima momo idia gwau Dirava idia lalokau henia, to unai lalokau be hereva amo sibona. Oibe, Dirava lalokau henia karana be unai bamona ia matamaia diba, beibi ta ese ena lalokau ena tama sina totona be kiri ta amo ia hahedinaraia hegeregerena. To taunimanima badadia dekenai, lalokau ena anina be unai sibona lasi.   

5. Baibel ese Dirava lalokau henia ena anina be edena bamona ia gwauraia, bona dahaka dainai unai hereva ena anina ita ura henia be namo?

⁵ Iehova ese ia ita lalokau henia karana ena anina ia hahedinaraia. Iena Hereva ia gwau: “Dirava ita lalokau henia ena anina be inai, iena taravatu ita badinaia.” Vadaeni, Dirava lalokau henia karana be iseda kara amo ita hahedinaraia be namo. Momokani, taunimanima momo idia ura lasi kamonai karana idia hahedinaraia. To unai siri tamona be ma ia gwau: “[Dirava ena] taravatu be metau lasi.” (1 Ioane 5:3) Iehova ena taravatu bona hakaua herevadia be iseda namo havaraia totona, ita ia hahisia totona lasi. (Isaia 48:17, 18) Dirava ena Hereva be hakaua hereva amo idia honu, unai ese ita ia durua ia kahirakahira ita lao totona. Edena dala ai? Namona be iseda hetura karana Dirava ida ena kahana toi ita riviulaia. Unai be Ia ida ita herevahereva, ita tomadiho henia bona ia ita tohotohoa karana.

6-8. (a) Edena dala ai Iehova ita kamonai henia diba? (b) Baibel ita duahia neganai, ena hereva be edena bamona ita hamauria diba?

⁶ Karoa 1 be inai henanadai amo ia matamaia, “Dirava ida oi herevahereva karana be oi laloa diba, a?” Guna ita herevalaia bamona, inai be lalohadai ta sibona lasi. Mose be Dirava ida ia herevahereva. Ita be edena bamona? Hari Iehova ese ena aneru ia siaia lasi taunimanima ida idia herevahereva totona. To hari, Iehova be dala hereadaena amo ita ia hereva henia. Edena dala ai Iehova ita kamonai henia diba?

⁷ “Toretore Helagadia be Dirava ena siahu amo idia torea” dainai, Iehova ena Hereva Baibel ita duahia neganai, ia ita kamonai henia. (2 Timoteo 3:16) Unai dainai, Salamo torea tauna ese Iehova ena hesiai taudia ia hagoadaia, “dina bona hanuaboi ai” do idia duahia. (Salamo 1:1, 2) Unai bamona ita karaia totona do ita hekwarahi. To unai bamona hekwarahi ese anina namona ia havaraia. Karoa 18 dekenai ita itaia bamona, Baibel be iseda guba Tamana amo ia mai revareva hereadaena ta bamona. Unai dainai ita duahia be gaukara aukana ta lasi. Baibel ita duahia neganai, namona be ita hamauria bamona. Unai be edena bamona ita karaia diba?

⁸ Baibel sivarai oi duahidia neganai, emu lalona ena matana amo oi itaia taunimanima idia noho bona idia vara gaudia. Edia mauri, noho dalana bona edia lalohadai oi tahua bona oi lalopararalaia. Bena, oi duahia sivaraina oi laloa dobu, bona sibona oi nanadaia: ‘Inai sivarai ese lau dekenai dahaka ia hadibaia Iehova bona ena kara dekenai? Iehova ia ura dahaka hakaua herevana lau dibaia, bona edena bamona egu mauri lalonai lau badinaia diba?’ Duahia, laloa dobu, bona badinaia—unai bamona oi karaia neganai, Dirava ena Hereva be oi dekenai do ia mauri bamona.​—Salamo 77:12; Iamesi 1:23-25.

9. “Hesiai tauna mai ena kamonai, bona mai ena aonega” be daika, bona dahaka dainai unai “hesiai tauna” ita kamonai be gau badana?

⁹ Iehova ese “hesiai tauna mai ena kamonai bona mai ena aonega” amo ita ia hereva henia danu. Iesu ia peroveta bamona, horoa Keristani taudia haida sibona ia abia hidi, inai nega dikana  ai “nega korikori ai edia aniani do ia henia” totona. (Mataio 24:45-47) Baibel ena diba maoromaoro abia totona idia hegaegaelaia bukadia ita duahia, bona Keristani hebou badadia bona maragidia dekenai ita lao neganai, unai hesiai tauna ese Dirava ena hereva amo ita ia ubua. Unai be Keriso ena hesiai tauna dainai, mai aonega ida Iesu ena hereva ita badinaia, ia gwau: “Emui kamonai karana do umui gimaia.” (Luka 8:18) Unai hesiai tauna ita kamonai henia badina ita laloparara, unai be Iehova ese ita ia hereva henia dalana ta.

10-12. (a) Dahaka dainai guriguri be harihari gauna hereadaena Iehova amo? (b) Edena dala ai Iehova ese ia abia dae dalana ai ia ita guriguri henia, bona dahaka dainai ita diba momokani iseda guriguri ia laloa bada?

¹⁰ To Dirava ida ita herevahereva karana be edena bamona? Iehova ita hereva henia diba, a? Unai lalohadai ita hoalaia, ani? Bema emu tano ena siahu lohia tauna ta dekenai oi lao bona oi ura emu hekwakwanai haida oi herevalaia, oi laloa do oi hereva henia diba, a? Nega haida, unai bamona kara dainai dika bada oi davaria diba! Eseta bona Morodekai edia negai, bema tau ta be king ese ia boiria lasi, to king dekenai ia lao, unai tauna ia hamasea diba. (Eseta 4:10, 11) Mani oi laloa, iunives ena Siahu Ibounai Lohiabadana vairanai oi mai, bona oi itaia tanobada ena siahu bada taudia be “kwadi bamona.” (Isaia 40:22) Ia dekenai ita lao totona ita gari, a? Lasi vaitani!

¹¹ Iehova ese dala ta ia kehoa vadaeni, unai be guriguri dalana amo, ia kahirakahira ita lao. Natuna maragina danu be mai abidadama ida Iesu ena ladana amo Iehova ia guriguri henia diba. (Ioane 14:6; Heberu 11:6) To, guriguri ese ita ia durua iseda lalohadai bona hemami korikoridia ita gwauraia totona—ita herevalaia diba lasi lalohisihisi gaudia danu ita gwauraia diba. (Roma 8:26) Iehova ia ura lasi guriguri latadia o hereva hairaidia ita gwauraia. (Mataio 6:7, 8) To, Iehova ese guriguri ena daudau bona nega hida ia ita hereva henia ena hetoana ia atoa lasi. Iena Hereva ese ita ia hagoadaia ‘nega ibounai ita guriguri’ totona.​—1 Tesalonika 5:17.

¹² Namona be ita laloatao, Iehova sibona be ‘Guriguri Kamonai Diravana,’ bona ita ia kamonai henia neganai iseda  hemami ia laloa danu. (Salamo 65:2) Iehova ia hesiku ena kamonai hesiai taudia edia guriguri ia kamonai totona, a? Lasi, edia guriguri be mai moale ida ia kamonai. Iena hereva ese unai bamona guriguri be bonana namona muramura ida ia hahegeregerea, idia gabua neganai, ena kwalahu mai ena bonana namona be guba dekenai ia daekau. (Salamo 141:2; Apokalupo 5:8; 8:4) Unai amo ita diba mai momokani ida ita gwauraia guriguri be iseda Siahu Ibounai Lohiabadana ia hamoalea, unai be hagoadaia gauna, ani? Unai dainai, bema oi ura Iehova kahirakahira oi lao, mai manau ida dina ta ta ai ia oi guriguri henia. Emu kudouna dekenai idia noho gaudia ibounai oi gwauraia hedinarai; gau ta oi hunia lasi. (Salamo 62:8) Oi laloa momo gaudia, oi moalelaia gaudia, emu tanikiu hereva bona hanamoa herevadia be emu guba Tamana dekenai oi gwauraia. Unai amo, emui hetura karana do ia ida be do ia goada.

13, 14. Iehova ita tomadiho henia ena anina be dahaka, bona dahaka dainai unai bamona ita karaia be maoro?

¹³ Iehova Dirava ida ita herevahereva karana be, iseda turana eiava varavara ta ita kamonai bona ita haere henia karana bamona lasi. Ita be mai hemataurai ida Iehova ita tomadiho henia noho, bona ia sibona ese unai hanamoa ia abia be maoro. Iseda mauri ibounai lalonai tomadiho momokani ita badinaia. Unai dala amo mai kudouna ibounai ida, Iehova ita lalokau henia bona badinaia karana ita hahedinaraia, danu unai ese Iehova ena abidadama taudia ibounai, guba bona tanobada ai ia hatamonaia. Aposetolo Ioane be matahanai ta lalonai ia itaia, aneru ta ese inai hahegani ia harorolaia: “Guba, tanobada, davara, bona idia lohilohi ranudia ia karaia Diravana do umui tomadiho henia.”​—Apokalupo 14:7.

¹⁴ Dahaka dainai Iehova ita tomadiho henia be namo? Ita herevalaia vadaeni kara idauidau mani oi laloa, helaga, siahu, sibona biagua karana, hahemaoro goeva, boga auka, hebogahisi, aonega, manau, lalokau, badinaia karana bona kara namo.  Ita itaia Iehova be unai kara namodia ta ta ia hahedinaraia goevagoeva Diravana. Ena kara ibounai ita lalopararalaia toho neganai, ita itaia ia be ita laloa bada Tauna Badana ta sibona lasi. Ia be mai ena hairai bada, ita ia hereaia momokani. (Isaia 55:9) Ita daradara lasi, Iehova be iseda Siahu Ibounai Lohiabadana maorona, bona ia ita tomadiho henia be maoro. To, edena dala ai Iehova ita tomadiho henia be namo?

15. Edena dala ai Iehova be mai “lauma ai bona momokani ai” ita tomadiho henia diba, bona Keristani heboudia ese dahaka dala namona ia kehoa?

¹⁵ Iesu ia gwau: “Dirava be Lauma, bona ia idia tomadiho henia taudia ese lauma ai bona momokani ai ia idia tomadiho henia be namo.” (Ioane 4:24) “Lauma ai” o mai abidadama ida Dirava ita tomadiho henia be namo. Iena lauma helaga ese ita ia hakaua bona unai lauma ena hakaua dalana hegeregerena ia ita tomadiho henia. Ita moale, iseda tadikaka taihu  ida “lauma ai bona momokani ai” Iehova ita tomadiho henia be namo herea. (Heberu 10:24, 25) Iehova hanamoa anedia ita abia, ita guriguri henia hebou, ena hereva ita kamonai bona haere ita henia neganai, tomadiho goevana lalonai iseda lalokau ia dekenai ita hahedinaraia.

16. Keristani taudia momokanidia be dahaka hahegani badana idia abia, bona dahaka dainai ita ura unai hahegani ita badinaia?

¹⁶ Haroro gaukara lalonai ma haida dekenai Iehova ita herevalaia neganai, ia ita tomadiho henia danu. (Heberu 13:15) Momokani, Iehova ena Basileia sivarai namona harorolaia gaukarana be Keristani taudia momokanidia ese idia abia hahegani badana. (Mataio 24:14) Mai moale ida unai ita karaia badina Iehova ita lalokau henia. “Inai nega oromana ena dirava,” Satani Diabolo, ese taunimanima edia “lalona ia hadiburaia,” bona Iehova ia hadikaia koikoi herevadia ia gwauraia. Unai gaudia ita laloa neganai, ita ura iseda Dirava ena Witnes taudia bamona ita gini bona unai hereva koikoidia ita hamaoromaoroa, ani? (2 Korinto 4:4; Isaia 43:10-12) Bona Iehova ena kara namodia ita lalohadailaia neganai, ita mamia momokani ita ura ma haida dekenai ia ita herevalaia, ani? Oibe, iseda guba Tamana ita diba bona lalokau henia hegeregerena, ma haida ita durua unai bamona idia karaia totona, be hahenamo badana.

17. Edena dala haida ai Iehova lalokau henia bona matauraia karana ita hahedinaraia, bona dahaka dainai mai kudouna ibounai ida Iehova ita tomadiho henia?

¹⁷ Iehova tomadiho henia karana lalonai gau ma haida danu ita karaia. Unai tomadiho karana be iseda mauri ena kahana ibounai ia biagua. (Kolose 3:23) Bema ita abia dae momokani Iehova be iseda Siahu Ibounai Lohiabadana, vadaeni gau ibounai lalonai ena ura ita badinaia—iseda ruma bese maurina lalonai, gaukara gabuna ai, ma haida ita kara henia neganai, bona sibona ita noho neganai danu. Do ita ura mai iseda ‘kudouna ibounai’ ida Iehova ita hesiai henia. (1 Sivarai 28:9) Unai bamona tomadiho karana lalonai, lalorua eiava mauri dalana rua ita badinaia lasi, anina be namo lasi Iehova ita hesiai henia, to hehuni ai kara dika badadia ita karaia. Dirava badinaia karana ese unai bamona koikoi ia koua; bona lalokau dainai  unai karadia ita dadaraia momokani. Danu, Dirava gari henia karana ese ita ia durua. Baibel ese unai kara be Iehova tura henia karana ida ia gwauraia hebou.​—Salamo 25:14.

18, 19. Dahaka dainai ita diba goevadae lasi taudia ese Iehova Dirava idia tohotohoa diba?

¹⁸ Inai buka ena kahana ta ta edia karoa dokodia ese ita dekenai ‘Dirava ita tohotohoa’ dalana ia hadibaia. (Efeso 5:1) Gau badana be ita laloatao ena be ita goevadae lasi, to Iehova ese siahu, hahemaoro goeva, aonega bona lalokau ia hahedinaraia dalana ita tohotohoa diba. Edena bamona ita diba momokani Siahu Ibounai Diravana ita tohotohoa diba? Laloatao, Iehova ena ladana ena anina ese ita ia hadibaia Iehova be iena ura ia hagugurua totona, ia ura gauna ai sibona ia halaoa diba. Unai kara ita hoalaia, to anina be ita hegeregere lasi Iehova ita tohotohoa totona, a? Lasi.

¹⁹ Dirava ese ita ia karaia ena toana hegeregerena. (Genese 1:26) Unai dainai, taunimanima be tanobada ai idia noho mauri gaudia haida bamona lasi. Iseda lalona ai ia noho diba, tama sina amo ita abia karadia, eiava ita dekenai idia vara gaudia ese ita idia doria lasi. Iehova ese ita dekenai harihari gauna hereadaena—ura kwalimu—ia henia. Herevana ita goevadae lasi bona iseda goada be mai ena hetoana, to edena bamona tauna ai ita ura ita lao be ita sibona ita abia hidi diba. Danu, laloatao Dirava ena ladana anina be iena ura ia hagugurua totona, ena hesiai taudia be ia ura gauna ai ia halaoa diba. Oi ura lalokau, aonega, kara maoromaoro bona siahu gaukaralaia maoromaoro tauna ai oi lao, a? Iehova ena lauma helaga ena heduru dainai, unai bamona tauna ai oi lao diba! Oi hagugurua diba gau namodia mani oi laloa.

20. Dahaka do ita hagugurua bema Iehova ita tohotohoa?

²⁰ Emu guba Tamana ena kudouna do oi hamoalea. (Aonega Herevadia 27:11) Iehova be oiemu goada ena hetoana ia lalopararalaia dainai, ‘gau ibounai dekenai ia do oi hamoalea’ diba. (Kolose 1:9, 10) Bona emu lalokau Tamana ena kara  namodia oi tohotohoa noho lalonai, hahenamo badana do oi abia. Dirava amo ia daudau tanobada diburana lalonai, oi be diari halasia tauna. (Mataio 5:1, 2, 14) Iehova ena kara hairaidia be tanobada dekenai idia halasia gaukarana do oi durua. Unai be hahenamo badana!

21, 22. Iehova idia lalokau henia taudia vairanai dahaka laolao ia noho?

²¹ Iamesi 4:8 dekenai ia noho hagoadaia herevana be ita tahua gauna ta sibona lasi. Ia be laolao ta. Bema Iehova ita abidadama henia noho, unai laolao be do ia doko lasi. Iehova kahirakahira do ita lao noho. Badina, iena kara momo herea do ita dibaia noho. Namo lasi ita laloa inai buka amo Iehova ena kara ibounai ita diba vadaeni. Badina ita be Baibel ese Dirava dekenai ia gwauraia gaudia ibounai ena kahana maragina sibona ita herevalaia! Bona Baibel ese Iehova dekenai ita dibaia diba gaudia ibounai ia gwauraia lasi. Aposetolo Ioane ia gwau, bema Iesu ese tanobada dekenai ia karaia hesiai gaukara ena sivarai ibounai idia torea, “tanobada be do ia hegeregere lasi unai lokua toretore ibounai ia haboua totona.” (Ioane 21:25)  Bema Baibel ese Natuna be unai bamona ia gwauraia, ena Tamana dekenai unai do ia momokani danu!

²² Ena be do ita mauri hanaihanai, to Iehova ena kara ibounai do ita dibaia lasi. (Hadibaia Tauna 3:11) Mani ita vairanai ia noho nega namona ita laloa. Lagani handred, tausen, milioni bona bilioni ita mauri murinai, iseda diba Iehova Dirava dekenai be do ia dobu, hari bamona lasi. To do ita mamia gau namodia momo herea idia do noho, ita dibaia totona. Do ita ura bada gau momo ita dibaia, bona Salamo torea tauna ia abia hemamina bamona do ita abia, ane amo ia gwau: “Dirava kahirakahira lao karana be namo.” (Salamo 73:28) Mauri hanaihanai be mai anina bada bona gau idauidau amo do ia honu—bona Iehova kahirakahira ita lao karana be hanaihanai do ita moalelaia bada gauna.

23. Dahaka oi karaia be namo?

²³ Iehova ena lalokau dainai, namona be emu kudouna, mauri, lalona bona goada ibounai ida ia oi lalokau henia. (Mareko 12:29, 30) Namona be emu lalokau ia noho hanaihanai bona ia goada. Mani, dina ta ta ai oi karaia abia hidi, badadia bona maragidia, be hakaua hereva hegeregeredia oi karaia—namona be hanaihanai unai dala ese oi ia hakaua emu guba Tamana ida emui hetura karana oi hagoadaia totona. To gau badana be inai, namona be Iehova kahirakahira oi lao, bona ia be oi kahirakahira do ia mai—ela bona hanaihanai!