1, 2. (a) Iosepa ese dahaka kara gageva badana ia davaria? (b) Iehova ese edena dala ai unai kara gagevana ia hamaoromaoroa?

 KARA gageva badana ta ia vara. Toana namo herea mero matamatana ta be taravatu ia utua lasi, to guri ta lalonai idia negea, idia samania koikoi idia gwau ia ura hahine ta ia hadikaia. To inai be haida ese ia idia kara gageva henia karana ginigunana lasi. Lagani haida gunanai, inai tau matamatana Iosepa, ena mauri lagani be 17 neganai, ena tadikaka ese ia idia kara dika henia bona kahirakahira idia alaia mase. Bena idau tanona dekenai hesiai tauna ta bamona ia idia hoihoilaia. Unuseniai ia ese ena biaguna ena adavana ena hegahusi karana ia dadaraia. Unai hahine be Iosepa dekenai ia badu dainai, Iosepa ia samania koikoi bona unai dainai ia idia hadiburaia. Madi, toana be Iosepa totona do ia hereva tauna ta ia noho lasi.

² To, “kara maoromaoro bona kota maoromaoro ia ura henia” Diravana ese unai ia itaia noho. (Salamo 33:5) Iehova ese unai kara gageva ia hamaoromaoroa totona, idia vara gaudia ia haidaua bena gabeai Iosepa idia ruhaia. Ma danu, Iosepa—guna “dibura ruma” dekenai idia negea tauna—be gabeai dagi badana idia henia bona idia matauraia bada. (Genese 40:15; 41:41-43; Salamo 105:17, 18) Gabeai, idia hamomokania Iosepa ese unai kara dika ia karaia lasi, bona iena dagi bada ia gaukaralaia Dirava ena ura ia habadaia totona.​—Genese 45:5-8.

3. Dahaka dainai ita ibounai ita ura taunimanima ese dala maorona ai ita idia kara henia be hoa gauna lasi?

³ Unai bamona sivarai ese iseda lalona ia hamarerea, ani? Ita ibounai ese kara gageva ita itaia eiava ita mamia vadaeni, ani? Momokani, ita ibounai ita ura taunimanima ese dala maorona ai ita idia kara henia. Unai ita hoalaia lasi, badina Iehova ese ita dekenai iena kara ia henia, bona hahemaoro goeva be  iena kara badana ta. (Genese 1:27) Iehova ita diba namonamo totona, iena hahemaoro goeva ita lalopararalaia be namo. Unai amo iena dala hereadaedia do ita laloa bada bona ita ura ia kahirakahira do ita lao.

4. Nega momo taunimanima ese edena dala ai hahemaoro karana idia laloa?

⁴ Taunimanima ese hahemaoro goeva idia laloa kerere, nega momo idia laloa ia be taravatu badinaia namonamo karana ta sibona. Buka ta (Right and Reason—Ethics in Theory and Practice) ia gwau, “hahemaoro goeva be taravatu, maduna, haida edia maoro, bona dagi ida idia gaukaralaia hebou, bona ia ese maka tamona amo taunimanima ia hahemaoro henidia bona edia kara hegeregerena davana ia henidia.” To, Iehova ena hahemaoro goeva be maduna dainai taravatu badinaia kava karana ta sibona lasi.

5, 6. (a) Baibel idia torea gado ginigunadia ai, inai hereva “hahemaoro” ena anina be dahaka? (b) Dirava be hahemaoro tauna ena anina be dahaka?

⁵ Iehova ena hahemaoro goeva be ia bada bona dobu herea, to bema Baibel idia torea gadodia ai unai hereva idia gaukaralaia dalana ita tahua namonamo, ena anina korikorina do ita lalo-pararalaia. Heberu Toretoredia ai, hereva badadia toi idia gaukaralaia. Baibel lalonai inai hereva, “hahemaoro” be idia gwauraia danu “kara maoromaoro.” (Genese 18:25) Keristani Greek Toretoredia lalonai, inai hereva idia hahanaia “kara maoromaoro” ena anina be “maoro o namo karana.” Oibe, kara maoromaoro bona kota maoromaoro be idia hegeregere.​—Amosa 5:24.

⁶ Unai dainai, Baibel ia gwau Iehova be hehemaoro goeva tauna neganai, ita ia hamaoroa Iehova ena kara be hanaihanai ia maoro bona namo, bona taunimanima edia toana ia laloa lasi. (Roma 2:11) Momokani, do ita hoa bema unai bamona ia karaia lasi. Abidadama tauna Elihu ia gwau: “Dirava momokanina be kara dika ta ia karaia diba lasi, Bona Siahu Ibounai Diravana be kerere ta ia karaia diba lasi!” (Iobu 34:10) Oibe,  Iehova be nega ta do ia kara kerere lasi. Dahaka dainai? Badina badadia rua dainai.

7, 8. (a) Dahaka dainai Iehova ia kara gageva diba lasi? (b) Dahaka ese Iehova ia veria ma haida dekenai kara maoromaoro ia hahedinaraia totona?

⁷ Ginigunana be, Iehova be helaga. Karoa 3 dekenai ita herevalaia bamona, Iehova ena kara be hanaihanai ia goeva bona maoromaoro. Unai dainai, ia kara dika eiava ia kara gageva diba lasi. Unai ena anina mani oi laloa. Iseda guba Tamana ia helaga dainai, ita diba momokani ia ese ena natudia do ia kara dika henidia diba lasi. Iesu be unai ia abia dae momokani. Iena tanobada maurina ena hanuaboi ginigabena ai, ia guriguri ia gwau: “Tamana Helagana e, oiemu ladana, lau dekenai oi henia gauna dainai, mani idia [hahediba taudia] oi naria.” (Ioane 17:11) “Tamana Helagana”—Baibel lalonai unai ladana be Iehova sibona ia herevalaia. Unai be maoro, badina tanobada tamana ta be Iehova ia helaga hegeregerena ia helaga lasi. Iesu ia abia dae momokani ena Tamana ese ena hahediba taudia do ia naridia namonamo, badina ia be goeva bona ia dekenai kara dika ta ia noho lasi.​—Mataio 23:9.

⁸ Iharuana be, sibona ena namo tahua lasi lalokauna be Iehova ena kara korikorina. Unai bamona lalokau dainai, mai kara maoromaoro ida ma haida ia kara henia. To kara gageva idauidau—bese idaudia inai henia, haida dadaraia kava, bona toana laloa bada karadia—be nega momo mataganigani eiava sibona ena namo laloa bada karana dainai idia vara, idia be lalokau amo idia idau. Baibel ese lalokau Diravana ia herevalaia neganai, ia gwau: “Iehova be kara maoromaoro Diravana, ia be kara maoromaoro ia ura henia.” (Salamo 11:7) Iehova ese ia sibona be inai bamona ia gwauraia: “Lau, Iehova be kota maoromaoro lau ura henia.” (Isaia 61:8) Iseda Dirava be kara maoromaoro ia ura henia, unai ita diba ese ita ia hagoadaia, ani?​—Ieremia 9:24.

9-11. (a) Edena dala ai Iehova ena hahemaoro bona ena hebogahisi idia gaukara hebou? (b) Iehova ese kara dika taudia ia kara henia dalana dekenai, edena dala ai ena hahemaoro bona hebogahisi ia hahedinaraia?

⁹ Iehova ena hahemaoro goeva, iena kara ma haida hegeregeredia, be goevadae, bona gau ta dekenai ia dabu lasi. Mose ese Iehova ia hanamoa, ia gwau: “Ia be Nadi Badana, iena gaukara ibounai be goevadae, Iena kara ibounai be maoromaoro momokani. Ia be ita abidadama henia diba Diravana bona ia kara gageva lasi. Iena kara be maoromaoro bona kerere lasi.” (Deuteronomi 32:3, 4) Iehova ena hahemaoro goeva karadia ibounai be goevadae—ia hamanokaia momokani lasi bona ia ha-aukaia momokani lasi.

¹⁰ Iehova ena hahemaoro goeva bona ena hebogahisi idia gaukara hebou. Salamo 116:5 ia gwau: “Iehova be kara namo bona kara maoromaoro Diravana, Iseda Dirava be hebogahisi Diravana.” Oibe, Iehova be kara maoromaoro bona hebogahisi Diravana. Unai kara rua be idia tamona lasi to idia gaukara hebou. Namo lasi ita laloa Dirava ese hebogahisi ia hahedinaraia neganai ena hahemaoro goeva ia hamanokaia, badina iena hahemaoro goeva be ia auka momokani. To, nega momo Iehova ese unai kara ruaosi be nega tamona ai ia hahedinaraia, eiava gaukara tamona karaia totona danu. Haheitalai ta mani ita itaia.

¹¹ Taunimanima ibounai be mai edia kara dika bona kara dika ena davana—mase—idia abia be maoro. (Roma 5:12) To Iehova be kara dika taudia idia mase neganai, ia hebogahisi. Ia ‘noho hegaegae dika ia gwauatao, ia kara namo, bona hebogahisi Diravana.’ (Nehemia 9:17) To ia be helaga dainai, ia ese kara dika ena davana ia henia. Vadaeni, edena dala ai kara dika taudia dekenai hebogahisi ia hahedinaraia diba? Haere be Dirava ena Hereva amo ia mai hereva momokani badana ta lalonai ita davaria diba: Iehova ese mauri davalaia boubouna amo taunimanima totona hahemauri dalana ia kehoa. Karoa 14 lalonai, unai dala namona ena hereva ma haida do ita dibaia. Unai  dala be maoro bona hebogahisi bada dalana. Unai dala amo, Iehova ese idia helalo-kerehai kara dika taudia dekenai hebogahisi ia hahedinaraia diba, unai ia karaia lalonai, iena hahemaoro goevadaena ena dala ia badinaia danu.​—Roma 3:21-26.

12, 13. (a) Dahaka dainai Iehova ena hahemaoro karana ese ita ia veria lao ia dekenai? (b) Iehova ena hahemaoro karana dekenai Davida ena hereva dokona be dahaka, bona unai ese edena dala ai ita ia hagoadaia?

¹² Iehova ena hahemaoro goeva be kara aukana lasi dainai ia be Iehova kahirakahira dekenai ita ia veria lao kara namona ta. Baibel ese Iehova ena hahemaoro goeva be hebogahisi dalanai ia hahedinaraia. Vadaeni, namona be Iehova ese ena hahemaoro goeva ia hahedinaraia daladia haida ita itaia.

¹³ Iehova ena hahemaoro goeva dainai ena hesiai taudia ia rakatania lasi bona idia ia badinaia. Salamo torea tauna Davida ese Iehova ena hahemaoro goeva ia laloa bada matamaia. Ena mauri lalonai idia vara gaudia bona Dirava ena kara ia dibaia dainai, ena hereva dokona be dahaka? Ia gwau: “Iehova be, kara maoromaoro ia ura henia, bona ia idia badinaia taudia do ia rakatania lasi. Nega ibounai Dirava ese idia do ia gimaia.” (Salamo 37:28) Hagoadaia herevana unai! Iseda Dirava ese Ia idia badinaia taudia be nega ta do ia rakatania lasi. Unai dainai ena hetura karana bona ena henari mai lalokauna ita tabekau henia diba. Iena hahemaoro goevana ese unai ia hamomokania!​—Aonega Herevadia 2:7, 8.

14. Iehova ese Israela taudia dekenai ia henia Taravatuna ese edena bamona ia hahedinaraia ogogami taudia ia hebogahisi henidia?

¹⁴ Dirava ena hahemaoro goeva dainai ia ese hisihisi idia davaria taudia edia dabu gaudia ia laloa. Iehova ese Israela taudia dekenai ia henia Taravatuna ese ia hahedinaraia ogogami taudia ia hebogahisi henidia. Hegeregere, Taravatu ese dala ia karaia tama sina lasi natudia bona vabu idia naria totona. (Deuteronomi 24:17-21) Iehova ia diba unai bamona ruma bese edia mauri be mai ena hekwarahi bada dainai, Ia sibona be edia tamana bamona, Hahemaoro Tauna bona Naria  Tauna ai ia lao, ia ese “tamana lasi natuna bona vabu dekenai hahemaoro goevana ia hahedinaraia.” (Deuteronomi 10:18; Salamo 68:5) Iehova ese Israela taudia ia sisiba henia bema sibona idia gimaia diba lasi hahine bona natudia idia hahisia, edia taitai do ia kamonai. Ia gwau: “Egu badu be do ia siahu.” (Esodo 22:22-24) Ena be badu be Dirava ena kara badana ta lasi, to mai kara maoromaoro ida ena badu be idia kara gageva taudia dekenai ia hahedinaraia, bema idia ese goada lasi taudia idia dagedage henia.​—Salamo 103:6.

15, 16. Dahaka ese ia hamomokania Iehova be taunimanima edia toana ia laloa bada lasi?

¹⁵ Danu, Iehova ese ita ia hadibaia “ta ena toana ia laloa lasi bona ta ese ena lalona ia veria diba lasi, . . . laloani moni amo.” (Deuteronomi 10:17) Iehova be mai edia siahu bada taudia bamona lasi, kohu eiava ta ena toana ese ena lalona ia haidaua diba lasi. Ia be haida sibona ia kara namo henia lasi. Iehova ese taunimanima edia toana ia laloa bada lasi karana ia hamomokania gauna ta mani oi laloa. Dala ia kehoa haida dekenai sibona lasi, to taunimanima ibounai dekenai iena tomadiho momokani taudia ai do idia lao bena mauri hanaihanai do idia abia. “Bese ibounai lalonai ia idia gari henia bona kara maoromaoro idia karaia taudia be ia ese ia abia dae.” (Kara 10:34, 35) Taunimanima ibounai, herevana idia be ladana bada taudia eiava lasi, edia kopina ena kala be edena, eiava edena tano dekenai idia noho, idia ese unai helaro namona do idia abia diba. Unai be hahemaoro goeva momokanina, ani?

¹⁶ Iehova ena hahemaoro goevadaena ena kahana ta ia noho: iena kara maoromaoro taravatudia idia utua taudia ia kara henia dalana. Unai ita laloa bona matauraia be namo.

17. Dahaka dainai inai tanobada ena kara gagevadia ese Iehova ena hahemaoro goeva ia hadikaia lasi?

¹⁷ Haida be reana idia laloa: ‘Iehova be kara dika ia abia dae lasi dainai, inai tanobada dekenai idia bada idia lao hisihisi bona kara dikadia edia badina be edena bamona ita gwauraia  hedinarai diba?’ Unai bamona kara gagevadia ese Iehova ena hahemaoro goeva ia hadikaia lasi. Inai tanobada dikana lalonai idia vara kara gagevadia be taunimanima ese Adamu amo idia abia kara dika dainai idia vara. Inai tanobada ai goevadae lasi taudia ese edia kara dika daladia idia badinaia dainai, kara gageva ia bada—to do ia noho daudau lasi.​—Deuteronomi 32:5.

18, 19. Dahaka ese ia hahedinaraia, Iehova ese mai edia ura ida iena kara maoromaoro taravatudia idia utua taudia dekenai do ia haheauka hanaihanai lasi?

¹⁸ Ena be mai edia momokani ida Iehova kahirakahira idia lao taudia be ia ese ia hebogahisi henidia bada, to ena ladana helagana idia hadikaia taudia do ia haheaukalaia hanaihanai lasi. (Salamo 74:10, 22, 23) Hahemaoro goeva Diravana ita koia diba lasi; mai edia ura ida kara dika idia karaia taudia edia davana metauna do ia henia. Iehova be ‘hebogahisi Diravana, ia badu haraga lasi, ena lalokau be bada herea bona nega ibounai ena hereva ia hamomokania, to kerere tauna do ia panisia momokani.’ (Esodo 34:6, 7) Iena hereva hegeregerena, nega haida Iehova ese mai edia ura ida iena kara maoromaoro taravatudia idia utua taudia ia panisidia.

¹⁹ Hegeregere, Iehova ese idaunegai Israela taudia ia kara henia dalana mani ita itaia. Ena be Israela taudia be Gwauhamata Tanona dekenai idia noho neganai danu, kara dika idia karaia loulou. Ena be edia kara dainai Iehova ena ‘lalona idia hahisia,’ to idia ia rakatania haraga lasi. (Salamo 78:38-41) To, mai ena hebogahisi ida idia dekenai dala ia kehoa edia dala kererena idia rakatania totona. Idia ia noia, ia gwau: “Lau be kara dika tauna ena mase dekenai lau moale lasi, to lau ura kara dika tauna be do ia helalo-kerehai bona ia mauri noho. Israela besena e, umui giroa, emui kara dika amo umui giroa, badina dahaka do umui mase?” (Esekiela 33:11) Iehova dekenai mauri be dava bada gauna dainai, iena peroveta taudia ia siaia loulou unai amo reana Israela taudia ese edia kara dika do idia rakatania. To, unai lalo-auka taudia idia ura lasi idia kamonai bona helalo-kerehai. Gabeai, iena ladana helagana bona unai ladana ese ia hahedinaraia gaudia dainai, Iehova ese Israela  taudia be edia inai taudia edia imana dekenai ia atoa.​—Nehemia 9:26-30.

20. (a) Iehova ese Israela taudia ia kara henia dalana amo dahaka ita dibaia? (b) Dahaka dainai laiona ena laulau herevana be maoro Iehova ena hahemaoro goeva karana hahedinaraia totona?

²⁰ Iehova ese Israela taudia ia kara henia dalana amo ia ita dibaia namonamo. Ita dibaia gauna ta be Iehova ese kara dika ia itaia bona ia itaia gaudia dainai ia lalohisihisi. (Aonega Herevadia 15:3) Badina namona dainai dala ia tahua hebogahisi ia hahedinaraia totona, unai ita diba be hagoadaia gauna. Danu, ita dibaia gauna ma ta be iena hahemaoro goevana ia henia haraga lasi. Iehova ena haheauka karana dainai, taunimanima momo idia laloa kerere bona idia gwau kara dika taudia do ia panisidia lasi. To unai be momokani lasi, badina Iehova ese Israela taudia ia kara henia dalana amo ita diba iena haheauka be mai ena hetoana. Iehova be kara maoromaoro totona ia gini auka. Ena be taunimanima be nega momo hahemaoro goeva idia hahedinaraia lasi, to Iehova be idau, mai boga auka ida kara maoromaoro totona ia gini. Laiona ese hahemaoro goeva ia laulaulaia, Dirava ena terona vairanai gini karana ida idia gwauraia hebou. a (Esekiela 1:10; Apokalupo 4:7) Unai dainai,  ita diba momokani, inai tanobada ena kara gageva do ia kokia gwauhamatana do ia hagugurua. Oibe, iena hahemaoro goeva be inai bamona ita gwauraia diba: Kerere ia noho neganai ia hahemaoro henia, to bema mai ena dala hebogahisi ia hahedinaraia.​—2 Petero 3:9.

21. Iehova ese hahemaoro goeva ia gaukaralaia dalana ita lalohadailaia neganai, edena bamona ia ita laloa be namo, bona dahaka dainai?

²¹ Iehova ese hahemaoro goeva ia gaukaralaia dalana ita lalohadailaia neganai, namo lasi ita laloa ia be kota biaguna aukana, kara dika taudia panisia karana sibona ia laloa tauna. Lasi. To namona be ita laloa Iehova be ita ia lalokau henia tamana ta bamona, nega ibounai iseda namo havaraia dalanai ita ia kara henia. Iehova be kara maoromaoro Tamana dainai, ena heduru bona gwauatao idia ura abia tanobada natudia be mai ena kara maoromaoro bona hebogahisi ida ia kara henidia.​—Salamo 103:10, 13.

22. Iehova be hahemaoro goeva ia badinaia dainai, dala ia karaia dahaka helaro ita abia totona, bona dahaka dainai ita dekenai unai bamona ia karaia?

²² Ita moale diba badina Dirava ena hahemaoro goeva be kara dika taudia ia panisia karana sibona lasi! Iena hahemaoro goeva ese ia hakaua dainai, Iehova ese dala ia karaia helaro namo hereana ita moalelaia totona—“kara maoromaoro sibona do ia noho” tanobadana ai, goevadae maurina do ita moalelaia ela bona hanaihanai. (2 Petero 3:13) Iseda Dirava ese inai dala amo ita ia kara henia badina iena hahemaoro goeva dainai ia ura taunimanima ia hamauria, ia ura lasi idia ia hamasea. Momokani, Iehova ena hahemaoro goeva ita lalo-pararalaia neganai, ia kahirakahira dekenai ita do ia veria lao! Karoa gabediai, Iehova ese unai kara ia hahedinaraia dalana do ita itaia.