KAHANA 3
Eden Umana ai Mauri be Edena Bamona?
Iehova ese gau namodia momo be Adamu bona Heva dekenai ia henia. Genese 1:28
Iehova ese hahine ginigunana, Heva, ia karaia bona Adamu dekenai ia henia, ia adavaia totona.—Genese 2:21, 22.
Iehova ese edia darana bona tauanina ia karadia goevadae.
Idia be Eden umana ai idia noho. Unai uma mai hairaina o Paradaiso dekenai sinavai momo, au huahua bona animal idauidau idia noho.
Iehova ese idia ia hereva henia bona hadibaia. Bema idia ese Dirava idia kamonai henia, vadaeni tanobada o Paradaiso ai do idia mauri hanaihanai.
Dirava ia gwau: “Au ena huahua oi ania lasi.” Genese 2:16, 17
Iehova ese uma gabunai ia gini au huahua ta be Adamu bona Heva dekenai ia hahedinaraia, bona ia hamaorodia: “Unai au ena huahua umui ania lasi, bona dogoatao lasi, umui mase garina.”
Aneru ta be Dirava ia gwau-edeede henia. Unai aneru dikana ena ladana be Satani Diabolo.
Satani ia ura lasi Adamu bona Heva ese Iehova idia badinaia. Unai dainai, Satani be gaigai ta amo Heva dekenai ia gwau, unai au ena huahua ia ania neganai, dohore ia mase lasi, to Dirava ida do ia hegeregere. To, Satani ena hereva be koikoi.—Genese 3:1-5.
