Nega ibounai Satani bona lauma dikadia idia dagedage bada. Gunaguna Satani ese kamonai tauna Iobu ena boromakau bona ena hesiai taudia ia aladia mase. Bena “lai bada herea” amo Iobu ena natudia 10 idia noholaia rumana ia hadikaia bona ia hamasedia ore. Unai murinai Satani ese “toto dika herea dekena amo Iobu ia hahisia, ena aena dekena amo ela bona iena kwarana dekenai.”​—Iobu 1:7-19; 2:7.

Iesu ena nega lalonai, lauma dikadia ese taunimanima haida be mu taudia bona matakepulu taudia ai idia halaodia. (Mataio 9:32, 33; 12:22) Tau ta idia hahisia bena nadi amo sibona ia ivaia. (Mareko 5:5) Mero ta idia hadikaia bena ia boiboi kava; tano dekenai idia hamorua bena “iena tauanina ia auka masemase.”​—Luka 9:42.

Hari inai negai, Satani bona lauma dikadia idia ala-ala, gunaguna idia karaia bamona. Guba amo idia negedia diho negana amo, edia kara dika idia habadaia noho. Edia dagedage  karadia edia sivarai be tanobada ena kahana ibounai amo idia mai. Taunimanima haida idia hagoreredia. Ma haida be hanuaboi ai idia hahekwarahidia dainai idia mahuta diba lasi, eiava nihi dikadia amo idia hagaridia bada. Ma haida dekenai kara bodagadia idia karaia. Ma haida idia hakavakavadia, o idia doria idia ala-ala eiava sibodia idia hamasea totona.

Suriname dekenai ia noho hahinena ta ladana Lintina ia gwau, lauma dikana ta ese ena bese taudia 16 ia hamasedia bona iena tauanina bona ena lalona ia hahisia lagani 18 lalonai. Ia gwau ia diba lauma dikadia ese “mai edia moale ida haida idia hadikadia ela bona mase.”

To Iehova ese ena hesiai taudia be Satani ena dagedage amo ia hamauria diba.​—Aonega Herevadia 18:10.