Baibel ia gwau Satani ese “tanobada taudia ibounai ia koia noho.” (Apokalupo 12:9) Satani bona ena lauma dikadia idia ura lasi ita ese Dirava ena Hereva, Baibel, do ita abia dae. Taunimanima idia koia toho, do idia laloa mase taudia be lauma gabunai idia mauri noho. Mani edia kara ita tahua.

Tomadiho oreadia momo idia gwau, taunimanima ibounai be mai edia lauma, bona ta ena tauanina ia mase murinai ena lauma be lauma gabuna dekenai ia hanai lao. Idia gwau tauanina ia mase to lauma ia mase lasi. Ma idia gwau lauma ia mase diba lasi.

To Dirava ena Hereva be unai bamona lasi. Hadibaia Tauna 3:19, 20 dekenai ia gwau: “Badina be taunimanima dekenai ia vara dalana, bona boroma dekenai ia vara dalana be tamona, idia ruaosi be dala tamona dekenai idia mase noho. Idia ibounai ese edia hahodi dalana be tamona. Taunimanima edia mauri dalana ese boroma edia mauri dalana ia  hereaia lasi, badina be inai mauri daladia ruaosi be anina lasi. Idia ibounai be gabu tamona dekenai idia lao noho, tano ena kahu. Idia ruaosi be kahu dekena amo idia mai, bona idia ruaosi be kahu dekenai do idia giroa lou.” Oibe, Baibel ese ia hahedinaraia taunimanima lalonai ia noho laumana be iena mauri siahuna sibona, hahodi ese ia durua gauna unai. Unai mauri siahuna be mauri gaudia ibounai, hegeregere manu, gwarume, bona animal lalodiai ia noho danu, unai dainai Baibel ia gwau “edia hahodi dalana be tamona.”

Unai mauri siahuna be reidio ena bateri ena siahu o paua ida ita hahegeregerea diba. Reidio be siahu bateri amo ia abia neganai, ia boiboi diba, bona taunimanima edia gadona bona miusik ia halasia diba. To bateri edia siahu ia ore neganai, regerege be lasi. Unai hegeregerena, tau ta ia mase neganai, iena lauma eiava mauri siahuna ena gaukara ia ore. Mase tauna ia hereva diba lasi, kara ta ia karaia diba lasi, bona ia laloa diba lasi;  unai hegeregerena, guna ia lalonai ia noho mauri siahuna ese gau ta ia karaia diba lasi.

Taunimanima be mai edia mase diba lasi laumadia herevana be Baibel ena hereva lasi. Unai hereva be Satani bona ena lauma dikadia edia amo. Iehova ese tomadiho hereva koikoidia ibounai ia inai henidia.​—⁠Aonega Herevadia 6:16-19; 1 Timoteo 4:1, 2.

Satani ese taunimanima ia koidia dalana ma ta be rohe taudia edia amo. Rohe taudia ese lauma edia hereva idia kamonai diba. Idia bona ma taunimanima momo danu idia laloa unai hereva be mase taudia edia lauma amo idia mai, to Baibel ese edia lalohadai ia hakoikoia.​—⁠Hadibaia Tauna 9:5, 6, 10.

Vadaeni, unai hereva be daidia edia amo idia mai? Lauma dikadia edia amo! Taunimanima ta ia mauri noho lalonai idia ese ia idia itaia namonamo diba; iena hereva dalana, iena toana, iena kara, bona iena diba be idia diba. Unai dainai mase taudia edia kara idia tohotohoa be haraga.​—⁠1 Samuela 28:3-19.

Satani ese mase taudia ia koia dalana ma ta be sivarai  koikoidia amo. Unai sivarai dainai haida ese Baibel ena hereva momokani idia negea.​—⁠2 Timoteo 4:4.

Africa dekenai, mase taudia edia sivarai momo idia kikilaia, idia gwau idia mase murinai idia hedinarai lou. Reana badina be idia itaia tauna ena toana be ia mase vadaeni tauna ta ena toana hegeregerena.

Hegeregere, Keristani taudia rua be gunika dekenai idia haroro loaloa lalonai, tau burukana ta idia itaia, nega taina daudau idia ruaosi murinai ia raka noho. Idia nanadaia neganai, ia hamaorodia ia laloa idia ta be iena kakana, lagani haida idia lao vadaeni ia mase tauna unai. Momokani, iena lalohadai be kerere, to ia ura lasi unai lalohadai do ia negea. Mani unai tau be gabeai ena turana bona ena dekena taudia ia hamaorolaidia sivaraina oi laloa!

Oi diba vadaeni taunimanima haida ese hoa gaudia idia itaia vadaeni, eiava idia kamonai vadaeni, eiava idia nihilaia vadaeni. Idia momo ese unai gaudia idia garilaia. West Africa dekenai, Marein ese ena tubuna, ia mase vadaeni hahinena, ena gadona ia kamonai  loulou, hanuaboi ai ia boiria. Unai negadiai Marein ia boiboi mai ena gari ida, ena ruma taudia iboudiai ia hanogadia. Gabeai ia kavakava.

Vadaeni, bema mase taudia be momokani idia mauri noho, edia lalokau taudia do idia hagaria lasi, ani? Unai hereva dikadia be lauma dikadia edia amo idia mai.

To heduru herevadia danu be idia edia amo, a? Hegeregere, Sierra Leone dekenai Gbassay ia gorere neganai, nihi ta lalonai iena tamana, ia mase vadaeni tauna, ia hedinarai ia dekenai bona ia hagania au ta dekenai do ia lao, ena rau ta do ia abia bona ranu ida do ia mikisia bena do ia inua, to ta do ia hamaoroa lasi. Vadaeni unai bamona ia karaia bena ia namo lou.

Hahine ma ta ia gwau ena adavana ia mase murinai hanuaboi ta ai ia hedinarai ia dekenai. Ia gwau ena toana be namo herea bona ena dabua be mai hairaina.

Haida idia laloa unai bamona hereva be namo bona mai edia heduru. Dirava ena amo idia mai, a? Lasi. Iehova be “kara momokani Diravana.” (Salamo 31:5) Ia be nega ta ita ia koia lasi. Lauma dikadia sibona  be unai bamona idia karaia.

Ena be nega haida unai lauma edia kara be heduru karadia bamona, to idia ibounai be dika. Diabolo ese Heva ia hereva henia neganai, ia hereva hegeregere Heva ia durua gwauraia bamona. (Genese 3:1) To Heva ese ia kamonai henia dainai, dahaka ia vara ia dekenai? Madi ia mase.

Oi diba kara dika tauna ese ia koia gwauraia taudia ia tura henidia guna. Africa taudia edia hereva ta hegeregerena, “isena idia kurokuro, lalona ia korema.” Bona Baibel ia gwau: “Satani sibona ese iena kara ia senisia diba, bona ia ese diari aneruna ena kopina ia atoa diba.”​—⁠2 Korinto 11:14.

Gunaguna Dirava ese taunimanima haida nihi eiava matahanai eiava lauma gabuna amo idia mai gadona amo ia hadibadia, to hari ia be unai bamona ia karaia lasi. Hari ia ese Baibel amo ia hadibadia; unai buka ena hereva dainai ta “ena goada be hegeregere momokani, vadaeni kara namodia ibounai do ia karaia diba mai kwalimu danu.”​—⁠2 Timoteo 3:17.

Iehova ese ita ia lalokau henia dainai ita ia hadibaia, Diabolo ena koikoi karadia dekenai do ita naria namonamo totona. Ia diba lauma dikadia ese ita idia hadikaia diba.