Gunaguna, Iehova ese ia havaraia laumadia iboudiai be namo. Bena aneru ta ia kara dika, Satani Diabolo unai. Satani ia ura tanobada taudia ese ia do idia tomadiho henia bona Iehova do idia tomadiho henia lasi. Iena sivarai be inai:

Eden umana lalonai be au momo mai edia huahua namodia. Iehova ese Adamu bona ena adavana, Heva, ia hamaorodia do idia ania diba. To Dirava ese au ta ia taravatua, ia gwau bema ena huahua idia ania, do idia mase vaitani.​—Genese 2:9, 16, 17.

Dina ta Heva be sibona ia noho neganai, gaigai ta ese ia hereva henia. Momokani, gaigai sibona ia hereva lasi, to Satani Diabolo ese ena uduna amo ia hereva. Ia ese Heva ia hamaoroa, bema unai taravatu gauna ia ania, do ia aonega Dirava hegeregerena. Ma ia gwau do ia mase lasi. Unai hereva ruaosi be koikoi. To Heva ese Satani ena hereva ia abia dae bona huahua ia ania. Gabeai ia ese Adamu ia henia, bena ia danu ia ania.​—Genese 3:1-6.

Unai sivarai momokanina amo ita diba, Satani be gwau-edeede tauna bona koikoi tauna. Ia ese Heva ia hamaoroa, bema Dirava ia gwau-edeede henia, do ia mase lasi. Unai be koikoi. Heva ia mase bona Adamu danu ia mase. Unai neganai Satani ia mase lasi, to gabeai do ia mase, ia kara dika dainai. To hari ia mauri noho bona taunimanima ia koidia noho; ia veridia, Dirava ena taravatu do idia utua totona.​—Ioane 8:44.

Gabeai, aneru ma haida idia kara dika. Idia ese hahine mai  hairaidia tanobada dekenai idia itaia, bena idia ura idia ida do idia mahuta hebou. Unai dainai tanobada dekenai idia mai bona tatau edia tauanina idia karaia. Bena hahine idia adavadia. Unai be Dirava ena ura hegeregerena lasi.​—Genese 6:1, 2; Iuda 6.

Unai kara ese danu taunimanima ia hadikadia bada. Unai aneru edia adavadia ese natudia idia havaraia, to unai natudia be idau. Idia tubu daekau ela bona idia bada herea momokani, bona idia dagedage bada. Tanobada be dagedage amo ia honu dainai, Iehova ia gwau kara dika taudia be abata badana amo do ia hamasedia ore. Kara maoromaoro tauna Noa mai ena bese taudia sibodia be Abata Badana amo idia roho mauri; taunimanima oredia ibounai idia mase ore.​—Genese 6:4, 11; 7:23.

Aneru dikadia be lauma gabuna dekenai idia giroa lou; idia mase lasi. To Iehova Dirava ese ia panisidia. Ia koudia, iena kara maoromaoro anerudia edia orea lalonai do idia vareai lou diba lasi, bona taunimanima edia tauanina do idia karaia lou diba lasi totona. Gabeai do idia mase, hahemaoro badana negana lalonai.​—2 Petero 2:4; Iuda 6.

Lagani 80 bamona idia lao vadaeni, tuari be guba dekenai ia vara. Baibel ia gwau: “Vadaeni guba dekenai tuari ia vara. Mikaela [mase amo ia toreisi lou tauna Iesu Keriso] mai ena aneru  [namodia] momo danu ese huala [Satani] idia tuari henia. Huala mai ena aneru [dikadia] momo danu ese Mikaela idia tuari henia. To huala ena goada hegeregere lasi dainai ia kwalimu lasi. Unai dainai huala mai ena aneru [dikadia] be dala lasi guba dekenai do idia noho. Vadaeni unai huala badana, be Dirava ena aneru ese idia negea diho. Ia be unai idaunegai gaigaina, bona iena ladana be Diabolo bona Satani. Ia be tanobada taudia ibounai ia koia noho gauna. Oibe, ia, mai ena aneru [dikadia] danu, be idia ese tanobada dekenai idia negea diho.”

Unai dainai dahaka ia vara? Baibel ia gwau: “Guba e, bona guba lalonai noho taudia e! Unai kara dainai do umui moale bada!” Aneru namodia idia moale, badina be Satani bona aneru dikadia, lauma dikadia unai, be guba dekenai idia noho lasi. To tanobada noholaia taudia be edena bamona? Baibel be ma ia gwau: “To tanobada bona davara, madi o, nega dika bada do umui davaria! Badina be Satani ese umui dekenai ia lao vadaeni, mai ena badu dikadika. Ia badu, badina ia diba iena nega be ia kwadogi sibona.”​—Apokalupo 12:7-9, 12.

Oibe, Satani mai ena bamona dikadia danu ese tanobada taudia idia koidia bona idia hahisidia bada. Baibel lalonai unai aneru dikadia idia gwauraia lauma dikadia. Idia be Dirava ena inai taudia. Idia iboudiai be dika.