HENANADAI 2
Mauri Gaudia Ibounai—Aonega Dalana ai Idia Vara, A?
Emu tauanina lalonai idia noho sel idauidau ibounai 200 mai kahana be idia vara kava, a?
Iunives dekenai idia noho mauri gaudia ibounai amo emu tauanina be idau momokani. Emu tauanina lalonai, sel maragimaragi 100 trilioni bamona idia noho—unai be turia edia sel, rara edia sel, harana edia sel, bona sel ma haida.7 Momokani, oiemu tauanina dekenai sel idauidau 200 mai kahana idia noho.8
Hoa gauna be inai, ena be sel edia toana bona gaukara be idauidau, to unai sel idia gaukara hebou namonamo. Intanet be mai ena kompiuta milioni momo bona ia gaukara haraga data cable ia gaukaralaia, to sel edia gaukara ese kompiuta ena gaukara idia hereaia momokani. Taunimanima ese idia karaia masini ta be sel maragimaragi ta ena gaukara dalana ida idia hahegeregerea diba lasi. Taunimanima edia tauanina lalonai idia noho sel idauidau be edena bamona idia vara?
Saiens taudia momo edia hereva be dahaka? Sel be mai edia orea badadia rua—Nucleus sel bona nucleus lasi sel. Taunimanima, animal, bona tubutubu gaudia edia sel be mai edia nucleus. To bakteria sel be nucleus lasi. Sel mai edia nucleus eukaryotic. Nucleus lasi sel be idia gwauraia prokaryotic. Eukaryotic sel edia kahana be momo bona prokaryotic sel edia kahana be momo lasi, unai dainai saiens taudia momo idia laloa animal bona tubutubu gaudia edia sel be bakteria sel amo idia vara.
Saiens taudia momo edia hahediba be inai, idia hanaia lagani milioni momo lalonai, prokaryotic sel be sel ma haida ida idia haboua tamona, bona idia parara lasi. Danu idia gwau, “nature” be idia haboua sel ena gaukara ia haidaua sibona lasi, to “prokaryotic” sel lalonai idia do haboua tamona neganai ia gimaia, unai amo prokaryotic sel ia vara loulou.9 a
Baibel be dahaka ia gwau? Baibel ia gwau aonega bada herea tauna ese tanobada dekenai mauri gaudia ia havaraia. Ia gwau: “Momokani, ruma ibounai be mai edia karaia tauna, to gau ibounai ia karaia tauna be Dirava.” (Heberu 3:4) Baibel ma ia gwau: “Iehova e, oi karaia gaudia be momo herea! Mai aonega ida inai gaudia ibounai oi karaia. Tanobada be oi karaia gaudia amo ia honu momokani. . . . Ia lalonai mauri gaudia badadia bona maragidia be momo herea.”—Salamo 104:24, 25.
Sel ta be mauri lasi gauna ta amo ia vara diba, a?
Hamomokania gaudia ese dahaka idia hahedinaraia? Taunimanima edia diba microbiology dekenai ia bada dainai, hari idia ese prokaryotic sel maragimaragi edia lalonai idia itaia diba. Evolusen idia abia dae saiens taudia idia laloa, mauri sel ginigunadia edia toana be unai prokaryotic sel bamona.10
Bema evolusen ena hahediba be maoro, unai hahediba be sel ginigunana ia vara kava dalana do ia hahedinaraia diba. To, bema aonega tauna ese mauri gaudia ia havaraia, mauri gauna maragimaragina ta ita itaia neganai, unai aonega korikorina do ia hahedinaraia momokani. Namona be prokaryotic sel ia gaukara dalana ita itaia. Unai diba oi abia neganai namona be sibona oi nanadaia, unai sel be sibona ia vara kava diba, eiava?
SEL IA GIMAIA HABA
Inai haheitalai oi laloa. Bema prokaryotic sel lalonai oi ura vareai, namona be emu tauanina be do ia maragi momokani, badina sentence dokonai ia noho fulstop ena bada ese prokaryotic sel ena bada be nega 100 momo bamona ia hanaia. Danu sel ena kopina (membrane) goadana ese oi ia koua oi vareai lasi totona, unai kopina be faktori ta ena haba nadi bona sement amo idia karaia gauna bamona. Sel kopina ibounai 10,000 idia haboua neganai, unai be pepa tamona ena thickness hegeregerena. To sel ia hagegea kopina ese nadi ena haba ia hereaia momokani. Edena dala haida amo ia hereaia?
Nadi ena haba ese faktori ia hagegea hegeregerena, sel ia hagegea kopina ese dika gaudia amo sel ia gimaia. To, unai sel ena kopina ena goada be nadi ena goada bamona lasi; badina sel ena kopina dekenai molekiul maragidia, hegeregere oxygen, idia vareai diba, eiava idia raka-lasi diba. To, bema sel ese molekiul dekenai gwaumaoro ia henia lasi do ia vareai lasi, badina dika ia havaraia diba. Danu, sel lalonai idia noho molekiul namodia be sel ena kopina ese do ia koua, unai amo do idia raka-lasi. Sel ena kopina be edena bamona unai ia karaia diba?
Mani faktori ita laloa lou. Reana faktori be mai ena sekuriti taudia. Idia ese faktori haba ena iduara dekenai, idia vareai kohu bona idia siaidia lao kohu idia sekea namonamo. Unai hegeregerena, sel ena kopina lalonai, protein molekiul haida idia noho, idia be iduara bona sekuriti taudia bamona.
Sel ena membrane o haba be mai ena “sekuriti taudia,” idia ese idia sekea dahaka idia vareai bona dahaka idia siaia lao
Unai protein haida (1) edia kahana kahana ai matu idia noho, unai amo molekiul haida be sel lalonai idia vareai bona idia raka-lasi diba. Protein ma haida be sel kopina ena kahana tamona sibona ai idia kehoa (2) bona kahana ta idia koua. Danu, unai protein be mai edia noho gabuna (3) bona unai gabu ta ta ai molekiul ta ta idia fit diba. Unai molekiul be ena noho gabuna ai ia ginidae neganai, protein ena kahana ma ta do ia kehoa bona sel kopina amo unai gauna be sel lalonai ia vareai diba (4). Unai ibounai be sel ta ena kopina latanai idia vara noho.
UNAI FAKTORI LALONAI
Inai oi laloa, bema “sekuriti tauna” ese gwaumaoro oi ia henia bona sel lalonai oi vareai vadaeni, dahaka do oi itaia? Unai prokaryotic sel be ranu bamona gauna amo ia honu, lalonai be muramura idauidau (nutrients), damena bona gau ma haida idia noho. Sel ese unai gaudia ia gaukaralaia ena ura gaudia ia karaia totona. Bona mai ena palani unai gaudia ia karaia totona. Faktori lalonai gaukara ia heau namonamo hegeregerena, unai sel ese kemikol tausen momo ia hegaegaelaia bona dala maorona ai ia haboua bona nega korikorina ai ia gaukaralaia.
Sel ta be nega bada ia gaukaralaia protein ia karaia totona. Edena bamona ia karaia? Do oi itaia gau ginigunana be unai sel ese mauri havaraia gaudia idauidau 20 bamona ia karaia, edia ladana be amino acid. Unai amino acid be masini bamona gauna ta ladana ribosome dekenai idia lao (5), unai palani hegeregerena amino acid gaudia idia hegaegaelaia protein ta idia karaia totona. Faktori ta ai kompiuta program tamona ese gaukara ibounai ia haheaua bamona, sel ta ena gaukara momo be “kompiuta program” eiava program ta ia badinaia, ena ladana be DNA (6). Ribosome ta ese DNA amo hakaua herevadia o instraksen ia abia, unai amo ia diba edena protein do ia karaia bona edena dala amo do ia karaia (7).
Unai protein ia karaia dalana be hoa gauna momokani! Idia ta ta idia lokua ela bona edia toana hegeregerena idia hedinarai (8). Unai protein edia toana idauidau hegeregerena, idia be edia gaukara idauidau do idia karaia. b Mani ensini ta karaia totona, ena kahana idauidau idia atoa hebou dalana ita laloa. Kahana ta ta be edia toana o shape hegeregerena idia karaia be namo, unai amo idia atoa hebou neganai, ensini do ia gaukara namonamo. Unai hegeregerena, bema protein ta ia lokua to ena toana o shape ia hedinarai namonamo lasi, ena gaukara do ia karaia namonamo lasi bona sel ia hadikaia diba.
Sel Ena “Faktori”—Protein Idia Karaia Dalana: Faktori ta bamona, sel lalonai masini bamona gaudia ese gau idia haboua bona idia karaia gaudia idia siaia
Edena bamona protein be ia vara gabuna amo ia lao bona ena gabu korikori dekenai ia ginidae? Sel ese ia karaia protein ta ta ibounai be mai edia “adres.” Unai adres hegeregerena idia diba edena gabu dekenai do idia lao edia gaukara idia karaia totona. Ena be sel ese miniti ta ta lalonai protein tausen momo ia karaia bona ia siaia, to idia ibounai be edia gabu korikorina dekenai idia ginidae.
Dahaka dainai unai gaudia ita diba be namo? Mauri gaudia maragimaragi lalonai, molekiul idia noho, to molekiul be sibona idia vara loulou diba lasi. Bema sel amo idia raka-lasi, do idia mase. Bona sel lalonai, molekiul matamata idia karaia diba lasi, to molekiul haida edia heduru amo, molekiul matamata idia karaia lou diba. Unai hegeregerena, molekiul idauna ta ena ladana adenosine triphosphate (ATP) havaraia totona, enzyme idia noho be namo, to ATP ia noho be namo enzyme idia vara totona. Ma danu, DNA (kahana 3 ai unai molekiul ia herevalaia) ia noho be namo enzyme ia havaraia totona, bona enzyme idia noho be namo DNA havaraia totona. Gau ma ta be, sel ta sibona ese protein ma haida ia karaia diba, to protein haida sibona ese sel ta idia karaia diba. c
Microbiologist Radu Popa ese Baibel ena hereva, Dirava ese gau ibounai ia havaraia herevana, ia abia dae lasi. To, lagani 2004 ai, inai henanadai ia henia: “Nature ese edena bamona mauri ia havaraia diba, bema emai eksperimen momo amo gau ibounai ai hegaegaelaia namonamo, to mauri gauna ta ai havaraia diba lasi?”13 Ma ia gwau: “Ia mauri sel ta lalonai gau idauidau idia gaukara hebou namonamo dalana ese ia hahedinaraia sel be ia vara kava lasi.”14
Bema idia haginia ruma latana ta be ena badina o foundation ia goada lasi dainai ia moru, evolusen lalohadai danu be mauri ena matamaia dalana ia hamomokania diba lasi dainai, do ia gini diba lasi, ani?
Dahaka oi laloa? Evolusen ena lalohadai be tanobada dekenai mauri ia matamaia kava, Dirava ese ia havaraia lasi. To, saiens taudia be mauri gaudia stadilaia karana amo gau momo idia dibaia neganai, idia davaria mauri be sibona ia vara kava diba lasi. To, evolusen idia abia dae saiens taudia idia ura lasi unai idia abia dae dainai, idia gwau, evolusen ena hahediba be lalohadai idauna ta, ia be mauri ia matamaia dalana ena henanadai haerelaia totona lasi. To, oi laloa unai hereva be maoro, a?
Evolusen lalohadai ia vara badina idia laloa lagani momo lalonai gau momo idia vara kava, bona unai amo metairametaira mauri ia matamaia. Unai murinai mauri gaudia idauidau idia vara kava danu. To, bema evolusen ena badina hamomokania dalana ia noho lasi, edia lalohadai ma haida be do idia maoro diba lasi, ani? Bema idia haginia ruma latana ta be ena badina o foundation ia goada lasi dainai ia moru, evolusen lalohadai danu be mauri ena matamaia dalana ia hamomokania diba lasi dainai, do ia gini diba lasi.
Ita ese sel ena toana bona ena gaukara dalana ita herevalaia sisina vadaeni, dahaka oi laloa—sel ia vara kava, eiava aonega tauna ta ena palani dainai, mauri gaudia idia vara? Bema oi do daradara noho, namona be sel ibounai ena gaukara dalana ia biagua gauna do ita herevalaia.
a Saiens taudia edia tahua gaukara amo idia do hamomokania lasi unai bamona ia vara.
b Sel ese idia karaia protein ta ena ladana be enzyme. Enzyme ta ta idia lokua dalana be protein haida amo ia idau, unai amo kemikol edia siahu ia havaraia haraga diba. Enzyme hundred momo be idia gaukara hebou, sel ena gaukara ia heau namonamo totona.
