LESENI 45
Tanobada amo Ita Gini Siri Ena Anina
Iesu be ena murinai idia raka taudia ia hamaoroa idia be “tanobada taudia bamona lasi.” (Ioane 15:19) Unai ena anina be tanobada ena politikol bona tuari lalonai do ita vareai lasi o gini siri. To momokani, unai ita karaia be auka. Reana taunimanima ese ita do idia kirikirilaia. Edena dala ai politikol karadia bona tuari amo ita gini siri bona Iehova Dirava ita badinaia noho diba?
1. Keristani taudia momokanidia ese tanobada gavamani be edena bamona idia laloa?
Keristani taudia be gavamani idia matauraia. Iesu ena hereva ita badinaia bona “Kaisara ena gaudia be Kaisara dekenai [ita] henia.” Unai ena anina be gavamani ena taravatu ita badinaia, hegeregere takisi moni ita henia. (Mareko 12:17) Baibel ia hadibaia Iehova ese taunimanima edia gavamani dekenai gwaumaoro ia henia dainai idia lohia noho. (Roma 13:1) Unai dainai ita laloparara taunimanima edia gavamani edia siahu be mai ena hetoana. Iseda Dirava bona ena guba Basileiana ita abidadama henia, badina taunimanima edia hekwakwanai do ia haorea.
2. Edena dala ai politikol karadia bona tuari amo ita gini siri diba?
Iesu bamona, politik karadia lalonai ita vareai lasi. Taunimanima ese Iesu ena hoa karana idia itaia murinai, idia ura ia be tanobada ena king ai do idia halaoa, to edia ura ia dadaraia. (Ioane 6:15) Dahaka dainai? Badina gabeai ia gwau, “lauegu Basileia be inai tanobada ena lasi.” (Ioane 18:36) Ita be Iesu ena hahediba taudia dainai, dala haida ai iseda gini siri karana ita hahedinaraia. Hegeregere, tuari lalonai ita vareai lasi. (Mika 4:3 duahia.) Bese ena fleg ita matauraia, to ita saluti lasi, badina unai be tomadiho karana. (1 Ioane 5:21) Bona politikol pati o kendideit ta ita durua o ita heai henia lasi. Unai bona dala ma haida ai ita hahedinaraia ita be mai momokani ida Dirava ena gavamani, iena Basileia unai, ita badinaia.
DIBA MA HAIDA ABIA
Politikol bona tuari amo gini siri karana idia tohoa gaudia haida do ita herevalaia, bona Iehova do oi hamoalea ena abia hidi karaia dalana do oi dibaia.
3. Keristani taudia momokanidia edia gini siri karana
Iesu bona ia murinai idia raka taudia ese ita totona haheitalai namona idia hahedinaraia. Roma 13:1, 5-7 bona 1 Petero 2:13, 14 duahia. Bena VIDIO itaia, bona henanadai herevalaia.
-
Dahaka dainai gavamani ita matauraia be namo?
-
Edena dala ma haida ai ita hahedinaraia idia ita matauraia bona kamonai henia?
Tuari ia vara neganai, bese haida idia gwau tuari lalonai do idia vareai lasi, to idia ese moni eiava tuari kohudia amo unai tuari besedia idia durua. Gini siri karana ena anina korikori be dahaka? Ioane 17:16 duahia. Bena VIDIO itaia, bona henanadai herevalaia.
-
Gini siri karana ena anina be dahaka?
Bema gavamani idia ura ita karaia gaudia ese Dirava ena taravatu ia utua be edena bamona? Kara 5:28, 29 duahia. Bena VIDIO itaia, bona henanadai herevalaia.
-
Bema gavamani edia taravatu be Dirava ena taravatu ida ia hegeregere lasi, daika ena taravatu do ita badinaia be maoro?
-
Oi laloa edena negadia ai Keristani taudia ese gavamani edia taravatu do idia kamonai henia lasi?
4. Namona be emu lalohadai bona kara amo oi hahedinaraia politikol karadia lalonai oi vareai lasi
Ioane Ginigunana 5:21 duahia. Bena VIDIO itaia, bona henanadai herevalaia.
-
Vidio ai, dahaka dainai Ayenge ese politikol pati ia vareai lasi, o bese abia isi karana, hegeregere fleg ia saluti lasi?
-
Oi laloa mai aonega ida unai abia hidi ia karaia, a?
Politikol karadia amo ita gini siri karana be dahaka gaudia ese idia tohoa diba? VIDIO itaia, bona henanadai herevalaia.
-
Intanesinol spot gadara lalonai tano idauidau idia gadara helulu ita itaia neganai, edena dala ai bese abia isi karana ita dadaraia diba?
-
Bema politikol taudia ese idia karaia abia hidi be ita idia hanamoa eiava ita idia hadikaia, to edena dala ai politikol karadia amo do ita gini siri noho?
-
Bema nius dekenai politikol karadia ita itaia momo bona unai sivarai idia herevalaia taudia ita bamoa momo, edena dala ai iseda lalohadai ia veria diba?
Edena bamona negadiai Keristani tauna ese do ia hahedinaraia ena lalohadai bona kara amo ia be politikol karadia bona tuari amo ia gini siri?
HAIDA IDIA GWAU: “Dahaka dainai fleg oi saluti lasi eiava bese abia isi anena oi ane lasi?”
-
Edena bamona do oi haere?
POINT BADANA
Keristani taudia idia hekwarahi edia lalohadai, hereva bona kara amo politikol karadia amo idia gini siri totona.
Riviu
-
Edena dala ai gavamani ita matauraia be maoro?
-
Dahaka dainai politikol karadia dekenai gini siri?
-
Dahaka gaudia ese politikol karadia bona tuari amo eda gini siri karana idia tohoa diba?
REFERENS ITAIA
Dahaka gaudia haida do ita rakatania unai amo politikol karadia amo do ita gini siri?
Ruma bese be politikol karadia amo idia gini siri totona, edena dala ai do idia hegaegae diba?
Dahaka dainai ta ese ena bese ia gimaia dainai ia abia hahenamo be gau badana lasi?
Moni gaukara oi abia hidi totona, edena dala ai tanobada karadia amo oi gini siri dalana do oi dibaia.
“Ibounai Ta Ta Sibona Ena Metau, Ena Metau Do Idia Huaia” (Gima Kohorona, April 1, 2006)
Reana Inai Danu Oi Ura
Momo Edia Henanadai
Iehova Ena Witnes Taudia be Dahaka Baibel Stadi Kosi Idia Karaia?
Iehova Ena Witnes Taudia ese idia karaia Baibel stadi be davana lasi, bona oi ura henia Baibel oi gaukaralaia diba. Emu ruma bese eiava turadia oi boiria diba stadi lalonai idia helai totona.
