LESENI 56
Kongrigeisen Lalonai Lalotamona Oi Hagoadaia
Iseda tadikaka taihu huanai ita noho neganai, King Davida bamona ita mamia: “Tadikaka be lalotamona ai idia noho hebou, unai be namo herea bona moale bada gauna!” (Salamo 133:1) Unai lalotamona karana be ia vara kava lasi. Ita ta ta eda maduna be unai lalotamona do ita hagoadaia noho.
1. Dirava ena taunimanima huanai hoa gauna be dahaka?
Bema tano ma ta ena kongrigeisen hebouna oi lao, reana edia gado do oi diba lasi, to do oi moale. Dahaka dainai? Badina tanobada ibounai ai ita be pablikeisen tamona amo Baibel ita stadilaia. Bona ita gaukara goada ita lalokau heheni totona. Herevana edeseniai ita noho, ita ‘ibounai ese Iehova ena ladana ai ita boiboi, bona mai lalotamona ida ia ita hesiai henia.’—Sepanaia 3:9.
2. Dahaka oi karaia diba lalotamona oi hagoadaia totona?
“Mai emui kudouna ibounai ida umui lalokau heheni.” (1 Petero 1:22) Edena dala ai unai sisiba oi badinaia diba? Namo lasi ma haida edia kara dika ita laloa momo. To, namona be edia kara namodia sibona ita laloa bada. Namo lasi edia ura gaudia be oiemu ida idia hegeregere tadikaka taihu sibona oi bamoa, to namona be edia mauri dalana be oiemu amo idia idau taudia danu oi tura henia. Danu namona be ita hekwarahi bada ma haida inai henia kava karana ita dadaraia totona.—1 Petero 2:17 duahia. a
3. Dahaka do oi karaia bema Keristani tadikaka ida oi hepapahuahu?
Ena be ita lalotamona, to ita be goevadae lasi taudia. Nega haida reana ta ena lalona ita hahisia o ita habadua. Unai dainai, Dirava ena Hereva ia gwau “do umui gwauatao heheni,” bona “Iehova ese mai kudouna ibounai ida umui ia gwauatao hegeregerena, namona be umui danu be unai bamona umui karaia.” (Kolose 3:13 duahia.) Nega momo Iehova ena lalona ita hahisia, to ita ia gwauatao. Unai dainai, ia ura iseda tadikaka edia dika do ita gwauatao danu. Bema oi itaia oi be ta ena lalona oi hahisia, namona be dala oi karaia unai hekwakwanai oi hamaoromaoroa totona.—Mataio 5:23, 24 duahia. b
DIBA MA HAIDA ABIA
Kongrigeisen ena lalotamona bona maino hagoadaia daladia haida do oi tahua.
Maino totona dahaka do oi karaia?
4. Ma haida inai henia kava karana rakatania
Ita ura iseda tadikaka taihu ibounai ita lalokau henidia. To reana ita amo ia idau tadikaka ta ita tura henia be auka. Dahaka ese ita ia durua diba? Kara 10:34, 35 duahia, bena inai henanadai herevalaia:
-
Iehova be taunimanima idauidau ia abia dae iena Witnes taudia ai idia lao totona. Unai ese edena dala ai oi ia durua oi amo idia idau taudia oi kara henidia totona?
-
Emu gabu ai taunimanima dekenai idia vara inai henia karadia be dahaka? Bona dahaka dainai unai kara oi dadaraidia be namo?
Korinto Iharuana 6:11-13 duahia, bena inai henanadai herevalaia:
-
Edena dala ai oi amo idia idau tadikaka taihu oi tura henidia diba?
5. Kudouna amo gwauatao bona maino karaia
Iehova be ita ia gwauatao, ena be ia ita gwauatao diba lasi. Salamo 86:5 duahia, bena inai henanadai herevalaia:
-
Edena dala ai Iehova ena gwauatao karana be hereadae?
-
Dahaka dainai iena gwauatao karana oi laloa bada?
-
Ma haida ida maino bona lalotamona ai ita noho karana be dahaka ese ia hadikaia diba?
Edena dala ai Iehova ita tohotohoa bona iseda tadikaka taihu ida lalotamona ai ita noho diba? Aonega Herevadia 19:11 duahia, bena inai henanadai herevalaia:
-
Bema ta ese oi ia habadua, dahaka oi karaia diba unai hekwakwanai oi hamaoromaoroa totona?
Nega haida ita ese ma haida ita habadua. Unai ia vara neganai, dahaka do ita karaia? VIDIO itaia, bona henanadai herevalaia.
-
Vidio lalonai, taihu be maino ia karaia totona dahaka ia karaia?
6. Emu tadikaka taihu edia kara namodia oi itaia
Iseda tadikaka taihu ita tura henidia neganai, edia goada bona manoka gaudia do ita itaia. To, edena dala ai edia goada gaudia sibona do ita laloa bada? VIDIO itaia, bona henanadai herevalaia.
-
Dahaka ese oi do ia durua emu tadikaka taihu edia kara namodia sibona oi itaia totona?
Iehova be iseda kara namodia sibona ia itaia. Sivarai Iharuana 16:9a duahia, bena inai henanadai herevalaia:
-
Iehova be oiemu kara namodia sibona ia itaia oi diba neganai, emu hemami be edena bamona?
Ena be daimon hairaina ena kahana ta dekenai dika sisina ta ia hedinarai, to ia be do dava bada gauna. Unai hegeregerena, ena be iseda tadikaka taihu ibounai be mai edia kara dika, to Iehova ena matanai idia be dava bada gaudia
HAIDA IDIA GWAU: “Ta ena dika lau gwauatao totona, lau dekenai sori herevana do ia gwauraia guna.”
-
Dahaka dainai mai ura ida ma haida edia dika ita gwauatao be namo?
POINT BADANA
Bema tadikaka taihu edia dika oi gwauatao bona ibounai oi lalokau henidia, kongrigeisen lalonai lalotamona karana do oi hagoadaia.
Riviu
-
Edena dala ai ma haida inai henia karana oi dadaraia diba?
-
Dahaka do oi karaia bema Keristani tadikaka ida oi hepapahuahu?
-
Dahaka dainai oi ura Iehova ena dika gwauatao karana oi tohotohoa?
REFERENS ITAIA
Mani Iesu ena haheitalai ta do ita itaia, ita do ia durua ma haida ita hahemaoro henia lasi totona.
Bema ita be kerere ta ita karaia lasi, sori herevana do ita gwauraia, a?
“Sori Herevana Gwauraia—Maino Dalana” (Gima Kohorona, November 1, 2002)
Haida ese ta ena toana laloa lasi karana idia dibaia dalana itaia.
Mani oi bona ma ta huanai ia vara hekwakwanai hamaoromaoroa dalana oi dibaia, unai amo kongrigeisen ena maino do ia hadikaia lasi.
“Mai Lalokau ida Hepapahuahu Hamaoromaoroa” (Gima Kohorona, May 2016)
a Hereva Ma Haida 6 ese Keristani taudia be lalokau dainai idia ura lasi ma ta dekenai daihanai goreredia idia henia hanaia karana ia herevalaia.
b Hereva Ma Haida 7 ese bisinesi bona taravatu dalanai idia vara hekwakwanai hamaoromaoroa dalana ia herevalaia.
Reana Inai Danu Oi Ura
Momo Edia Henanadai
Iehova Ena Witnes Taudia be Dahaka Baibel Stadi Kosi Idia Karaia?
Iehova Ena Witnes Taudia ese idia karaia Baibel stadi be davana lasi, bona oi ura henia Baibel oi gaukaralaia diba. Emu ruma bese eiava turadia oi boiria diba stadi lalonai idia helai totona.
