Laloa momo karana ese tauanina bona hemami dalanai oi ia hadikaia diba. Emu lalohekwarahi be maragi, to emu hekwakwanai oi laloa momo dainai hekwakwanai badana ta ai ia lao diba.

•  Nius dikadia itaia momo lasi. Sivarai dikadia ibounai oi dibaia be gau badana lasi. Dika idauidau edia ripoti o sivarai oi duahia, kamonai o itaia momo neganai, do oi gari bona do oi laloa hamaoromaoroa dalana ta ia noho lasi.

   Baibel ena hakaua hereva: “Lalohisihisi kudouna ese ta ena goada ia haorea.”​—Aonega Herevadia 17:22.

   “Intanet ai sivarai matamatadia dainai do oi hoa, to emu helt be unai ese ia hadikaia diba. Nius lau itaia momo lasi neganai, egu laloa momo karana ia ore ia lao.”​—John

   Inai oi lalohadailaia: Hanaihanai nius matamatadia oi dibaia be namo, a?

•  Sediual ta badinaia. Dina ta ta ai, emu sediual ena taim hegeregerena, oi noga, aniani, bona emu gaukara idauidau oi karaia bona nega maorona ai oi mahuta. Sediual ia noho neganai, gau ta ta do oi karaia namonamo bona do oi laloa momo lasi.

   Baibel ena hakaua hereva: “Gaukara goadagoada tauna ena palani idia guguru.”​—Aonega Herevadia 21:5.

   “COVID-19 pendemik ia matamaia neganai, dina ta ta ai lau karaia gaudia lau karaia diba lasi bona egu nega bada be moale karadia dekenai lau haorea. Unai dainai egu nega lau gaukaralaia namonamo totona, dina ta ta ena sediual lau karaia.”​—Joseph

   Inai oi lalohadailaia: Oi dekenai sediual ta ia noho, unai ese oi ia durua emu gaukara dina ta ta ai oi hagugurua bona oi moale, a?

•  Gau namodia sibona laloa. Idia vara lasi dika gaudia oi lalohadailaia momo neganai, oi dekenai laloa momo karana do ia havaraia. To oi dekenai moale ia henia gaudia rua o toi oi laloa.

   Baibel ena hakaua hereva. “Tanikiu karana do umui hahedinaraia.”​—Kolose 3:15.

   “Baibel duahia karana ese lau ia durua, sivarai dikadia lau dadaraia bona gau namodia sibona lau laloa. Do oi laloa unai be gau ta lasi, to ia be mai ena heduru bada!”​—Lisa

   Inai oi lalohadailaia: Nega momo emu mauri ai idia vara dika idauidau oi laloa dainai lalohadai namodia oi dadaraia, a?

•  Ma haida oi laloa. Emu hekwakwanai dainai oi laloa momo neganai, sibona noho lalohadaina oi abia diba, to heduru idia ura taudia durua dalana oi laloa.

   Baibel ena hakaua hereva: “Sibona emui namo do umui laloa lasi, to ma haida edia namo do umui laloa danu.”​—Filipi 2:4.

   “Haida durua karana ese lau ia hamoalea. Idia do ia hamoalea gaudia lau karaia noho. Bona haida durua totona lau bisi dainai, lau laloa momo lasi.”​—Maria

   Inai oi lalohadailaia: Oi dibaia taudia amo daidia be heduru idia ura bona dahaka do oi karaia idia oi durua totona?

•  Emu helt oi naria namonamo. Oi laga-ani namonamo bona eksasais. Emu helt ia durua aniani oi abia. Emu helt oi naria namonamo karana ese emu mauri ia hanamoa diba, bona do oi laloa momo lasi.

   Baibel ena hakaua hereva: “Tauanina treinia karana be mai ena namo.”​—1 Timoteo 4:8.

   “Lau bona egu natuna mero be ruma murimuri dekenai ai eksasais lasi dainai, dina ta ta ai ruma lalonai eksasais ai karaia. Unai ese emai hemami ia hanamoa, bona ta ta dekenai ai kara namo bona ai haheauka.”​—Catherine

   Inai oi lalohadailaia: Aniani maorodia bona eksasais karana ese emu helt ia durua diba, a?

 Momo be laloa momo karana hamaragia totona inai daladia idia badinaia, bona Baibel ena gwauhamata namodia vaira nega totona ese idia ia durua bada. Inai atikol itaia, “Dirava Ena Basileia ese Dahaka Do Ia Hagugurua?”