“Ita ibounai ita ura iseda mauri do ia namo lou.”​—Angela Merkel, German praiminista.

 Tanobada hegegemadai COVID-19 gorerena ese taunimanima edia mauri ia haidaua noho dainai, iena hereva ida do oi lalotamona. To ena hereva ena anina be dahaka? Taunimanima idia ura dahaka idia karaia?

•   Edia mauri gunana idia moalelaia lou. Haida idia ura bada ma haida idia bamoa lou, ta ta idia rosia, imana idia udeudea, bona gabu ma ta dekenai idia laolao. Dr. Anthony Fauci a ia gwau, idia mamia “edia mauri idia moalelaia lou diba” bema “aniani gabudia, theater, [bona] unai bamona gabudia” dekenai idia lao.

•   Edia mauri idia hanamoa. Haida idia mamia hari be nega namona edia mauri idia hanamoa totona. Idia mamia gau haida idia haidaua be namo, hegeregere nega bona goada idia haorea moni gaukaradia, ma ta ena bese o dagi dainai idia inai henia karana, bona momo be kwara gorere dainai hisihisi idia mamia noho. World Economic Forum ia hamatamaia tauna, Klaus Schwab ia gwau: “Inai pendemik negana be nega namona iseda mauri bona tanobada ita laloa bona senisi haida ita karaia totona, badina inai nega be do ia noho hanaihanai lasi.”

 Ma haida be pendemik dainai hekwakwanai momo idia davaria, bona idia mamia edia mauri be do ia namo lou lasi. Hegeregere, momo be moni gaukara amo idia hadokodia, edia ruma idia haboioa, hari idia gorere o edia lalokau taudia idia mase.

 Momokani, pendemik murinai dahaka do ia vara be ta ia diba lasi. (Hadibaia Tauna 9:11) To Baibel ese ita do ia durua vaira nega ita lalopararalaia bona do idia vara gaudia ita haheaukalaia totona. Danu, Baibel ese vaira nega namona ia herevalaia, reana oi lalohadailaia lasi gauna unai.

 Idau negai, Baibel ia peroveta daihanai goreredia o “gorere dikadia” be “inai nega oromana ena dokona” ai do idia vara. (Luka 21:11; Mataio 24:3) COVID-19 gorerena ita laloa neganai, ita abia dae inai be Baibel ese ia perovetalaia gauna ta, tuari, tano mareremarere badadia, bona hitolo bada danu.

 Inai oi diba dainai oi moale: Reana inai pendemik murinai mauri be do ia namo, to Baibel ia gwau “nega aukadia do idia vara, unai ese taunimanima do idia hametaua bada.” (2 Timoteo 3:1) Unai ita diba dainai, inai nega aukadia lalonai iseda mauri ita lalohadailaia namonamo diba.

 Baibel be lalohadai maorona ia henia: Iseda tanobada ai, hekwakwanai be momo, to kahirakahira gau ibounai do idia idau. Dahaka do ia idau?

 Baibel be hari ita davaria hekwakwanai badadia sibona ia perovetalaia lasi, to vaira nega namona danu. Taunimanima edia gavamani ese unai bamona nega namona idia henia diba lasi, to Dirava sibona ese ia henia diba. “Ia ese mata ranu ibounai be edia matana amo do ia dahua ore, bona mase, lalohisihisi, taitai, bona hisihisi be do idia ore.”​—Apokalupo 21:4.

 Iehova b Dirava ia gwauhamata: “Lau ese gau ibounai lau hamatamataia noho.” (Apokalupo 21:5) Ia ese inai tanobada ena hekwakwanai ibounai do ia hamaoromaoroa, pendemik ese ia havaraia gaudia danu. Bona inai do ia karaia:

•   Tauanina bona lalohadai be do ia goevadae, gorere bona mase be do ia ore.​—Isaia 25:8; 33:24.

•   Emu gaukara do oi moalelaia, emu nega bona goada idia haorea gaukaradia do oi karaia lou lasi.​—Isaia 65:22, 23.

•   Taunimanima do idia noho namonamo, ogogami bona hitolo be do ia ore.​—Salamo 72:12, 13; 145:16.

•   Guna oi dekenai ia vara gau dikana do oi laloa lou lasi, bona emu lalokau mase taudia be do idia toreisi lou.​—Isaia 65:17; Kara 24:15.

 Inai oi diba dainai oi moale: Baibel ia gwau: “Ita abia helaro be iseda mauri ena dogo bamona.” (Heberu 6:19) Unai helaro namona ese iseda lalona ia hagoadaia diba. Ita ia durua hari ita davaria hekwakwanai ita haheaukalaia, ita lalohekwarahi lasi bona ita moale totona.

 To Baibel ena gwauhamata ibounai oi abia dae momokani, a? Inai atikol ladana “Baibel​—Diba Maorona Ena Badina” itaia.

•   Mauri laloa bada

   Siri: ‘Aonega ena namo be ena biaguna ia hamauria diba.’​—Hadibaia Tauna 7:12.

   Ena anina oi totona: Mai aonega ida abia hidi karaia, unai amo do oi gorere lasi. Emu gabu ai idia vara gaudia oi laloa. Helt bona seifti taravatu, gorere ena bada, bona taunimanima hida be vaccine idia abia oi laloa.

•   Naria namonamo

   Siri: “Aonega tauna be ia naria namonamo bona dika amo ia raka siri, to kavakava tauna be ia laloa namonamo lasi bona ia hekokoroku.”​—Aonega Herevadia 14:16.

   Ena anina oi totona: Emu helt oi gimaia noho. Diba bada taudia idia gwau coronavirus be do ia ore haraga lasi.

•   Hadibaia hereva maorodia badinaia

   Siri: “Diba bada lasi tauna ese hereva ibounai ia abia dae, to aonega tauna be do ia karaia gaudia ia laloa namonamo guna.”​—Aonega Herevadia 14:15.

   Ena anina oi totona: Do oi badinaia sisiba oi abia hidi namonamo. Sisiba kererena oi badinaia neganai, emu helt oi hadikaia diba.

•   Lalohadai maorona dogoatao

   Siri: “Namo lasi oi gwau, ‘Dahaka dainai guna negadia be namo, to hari be lasi?’ Badina unai bamona oi henanadai be aonega karana lasi.”​—Hadibaia Tauna 7:10.

   Ena anina oi totona: Lalona oi hadaia hari emu noho dalana oi moalelaia totona. Namo lasi oi laloa pendemik ia do vara lasi neganai, mauri be ia namo, bona pendemik taravatu dainai oi reaia gaudia oi laloa momo lasi.

•   Ma haida matauraia

   Siri: “Taunimanima idauidau ibounai umui matauraia.”​—1 Petero 2:17.

   Ena anina oi totona: Pendemik bona ia havaraia hekwakwanai dainai taunimanima edia lalohadai be idauidau. Edia lalohadai matauraia, to oi karaia abia hidi maorodia oi badinaia noho. Vaccine idia abia lasi taudia, buruka taudia, bona mai edia gorere taudia oi laloa.

•   Oi haheauka

   Siri: “Lalokau be ia haheauka.”​—1 Korinto 13:4.

   Ena anina oi totona: Bema haida idia gari vaia idia karaia gaudia idia karaia lou totona, oi haheauka. Pendemik dainai idia atoa taravatudia idia kokia bona oi ura karaia gaudia oi palanilaia neganai, oi haheauka be namo.

 Iehova ena Witnes taudia be Baibel ese ia gwauhamatalaia vaira nega namona ese ia hagoadadia dainai, pendemik ese ia havaraia hekwakwanai idia laloa momo lasi. Danu, Baibel ena hahegani hegeregerena nega ibounai tomadiho totona idia hebou, unai amo ta ta idia hagoadaia. (Heberu 10:24, 25) Taunimanima ibounai be Iehova ena Witnes taudia ese idia karaia heboudia dekenai idia vareai diba, pendemik dainai hebou be videoconferencing amo idia karaia.

 Haida idia gwau inai pendemik negana ai Iehova ena Witnes taudia ida idia hebou karana ese idia ia durua. Hegeregere, COVID-19 ia abia hahinena be Iehova ena Witnes taudia edia hebou dekenai ia helai vareai. Inai heboudia ese ena lalona idia hagoadaia, herevana inai vairasi dainai ia do gorere noho. Gabeai ia gwau: “Lau mamia lau be inai ruma bese tauna ta. Baibel duahia karana ese lalomaino ia henia. Lau ia durua vaira nega ena helaro lau laloa, bona egu hekwakwanai lau laloa bada lasi totona. Tanikiu bada lau umui durua Dirava kahirakahira lau lao totona, egu mauri lalonai unai lau ura karaia.”