World Health Organization ia gwau “tanobada ibounai lalonai hahine dagedage henia o botaia karana be hekwakwanai badana ta. Bona unai hadokoa totona kara ta ita karaia be gau badana.” Danu WHO ena ripoti ai, kahirakahira hahine ibounai 30 pesen be ‘edia tatau eiava boifren ese idia botaia bona/eiava mahuta hebou dagedage karadia idia karaia.’ Bona United Nations ena ripoti ta ese ia hahedinaraia, vanegai lagani tamona lalonai, tanobada ibounai dekenai hahine 137 be dina ta ta ai edia turadia eiava famili memba ta ese ia dagedage henia dainai idia mase. a

 Ripoti ese ia hahedinaraia hahine dagedage henia o botaia karana be ia bada, to unai taudia ta ta ese hemami bona tauanina dalanai idia mamia hisihisi do idia herevalaia diba lasi.

 Oi dekenai dagedage karana ia vara, a? Eiava oi diba tauna dekenai unai ia vara noho, a? Bema oibe, Baibel ese ia herevalaia point amo heduru abia dalana itaia.

  Oi dekenai ia vara dagedage karana be emu kerere lasi

  Heduru abia dalana ia noho

  Oi be sibona oi noho lasi

  Dagedage karana do ia ore

  Dagedage ia davaria tauna oi durua dalana

 Baibel ia gwau: “Dirava ese ita ibounai ta ta be iseda kara hegeregerena do ia hahemaoro henia.”​—Roma 14:12.

 Inai oi laloatao: Oi ia hahisia noho tauna be ia kerere.

 Bema emu tau ia gwau emu kerere dainai ia ese oi ia hahisia, ia be kerere. Tatau ese edia adavadia idia lalokau henia be namo, to idia dagedage henidia lasi.​—Kolose 3:19.

 Iena adavana o turana ia dagedage henia tauna be reana mai ena kwara gorere, famili lalonai unai kara ia dibaia, eiava ia be inuinu kekero tauna. To, iena kara dainai Dirava ese ia do ia hahemaoro henia. Bona iena kara ia senisia be namo.

 Baibel ia gwau: “Sisiba henia taudia be momo neganai, do oi kwalimu.”​—Aonega Herevadia 15:22.

 Inai oi laloatao: Bema oi mamia seif gabuna ta be lasi, eiava oi diba lasi dahaka do oi karaia, haida ese oi idia durua diba.

 Dahaka dainai haida amo heduru oi abia be namo? Bema oi dekenai dagedage karana ia vara, gau momo do oi lalohadailaia. Do oi karaia gauna oi laloa totona be mai ena hekwarahi, badina oi daradara edena do oi badinaia.

•   Emu seifti

•   Emu natudia edia namo

•   Moni abia dalana

•   Emu lalokau emu adavana totona

•   Emu headava oi ura gimaia, bema emu adavana be ena kara ia senisia

 Vaia, do oi daradara bona lalohekwarahi. Daika dekenai heduru oi tahua diba?

 Oi trast henia turana o famili memba ta ese oi dekenai dala haida ia gwauraia diba, bona oi do ia durua. Oi ia laloa bada tauna dekenai emu hekwakwanai herevalaia karana ese reana oi do ia durua bada.

 Heduru totona sevis namba oi rini henia, unai amo karaharaga oi do idia durua. Unai gaukara idia karaia taudia ese seifti palani ta idia karaia diba. Bema emu adavana o turana ese mai momokani ida hekwakwanai ia herevalaia bona lalona ia hadaia ena kara do ia senisia, unai gaukara taudia ese ia dekenai do ia badinaia dala ginigunana do idia hadibaia.

 Heduru daladia ma haida oi abia diba bema oi be dika lalonai oi noho. Oi abia heduru haida be doketa, nesi eiava diba bada taudia haida.

 Baibel ia gwau: “Iehova b be lalometau taudia kahirakahira ia noho. Ia ese daradoko taudia ia hamauria noho.”​—Salamo 34:18.

 Inai oi laloatao: Dirava ia gwauhamata oi do ia durua.

 Iehova be oi ia laloa bada. (1 Petero 5:7) Emu lalohadai bona hemami ia lalopararalaia. Iena Hereva, Baibel amo oi ia hagoadaia diba. Bona Dirava ia ura ia dekenai do oi guriguri. Oi guriguri neganai, ia oi noia diba oi dekenai aonega ia henia bona oi ia hagoadaia, emu hekwakwanai oi haheaukalaia totona.​—Isaia 41:10.

 Baibel ia gwau: “Idia ta ta be edia vain bona fig au henunai do idia noho, bona tau ta ese idia do ia hagaria lasi.”​—Mika 4:4, futnout.

 Inai oi laloatao: Baibel ese ia gwauhamatalaia vaira negana be kahirakahira do ia vara, unai neganai ibounai be maino gabuna ai do idia noho.

 Iehova Dirava sibona ese iseda problem ibounai do ia haorea o hamaoromaoroa. Baibel ia gwauhamata: “Ia ese mata ranu ibounai be edia matana amo do ia dahua ore, bona mase, lalohisihisi, taitai, bona hisihisi be do idia ore. Gau gunadia be idia ore vadaeni.” (Apokalupo 21:4) Danu unai negai memori dikadia be do idia ore. (Isaia 65:17) Baibel ese oi totona ia herevalaia maino be vaira negai do ia vara.