Tanobada ibounai lalonai, momo idia gwau Iesu Keriso idia badinaia taudia ese politik gaukara idauidau lalonai idia vareai. Edia tomadiho bona taravatu idia abia isi totona kendideit o politikol orea ta idia durua. Politik taudia ese tomadiho taudia edia heduru idia abia totona, komuniti lalonai idia vara gaudia idia gaukaralaia. Gabu ibounai dekenai tomadiho gunalaia taudia be politik gaukara lalonai idia vareai. Tano haida dekenai, “Keristani” tomadiho ta be unai tano ai dagi badana ia abia.

 Dahaka oi laloa? Iesu Keriso murinai idia raka taudia be politik gaukara idia karaia be maoro, a? Iesu ena haheitalai oi itaia karana amo haere do oi davaria. Iesu ia gwau: “Lau ese umui totona lau haheitalaia vadaeni, umui dekenai lau karaia hegeregerena, umui danu unai bamona do umui karaia.” (Ioane 13:15) Politik karadia dekenai, Iesu be dahaka ia karaia?

 Lasi. Iesu be inai tanobada ena politik gaukara idauidau lalonai ia vareai lasi.

 Iesu be politikol ena dagi ia tahua lasi. Ia ura lasi taunimanima edia gavamani ena biaguna ai ia lao, bona Satani Diabolo ese Iesu dekenai “tanobada ena basileia ibounai” ia hahedinaraia neganai, unai ia dadaraia. (Mataio 4:8-10) a Nega ma ta ai, taunimanima ese Iesu ena kara namodia idia itaia dainai idia ura politik lalonai do ia vareai. Baibel ia gwau: “Iesu ia diba taunimanima be do idia mai ia idia dogoatao bona king ai do idia halaoa, unai dainai ia sibona be ororo dekenai ma ia daekau lao.” (Ioane 6:15) Iesu be taunimanima edia lalohadai ia abia dae lasi. Bona ia ura lasi politik lalonai ia vareai.

 Iesu ese politik ena hepapahuahu karadia lalonai ia vareai lasi. Hegeregere, Iesu ena nega ai, Iuda taudia idia ura lasi Roma ena gavamani dekenai takisi moni do idia henia, bona idia laloa unai be kara maorona lasi. Idia ura Iesu be unai hepapahuahu karana lalonai do ia vareai, to Iesu ese ia dadaraia. Idia dekenai ia gwau: “Kaisara ena gaudia be Kaisara dekenai umui henia, to Dirava ena gaudia be Dirava dekenai umui henia.” (Mareko 12:13-17) Iesu be politikol ena hepapahuahu karadia amo ia gini siri, bona ia hahedinaraia Roma ena siahu taudia ese idia gwauraia takisi moni do idia henia be namo, unai be Kaisara ena gaudia. To danu ia gwau gavamani ena hereva ita kamonai henia karana be mai ena hetoana. Dirava dekenai do ita henia gaudia, hegeregere hanamoa bona tomadiho karana be gavamani dekenai ita henia lasi.​—Mataio 4:10; 22:37, 38.

 Iesu ese guba gavamani, unai be Dirava ena Basileia ia harorolaia. (Luka 4:43) Politik karadia lalonai ia vareai lasi badina ia diba Dirava be tanobada totona ia ura karaia gauna be ena Basileia ese ia hagugurua diba, to taunimanima ena gavamani lasi. (Mataio 6:10) Ia laloparara Dirava ena Basileia ese taunimanima ena gavamani do ia gaukaralaia lasi to do ia kokia.​—Daniela 2:44.

 Lasi. Iesu murinai idia raka taudia ese ena hereva idia badinaia, idia be “tanobada taudia bamona lasi.” (Ioane 15:19) Idia ese Iesu ena haheitalai idia tohotohoa bona tanobada ena politik karadia amo idia gini siri. (Ioane 17:16; 18:36) Politik gaukaradia idia karaia lasi, to Iesu ena hahegani idia badinaia, idia ese Dirava ena Basileia idia harorolaia bona hahediba gaukarana idia karaia.​—Mataio 28:18-20; Kara 10:42.

 Keristani ginigunadia be edia mauri lalonai Dirava kamonai henia karana idia atoa guna, to idia laloparara gavamani do idia matauraia danu. (Kara 5:29; 1 Petero 2:13, 17) Taravatu idia badinaia bona takisi moni idia henia. (Roma 13:1, 7) Idia be politik karadia lalonai idia vareai lasi, to gavamani ia henia taravatu bona heduru idia gaukaralaia amo idia ia gimaia bona namo idia abia.​—Kara 25:10, 11; Filipi 1:7.

 Baibel ese ia hahedinaraia, Iesu bona ena murinai idia raka taudia be politik karadia idia durua lasi. Unai badina dainai, Iehova ena Witnes taudia tanobada hegegemadai be gini siri karana idia hahedinaraia. Keristani ginigunadia edia negai hegeregerena, Iesu ese ia henia hahegani idia badinaia bona “Basileia ena sivarai namona” idia harorolaia.​—Mataio 24:14.